Hechos 1
1
Albil te ya xtal te Ch'ul Espiritue
1Teófilo,#Lc 1.1-4. te sbabial jun te la jpasbate tey la jts'ibubat spisil a te bila jajch' spas te Jesuse soc te bila jajch' yac' ta nopel ta xjajch'ibale, 2ja' to c'alal te ic'ot moel ta ch'ulchane. Te c'alal ma to xbajt' ta ch'ulchane, la spas ta mandal ta swenta te Ch'ul Espíritu te jpuc-c'opetic te tsabil yu'une. 3Te bit'il c'axix tel yu'un te lajele, la yac' sba ta ilel ta stelemal ta stojolic cha'winic c'aal. Buen chican la yac' sba ta ilel te bit'il cha'cuxemixe soc la yalbey yaiyic te bit'il ay ta ajwalinel te Diose.
4Te c'alal sjoinej to te jnopojeletic yu'une, la yalbey mandal te ma ba ya yijq'uitayic te lum Jerusalene. Jich la yalbey yaiyic:
—Ya me amaliyic te bila yaloj te Jtate,#Lc 24.49. te la calbeyex awaiyique. 5Melel te Juane, ja' nax te la yac' ich'ja'. Yan te ja'exe, ma ba bayal xan c'aal te ya x'ac'botex awiq'uic te Ch'ul Espiritue#Mt 3.11; Mr 1.8; Lc 3.16; Jn 1.33. —xi' te Jesuse.
Te Jesús mo bael ta ch'ulchan
6Jich te c'alal stsoboj sbaic soque, la sjojc'obeyic te Jesuse:
—Cajwal, ¿ja' bal yorailix te ya xjajch' xan ta mandal te ajwalil yu'un te israelotique? —xiic.
7La yal te Jesuse:
—Te ja'exe, ma'yuc ta awentaic sna'el te bi orae soc te bi c'aalile. Ja' ay ta swenta te Jtat te tulan yat'el stuquele. 8Ja'uc me to, te ja'exe ya me awich' awu'elic te c'alal ya xjul ta awentaic te Ch'ul Espiritue. Jich me testigo ya xc'oex cu'un ta Jerusalén soc ta spamal sq'uinal Judea soc ta sq'uinal Samaria soc ta bayuc ta spamal te balumilale#Mt 28.19; Mr 16.15; Lc 24.47-48. —xi'.
9Te c'alal laj yo'tan ta yalel in to, la yilic ic'ot moel ta ch'ulchan. Potsol bael ta tocal, tup' bael ta sitic.#Mr 16.19; Lc 24.50-51. 10Yacalic ta yilel moel ta ch'ulchan te yac ta moel baele, chicnaj ta sts'eelic ta ora cheb winiquetic te slapojic saquil c'u'ile. 11Jich albotic yu'un:
—Galileoetic, ¿bi yu'un te yacalex ta yilel moel te ch'ulchane? Ja' nix in Jesús to, te la awilic te mo bael ta ch'ulchane, jich nix me ya xcha'tal xan te bit'il la awilic bajt' ta ch'ulchane —xiic te winiquetique.
La slebeyic sjelol te Judase
12Jich la yijq'uitayic jilel te Wits Olivailtic sbiile. Sujt'ic ochel ta Jerusalén te nopol yiloj sba soque, jich snajt'il te bit'il ya stac' ya xbeenic ta sc'aalelal te cux-o'tane. 13Te c'alal ayiquix ta lume, moic bael ta xcha'cajal na ta bay nainem te Pedro, te Juan, te Jacobo, te Andrés, te Felipe, te Tomás, te Bartolome, te Mateo, te Jacobo te snich'an Alfeo, soc te Simón te Zelote, soc Judas te snich'an Jacobo.#Mt 10.2-4; Mr 3.16-19; Lc 6.14-16. 14Spisilic jun nax la stsobilay sbaic ta sc'oponel Dios soc te yijts'inab Jesús, soc te Mariae te sme' te Jesuse, soc te yantic antsetique.
15Jich ora te la stejc'an sba jajch'el te Pedro ta yolil te quermanotactique. (Ay niwan wacwinic (120) ta jtul ta spisilic.) Jich caj yal ta stojolic:
16—Quermanotac, puersa c'ot ta pasel te bila ts'ibubil jilele, ja' bi ja' te bila yaloj te Ch'ul Espíritu ta swenta sti' David, te la yalbey sc'oplal te Judas te la yic' tel te mach'atic la stsaquic te Jesuse. 17Melel jun nax ajtaybilotic soc ta neelal te Judase soc ac'bot ta swenta uuc te at'ele. 18Te Judas tojot yu'un te bila amen la spase, soc la smanic q'uinal a. Tey coel bajt' sjol a, soc t'om te xch'ujt'e, soc spisil chepc'uj loq'uel te sbiquile. 19Pujc' sc'oplal ta stojol te mach'atic ayic ta Jerusalén. Acéldama sbiil c'ot yu'unic te q'uinale, ja' bi “Sq'uinal Ch'ich'”, xi' c'oem te sbiile.#Mt 27.3-8. 20Melel jich ts'ibubil jilel ta sjun Salmoetic:
“Ac'a jojch'ajuc jilel te snae.
Ma me mach'a ya xnain tey a”,#Sal 69.25. te xie.
Soc ya yal xan:
“Yan me mach'a ya yich'bey te yat'ele”,#Sal 109.8. te xie.
21Jich yu'un ya sc'an ya xwejt' sjelol. Ja' nix me te winiquetic te la jointic spisil ora soc te Jesuse 22ja' to c'alal te bi ora ac'bot yich' ja' yu'un te Juane,#Mt 3.16; Mr 1.9; Lc 3.21. ja' to c'alal te ic'ot moel ta ch'ulchane,#Mr 16.19; Lc 24.51. yu'un testigo ya xc'ootic soc te bit'il cha'cux te Jesuse —xi' te Pedroe.
23Jich la sleic cha'tul: ja' te José te Barsabás soc te Justo yan sbiile, soc uuc te Matiase. 24Jich la sc'oponic Dios yu'un:
—Cajwaltic, ja'at awilojbey yo'tanic spisil te ants-winiquetique, jich yu'un ac'botic jna'tic stojol te mach'a tsabil awu'un jtuluc in chebic to, 25te ja' ya yich' abatinel ta jpuc-c'op awu'une. Ja' sjelol ya xc'ot te Judas te jochol jilel yawil yu'un te bila amen spasoje. Tey bajt'ix a ta banti ay te yawile —xiic ta sc'oponel te Diose.
26Jich la spasbeyic snumeroil ta na'el te mach'a tsabil ya xc'ote. Ja' c'ot ta swenta te Matiase. Jich la sjoin ta ajtayel te buluchtul jpuc-c'opetique.
Currently Selected:
Hechos 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.