2 Corintios 1
1
Spatjibal-o'tanil
1Jo'on Pabloon. Ayon ta jpuc-c'op yu'un Jesucristo ta swenta sc'anjel yo'tan te Diose. Jo'on soc te quermanotic Timoteoe, ya jpatbeyex awo'tanic ja'ex te jch'uunjelex yu'un Dios te ayex ta lum Corinto#Hch 18.1. soc spisil te mach'atic ch'ul lum yu'un Dios ta sq'uinal Acaya. 2Ac'a yac'beyex lamal q'uinal ta swenta yutsil yo'tan te Jtatic Dios soc te Cajwaltic Jesucristoe.
Te bit'il c'ax swocol te Pabloe
3Jelawen yutsil te Diose te Stat te Cajwaltic Jesucristoe. Ja' Jtatic uuc te bayal ya xc'uxtayotique, soc ja' Dios cu'untic te ya smuc'tes q'uinal caiytic spisil orae. 4Ja' ya smuc'tesbotic q'uinal caiytic ta jpisiltic te c'alal ayotic ta woclajele, swenta yu'un jich me ya xju' cu'untic te ya jmuc'tesbeytic q'uinal yaiyic yantic uuc te c'alal ayic ta woclajele. Te bila la smuc'tes q'uinal caiytic a te Diose, ja' nix ya cac'beytic xmuc'ub q'uinal yaiyic a te yantique. 5Melel bayal ya xc'ax jwocoltic ta jpisiltic ta swenta bit'il jun ayotic soc Cristo te bayal c'ax swocole. Ja'uc me to, ja' nix te Cristoe te bayal ya xmuc'ub q'uinal caiytic yu'une. 6Jich yu'un teme ayon ta woclajel soc te jo'taque, ja' swentail te jich me ya ataic smuc'ul q'uinal awaiyic soc te acolelique. Soc teme Dios ya smuc'tesbon q'uinal caiye, ja' nix jich ya ataic smuc'ul q'uinal awaiyic uuc. Jich me jun nax awo'tanic ta sts'iquel te bila pajal yac ta c'axel jwocoltic yu'une. 7Jich yu'un jun co'tantic ya jmaliytic te ya ataic smuc'ul q'uinal awaiyic yu'un uuc te Diose, melel yac ta c'axel awocolic jich bit'il te jo'otique.
8Quermanotac, ya jc'an ya ana'ic stojol te bayal c'ax jwocoltic ta bay sq'uinal Asia.#1 Co 15.32. C'ax jelaw yalal la caiytic te jwocoltique. Ma ba c'an cujch'uc cu'untic. La jcuytic te tey ya xlajotiquix a. 9Ja' jich la caiytiquix ta co'tantic te bit'il mach'atic quecheliquix ta milele, swenta yu'un ma ba ya jmuc'ul-o'tanin jbajtic jtuqueltic. Ja' nax ya sc'an te ya smuc'ulin co'tantic stuquel te Diose, te ja' ya xcha'cuxes tel te animaetique. 10Te Diose ja' la scoltayotic ta libre ta bay in lajel to, te c'axem to xan xiweltic sbae. Soc jujun c'aal ya scoltayotic xan loq'uel tey a. Jich jun co'tantic ya jmaliytic te ya scoltayotic loq'uel spisil ora ta bay te lajele, 11soc ya me acoltayonic ta sc'oponel te Diose. Yu'un teme ay mach'a tsobol te ya sc'oponbotic Dios ta jtojoltique, ja' nix jich ay me tsobol mach'atic ya yalic wocol ta stojol Dios yu'un te bendición la yac'botique.
Ma ba bajt' ta lum Corinto ta ora te Pabloe
12Ay bila te ya xjachbotic sbujts' co'tantic, ja' ya yalbotic ta co'tantic te lec cac'oj jbajtic ta melel li' ta balumilal to, c'axem to xan ta atojolic te ja'exe. Ja' in to ma ja'uc nax ta swenta te jp'ijiltique, melel ja' te Diose ta swenta yutsil yo'tan te jich yac'oj cuxinucotique. 13Ta bay cartaetic te ts'ibubil cu'untique, ma yan yanuc la jpasbeyex. Jich nix la jpasbeyex te bit'il ya xju' awu'unic yilele soc te bit'il ya xc'ot ta awo'tanique. Soc co'tanuc te lecuc ya xc'ot ta awo'tanique, 14jich te bit'il ana'ojiquix oliluque. Te c'alal ya xcha'tal xan te Cajwaltic Jesuse, te ja'exe ya me sbujts'naj awo'tanic cu'untic, jich te bit'il ya xbujts'naj co'tantic awu'un uuc te ja'exe. 15Te bit'il jich ay ta co'tane, ja' swentail te neel c'an ba quilex swenta yu'un jich me ya ata sbujts' awo'tanic cheb buelta a te jichuque. 16Jich la jnop te ya xc'ax quilex te c'alal ya xboon ta sq'uinal Macedonia.#Hch 19.21. Soc la jnop xan te ya sujt'on tel ta atojolique, swenta yu'un te c'alal lajix co'tan ta bay Macedonia, jich me ya xju' awu'unic te ya acoltayonic te bit'il ya xbeenon bael c'alal ta sq'uinal Judea. 17Te bit'il jich la jnop ta co'tane, ¿yu'un bal ma la jnop ta lec te c'alal jich la cale? ¿Yu'un bal acuyojic te ja' nax ta swenta jbaq'uetal te ya cal teme ya xju'e o ma xju'e? 18Te Diose ja' testigo cu'untic te ma xju' te jun c'aal ya calbeyex “Jich” soc yan c'aal ya calbeyex “Ju'uc”. 19Melel te Snich'an Diose, ja' te Jesucristoe, te la jcholbeyex sc'oplal ta atojolic te jo'on soc te Silvano soc te Timoteoe,#Hch 18.5. ma'yuc banti xtal xbajt' nax te bila ya yale, teme ya xju' o ma xju'. 20Ja'uc me to, ta swenta Cristo ya xju' ta pasel spisil te bila yaloj te Diose. Ja' swentail te “Jichuc”, xootic ta swenta Cristo Jesús te c'alal ya calbeytic wocol te Diose. 21Soc ja' te Diose te la yaq'uix te jc'axel jch'uunejtic te Cristoe; soc ja' la yu'uninotiquix te Diose. 22Jich yac'ojbotiquix quich'tic te selloe, soc yac'ojbotiquix ainuc ta co'tantic te Ch'ul Espiritue swenta seña#Ef 1.14. te bila ya yac'botic xan ta patile.
23Ja'uc me to, te bit'il ma to baemucon ta Corinto jich te bit'il nopbil cu'une, ja' me testigo cu'un te Diose, te scaj nax te ay ac'oplalic ta co'tan te ja'exe. 24Ma yu'unuc ya jc'an jsujtiquex te bila ya sc'an ach'uunic te ja'exe, melel ayix yip te xch'uunjel awo'tanique. Ja' xanix te ya jcoltayex ta at'el te ja'exe, swenta yu'un jich me ya ata sbujts' awo'tanic.
Currently Selected:
2 Corintios 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.