Golotia 3
3
Nitaak i Tatod do Kinoringan sabap Aparsaya Tokou
1Oou tongotulun do Golotia, obudu kouno dii. Mimang kivaro mongurik dino ginavo muju. Do i pogulu nakaarati kouno marong onuu nopo iri nitudukku dikovu pasal do kinapatajan di Yisus Koristus siri salib. 2Nga mokiilo oku dikovu diti, nong potingkuro kou nakaanu di Tatod do Kinoringan. Irino sabap do maja kou di Undang-undang Ugama do Joudi ko sabappo do minongkinongou om aparsaya kou di Abar do Aandai? Nga mimang nakaanu kou di Tatod do Kinoringan sabap do minongkinongou om aparsaya kou di Abar do Aandai. 3Mimang nolijot ino sinoromo muju. Nokotimpuun kouno maja di Koristus do mangaarap di Tatod do Kinoringan, nga maino andasan mujupo daa do obuli kou maja di gaagaya do tulun popotilombus dino kovijaan muju gosob do koovion. 4Oguuno najamanan muju sabap aparsaya kou di Abar do Aandai, om aui daa osia-sia i najamanan muju. 5Om mongoduat okupo dikovu kavagu: inonuan kou naku do Kinoringan di TatodJo om vinaalJo i kosunduvan sino dikovu sabap do maja kou di Undang-undang Ugama do Joudi ko sabap do aparsaya kou di Koristus? Nga mimang nonuan kou di Tatod do Kinoringan om vinaalJo i kosunduvan sino dikovu sabap do aparsaya kou di Koristus.
Pakabanaron iIbraim mantad di Kaparsayaanjo
6Irad nogi dino iIbraim, do kivaro tinangaran si Kitab do, “Aparsaya iIbraim do Kinoringan, om irino dii do anggapon isido do Kinoringan do tulun di abanar,” kadiri tangar si Kitab.#Antangai Kinovorunan 15:6. 7Na, ondomo mujuno dii do kasangkat tulun di aparsaya do Kinoringan om irino koturunan diIbraim. 8Om nipotulis di Kinoringan laid siri Kitab do natangar Disido irad diti ka, “Abanar i tongotulun di okonko bansa Joudi do mantad di kaparsayaan diolo di Kinoringan,” ka. Irino sabap do naabaran laaid do Kinoringan iIbraim di Abar do Aandai irad diti, “Abarakatan kasangkat i tongobansa siti vonuvo do mantad dikau,” ka.#Antangai Kinovorunan 12:3; 18:18; 22:18. 9Aparsaya gia iIbraim, irino kaanu-anu disido do barakat, om irad nogi dino kasaangkat di tongotulun vokon do aparsaya nga abarakatan irad diIbraim.
10Nga ovusung kasangkat i tulun do mangaarap do pakabanaron iolo sabap maja di Undang-undang Ugama do Joudi. Do kivaro tinangaran si Kitab do, “Pointikid di tulun di au rumalan maja kasangkat di tinulis siri buuk do Undang-undang Ugama do Joudi nga ovusung do Kinoringan,” ka.#Antangai Gulion 27:26. 11Om atarangno marong do ausoi tulun pakabanaron si di Kinoringan nong maja isido di Undang-undang Ugama do Joudi, do kadi si Kitab, “Iri nopo tulun do otulid i ginavo sabap aparsaya isido do Kinoringan nga kivaro kovijaan do auso koovion,” ka.#Antangai Abakuk 2:4. 12Nong maja i tulun di Undang-undang Ugama do Joudi om auno oporlupo isido do aparsaya do Kinoringan, do kivaro tinangaran si Kitab do irad diti, “Tulun di maja di Undang-undang Ugama do Joudi om ausono kosilapan, irino kaanu do kovijaan,” ka.#Antangai Imam 18:5.
13Nga i Koristusno minongolukat dagai tulun do Joudi do popoidu mantad di kovuvusung di Undang-undang Ugama do Joudi, om irino nosuat Isido diri kovuvusung sabap sinumuvoli dagai. Om irino do nokotulis si Kitab do ka, “Novusungno i tulun di pinogivis siri savat kaju!” ka.#Antangai Gulion 21:23. 14Om novusung nogi i Koristus supaya i tongotulun do okonko bansa Joudi nga onuan diri nibarakat do Kinoringan sabap kopiiso di Koristus Yisus, irad di barakat nitaak di Kinoringan diIbraim. Om irino supaya kaanu tokou di Tatod do Kinoringan i nijanji do Kinoringan sabap aparsaya tokou di Koristus.
I Undang-undang Ugama om i Nijanji
15Oou kosusuladanku, monuturan oku irad diri koubasanan tokou do tikid tadau, do irad di duvo tulun do mijanji. Sombia nopo do nosoinan diolo mongiduvo iri surat janji diri, om isaai nopo tulun nga auno buli mongimban ko mongoruangpo di janji diri. 16Nga kasangkat diri janji do Kinoringan nga irino iIbraim om i koturunanjo jinonjian. Nga komoion nopo do janjiJo diri do “i koturunannu,” ka nga irino i Koristus. Nga ausoi komi do i tongokoturunan, irad di oguu tulun komoionJo.#Antangai Kinovorunan 12:7; 13:15; 24:7. 17Komoionku nopo nga iri pinongojonjian do Kinoringan i natantu Disido mantad di pogulu. Nga iri nopo i Undang-undang Ugama iri nitaak di Kinoringan do apat naatus om tolu nopulu toun di tourino om aui obuli potingkod ko mongurang diri janji do Kinoringan mantad di pogulu. 18Do nong posongonuvon di Kinoringan do tulun i kovijaan do auso koovion mantad diri Undang-undang Ugama do Joudi, om okonnoko majapo di janjiJo. Nga oinomodno sabap do i Kinoringan minangajanji om irino dii do pataakonJo diIbraim.
19Nong irad dino do onuan tokou do kovijaan mantad diri janji do Kinoringan, onuu dii tujuan diri Undang-undang Ugama do Joudi? Kapataakan nopo di Kinoringan diri Undang-undang Ugama supaya oilaan iri kasalaan tokou, om Undang-undang Ugama nopo diri nga obuli pakajon gosob do korikot i koturunan diIbraim, irino i Koristus i kinomoi diri janji. Om Undang-undang Ugama nopo diri nga pinolombus di tongomoloikat porikot si di Musa do isidono wakil do Kinoringan kumaa siri tongotulun Israil. 20Nga nong kivaro duvo tulun mangajanji, oporlu do kivaro wakil, nga i Kinoringan nopo nga sosoisoi i pinangajanji diIbraim.
Kogunaan do Undang-undang Ugama do Joudi
21Nong irad dino lumavan naku iri Undang-undang Ugama do Joudi diri janji do Kinoringan? Tantu aui. Do nong kivaro daa undang-undang do porikot di kovijaan do tulun, komoion nopo diri nga pakabanaron do Kinoringan iri tongotulun mantad di undang-undang diri. 22Nga natangarno siri Kitab do kasangkat do tulun nga irad do nouvung do duso sabap i gaagayajo do araat, om irad nopo diri isaai nopo aparsaya nga pataakon i nijanji mantad do Kinoringan sabap aparsaya di Yisus Koristus.
23Nga di aupo nokorikot i Koristus, iri parsayawon tokou, nga masi tokoupo do porintawon marong diri Undang-undang Ugama irad do nouvung siri jiil, gosob do nokointalang i Koristus. Om aparsaya tokou Disido ampa nogi kalabus tokou mantad si kuasa di Undang-undang Ugama do Joudi. 24Nong irad dino, iri nopo Undang-undang Ugama diri nga irad diri mangangajaga do tangaanak do monuduk daton#3:24 daton: ditokou gosob do korikot i Koristus, supaya pakabanaron tokou do Kinoringan sabap aparsaya tokou di Koristus. 25Nga maino nopo dii do nokorikotno i Koristus, iri nono parsayawon tokou, om okonno dii ko jagaan tokoupo diri Undang-undang Ugama do minonuduk daton.
Tongotangaanak do Kinoringan
26Om kasangkat tokou nga nosiliu tangaanak do Kinoringan om kopiiso tokou di Koristus Yisus sabap do naparsaya tokou Disido. 27Om kasangkat tokou nga binotisan#3:27 binotisan: binoptoisan saralom ngaran di Koristus, jadi irad do nakapanampakai tokou di Koristus, do tumimpuun tokou sumugut diri gaagaya Disido. 28Om ausono dii pisondiangan di tulun Joudi om i tulun di okonko bansa Joudi, om ausono dii pisondiangan do turipon om okonko turipon, om ausono dii pisondiangan do kusai om tongondu, do nokopiiso tokouno do miirad iri kaparsayaan tokou di Koristus Yisus. 29Nong i Koristusno sumanganu daton om itokouno iri irad di koturunan diIbraim, om songonuvon tokou onuu nopo i nijanji di Kinoringan.
Currently Selected:
Golotia 3: LabukPKV
Highlight
Share
Copy
Want to have your highlights saved across all your devices? Sign up or sign in
© 1995, Wycliffe Bible Translators, Inc. All rights reserved.
Golotia 3
3
Nitaak i Tatod do Kinoringan sabap Aparsaya Tokou
1Oou tongotulun do Golotia, obudu kouno dii. Mimang kivaro mongurik dino ginavo muju. Do i pogulu nakaarati kouno marong onuu nopo iri nitudukku dikovu pasal do kinapatajan di Yisus Koristus siri salib. 2Nga mokiilo oku dikovu diti, nong potingkuro kou nakaanu di Tatod do Kinoringan. Irino sabap do maja kou di Undang-undang Ugama do Joudi ko sabappo do minongkinongou om aparsaya kou di Abar do Aandai? Nga mimang nakaanu kou di Tatod do Kinoringan sabap do minongkinongou om aparsaya kou di Abar do Aandai. 3Mimang nolijot ino sinoromo muju. Nokotimpuun kouno maja di Koristus do mangaarap di Tatod do Kinoringan, nga maino andasan mujupo daa do obuli kou maja di gaagaya do tulun popotilombus dino kovijaan muju gosob do koovion. 4Oguuno najamanan muju sabap aparsaya kou di Abar do Aandai, om aui daa osia-sia i najamanan muju. 5Om mongoduat okupo dikovu kavagu: inonuan kou naku do Kinoringan di TatodJo om vinaalJo i kosunduvan sino dikovu sabap do maja kou di Undang-undang Ugama do Joudi ko sabap do aparsaya kou di Koristus? Nga mimang nonuan kou di Tatod do Kinoringan om vinaalJo i kosunduvan sino dikovu sabap do aparsaya kou di Koristus.
Pakabanaron iIbraim mantad di Kaparsayaanjo
6Irad nogi dino iIbraim, do kivaro tinangaran si Kitab do, “Aparsaya iIbraim do Kinoringan, om irino dii do anggapon isido do Kinoringan do tulun di abanar,” kadiri tangar si Kitab.#Antangai Kinovorunan 15:6. 7Na, ondomo mujuno dii do kasangkat tulun di aparsaya do Kinoringan om irino koturunan diIbraim. 8Om nipotulis di Kinoringan laid siri Kitab do natangar Disido irad diti ka, “Abanar i tongotulun di okonko bansa Joudi do mantad di kaparsayaan diolo di Kinoringan,” ka. Irino sabap do naabaran laaid do Kinoringan iIbraim di Abar do Aandai irad diti, “Abarakatan kasangkat i tongobansa siti vonuvo do mantad dikau,” ka.#Antangai Kinovorunan 12:3; 18:18; 22:18. 9Aparsaya gia iIbraim, irino kaanu-anu disido do barakat, om irad nogi dino kasaangkat di tongotulun vokon do aparsaya nga abarakatan irad diIbraim.
10Nga ovusung kasangkat i tulun do mangaarap do pakabanaron iolo sabap maja di Undang-undang Ugama do Joudi. Do kivaro tinangaran si Kitab do, “Pointikid di tulun di au rumalan maja kasangkat di tinulis siri buuk do Undang-undang Ugama do Joudi nga ovusung do Kinoringan,” ka.#Antangai Gulion 27:26. 11Om atarangno marong do ausoi tulun pakabanaron si di Kinoringan nong maja isido di Undang-undang Ugama do Joudi, do kadi si Kitab, “Iri nopo tulun do otulid i ginavo sabap aparsaya isido do Kinoringan nga kivaro kovijaan do auso koovion,” ka.#Antangai Abakuk 2:4. 12Nong maja i tulun di Undang-undang Ugama do Joudi om auno oporlupo isido do aparsaya do Kinoringan, do kivaro tinangaran si Kitab do irad diti, “Tulun di maja di Undang-undang Ugama do Joudi om ausono kosilapan, irino kaanu do kovijaan,” ka.#Antangai Imam 18:5.
13Nga i Koristusno minongolukat dagai tulun do Joudi do popoidu mantad di kovuvusung di Undang-undang Ugama do Joudi, om irino nosuat Isido diri kovuvusung sabap sinumuvoli dagai. Om irino do nokotulis si Kitab do ka, “Novusungno i tulun di pinogivis siri savat kaju!” ka.#Antangai Gulion 21:23. 14Om novusung nogi i Koristus supaya i tongotulun do okonko bansa Joudi nga onuan diri nibarakat do Kinoringan sabap kopiiso di Koristus Yisus, irad di barakat nitaak di Kinoringan diIbraim. Om irino supaya kaanu tokou di Tatod do Kinoringan i nijanji do Kinoringan sabap aparsaya tokou di Koristus.
I Undang-undang Ugama om i Nijanji
15Oou kosusuladanku, monuturan oku irad diri koubasanan tokou do tikid tadau, do irad di duvo tulun do mijanji. Sombia nopo do nosoinan diolo mongiduvo iri surat janji diri, om isaai nopo tulun nga auno buli mongimban ko mongoruangpo di janji diri. 16Nga kasangkat diri janji do Kinoringan nga irino iIbraim om i koturunanjo jinonjian. Nga komoion nopo do janjiJo diri do “i koturunannu,” ka nga irino i Koristus. Nga ausoi komi do i tongokoturunan, irad di oguu tulun komoionJo.#Antangai Kinovorunan 12:7; 13:15; 24:7. 17Komoionku nopo nga iri pinongojonjian do Kinoringan i natantu Disido mantad di pogulu. Nga iri nopo i Undang-undang Ugama iri nitaak di Kinoringan do apat naatus om tolu nopulu toun di tourino om aui obuli potingkod ko mongurang diri janji do Kinoringan mantad di pogulu. 18Do nong posongonuvon di Kinoringan do tulun i kovijaan do auso koovion mantad diri Undang-undang Ugama do Joudi, om okonnoko majapo di janjiJo. Nga oinomodno sabap do i Kinoringan minangajanji om irino dii do pataakonJo diIbraim.
19Nong irad dino do onuan tokou do kovijaan mantad diri janji do Kinoringan, onuu dii tujuan diri Undang-undang Ugama do Joudi? Kapataakan nopo di Kinoringan diri Undang-undang Ugama supaya oilaan iri kasalaan tokou, om Undang-undang Ugama nopo diri nga obuli pakajon gosob do korikot i koturunan diIbraim, irino i Koristus i kinomoi diri janji. Om Undang-undang Ugama nopo diri nga pinolombus di tongomoloikat porikot si di Musa do isidono wakil do Kinoringan kumaa siri tongotulun Israil. 20Nga nong kivaro duvo tulun mangajanji, oporlu do kivaro wakil, nga i Kinoringan nopo nga sosoisoi i pinangajanji diIbraim.
Kogunaan do Undang-undang Ugama do Joudi
21Nong irad dino lumavan naku iri Undang-undang Ugama do Joudi diri janji do Kinoringan? Tantu aui. Do nong kivaro daa undang-undang do porikot di kovijaan do tulun, komoion nopo diri nga pakabanaron do Kinoringan iri tongotulun mantad di undang-undang diri. 22Nga natangarno siri Kitab do kasangkat do tulun nga irad do nouvung do duso sabap i gaagayajo do araat, om irad nopo diri isaai nopo aparsaya nga pataakon i nijanji mantad do Kinoringan sabap aparsaya di Yisus Koristus.
23Nga di aupo nokorikot i Koristus, iri parsayawon tokou, nga masi tokoupo do porintawon marong diri Undang-undang Ugama irad do nouvung siri jiil, gosob do nokointalang i Koristus. Om aparsaya tokou Disido ampa nogi kalabus tokou mantad si kuasa di Undang-undang Ugama do Joudi. 24Nong irad dino, iri nopo Undang-undang Ugama diri nga irad diri mangangajaga do tangaanak do monuduk daton#3:24 daton: ditokou gosob do korikot i Koristus, supaya pakabanaron tokou do Kinoringan sabap aparsaya tokou di Koristus. 25Nga maino nopo dii do nokorikotno i Koristus, iri nono parsayawon tokou, om okonno dii ko jagaan tokoupo diri Undang-undang Ugama do minonuduk daton.
Tongotangaanak do Kinoringan
26Om kasangkat tokou nga nosiliu tangaanak do Kinoringan om kopiiso tokou di Koristus Yisus sabap do naparsaya tokou Disido. 27Om kasangkat tokou nga binotisan#3:27 binotisan: binoptoisan saralom ngaran di Koristus, jadi irad do nakapanampakai tokou di Koristus, do tumimpuun tokou sumugut diri gaagaya Disido. 28Om ausono dii pisondiangan di tulun Joudi om i tulun di okonko bansa Joudi, om ausono dii pisondiangan do turipon om okonko turipon, om ausono dii pisondiangan do kusai om tongondu, do nokopiiso tokouno do miirad iri kaparsayaan tokou di Koristus Yisus. 29Nong i Koristusno sumanganu daton om itokouno iri irad di koturunan diIbraim, om songonuvon tokou onuu nopo i nijanji di Kinoringan.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 1995, Wycliffe Bible Translators, Inc. All rights reserved.