Golotia 1

Salam di Poulus

1-2Kumaa si di kosusuladanku si di tongopoiuuntunan di tongotulun i aparsaya di Yisus sino Vonuvo Golotia.

Itino surat mantad dogo i Poulus do pokirimonku si dikovu, om kasangkat do kosuladan poimvaja dogo siti nogi nga pokirim salam dikovu. Ioku nopo diti nga linoou do sumiliu susuuon di Yisus. Nga okoniko tulun inontodon pangkatku diti om okoniko mantad tulun minamangkat dogo, nga irino i Yisus Koristus om i Kinoringan Tama iri minamangkat dogo. Om minomijau i Kinoringan i Tama di Yisus Koristus do mantad pialatan di tulun napatai.

3Mokianu oku di Kinoringan i Tama tokou om i Tuhan Yisus Koristus supaya opuavang#1:3 opuavang: aandai ginavo, obintaak om obintulung mamarakat dikovu om poposondod dino ginavo muju. 4I Yisus Koristus nopo nga tinumaak di kojuvanJo#1:4 kojuvan: tinan kondiri sabap do i duso tokou do popoidu daton#1:4 daton: ditokou mantad diti maso taraat do maja di kouvangan do Kinoringan i Tama tokou. 5Rojoon#1:5 Rojoon: Ompodon tokouno i Kinoringan gosob salaid-laid. Amin.

Sosoiso Abar do Aandai

6Osumboijan oku marong dikovu do oruai kou minogidu mantad si di Kinoringan, om minaja kou di sondiang ponudukan iri roitan do tulun do, “Abar do aandai,” kadiolo. Ombo bala iti do i Kinoringan minongoloou dikovu supaya aparsaya kou Disido sabap opuavang i Koristus dikovu. 7Nga oinomodno marong om okoniko Abar do Aandai iri do sosoiso iri Abar do Aandai, nga pinosondiang diri tulun iri Abar do Aandai pasal di Koristus supaya momoringou dikovu. 8Nga adapo om tulun vokon, insan ikoipo, ko moloikatpo kondiri mantad suruga, nong mangaabarno dikovu di sondiang ponudukan do mantad di Abar do Aandai di niabarja laid dikovu pun ovusungi. 9Nakatangar ikoi di pogulu om maino gulionkupo kavagu mitangar do ovusungno iri tulun mangaabar di ponudukan di okonko Abar do Aandai, iri ponudukan pinosondiang mantad diri rinamit muju mantad dagai.

10Do nong irad dino tangarku isai do kouvangan vojoonku, kouvangan do tulun ko kouvanganpo do Kinoringan? Nga irino kouvangan do Kinoringan iumonku do nong mokirajou oku do tulun nga okoniko turipon oku di Koristus.

Nopili di Kinoringan i Poulus do Susuuon di Yisus

11Oou kosusuladanku, popoilo oku dikovu do iri nopo Abar do Aandai nituturanku dikovu om okoniko vinaal-vaal toomod do tulun. 12Do okoniko mantad do tulun kinoilaanku om ausoi tulun do minonuduk dogo nga pinointalang di Yisus Koristus kondiri iri Abar do Aandai siri dogo.

13Oilaan okui dikovu do araat i gaagayaku di ogiat okupo maja di ugama Joudi di pogulu, do okonko aalang-alang oku pokoruol di poiuuntunan di tongotulun i aparsaya di Kinoringan gosob do gorovotonku daa iolo. 14Om iokuno i lobi oingod mantad di tulun diri miirad di umurku do maja di ugama Joudi, do sumabanar oku marong maja di adat di komuokijanja.

15Nga i Kinoringan nopo om minongoloou dogo sabap opuavang Isido dogo, om i sii okupo tijan diinoku om natantuno mantad do nopili oku Disido. 16Om irino kouvangan Disido do pinointalang i TanakJo i Yisus si dogo, supaya popintongkop oku pasal di TanakJo kumaa si di tongotulun di okonko bansa Joudi. Om ontok diri auso iso tulun do upakatonku, 17om mongoi oku sumamung di susuuon di Yisus i nokopogulu nosiliu do susuuon mantad dogo, i poingijon silo Bandar Yorusalim, nga okoniko do mokituduk oku diolo. Nga polombusanku nono mongoi silo Vonuvo Arab do piipiro linaid, om pogulianku nogi dino silo Bandar Damsik.

18Om katalibpo dii tolu toun om ongoi oku nogi dii silo Yorusalim do mintutun di Koipas#1:18 Koipas: Ngaran koduvo di Pitrus. gosob do duvo mingguku poirunggum disido siri valaijo. 19Nga ausoi vokon do susuuon di Yisus do nosomunganku nga irino i Yakub, iadiJo di Tuhan Yisus. 20Ombo nopo iti tinulisanku mimang oinomod si gotuvang di Kinoringan, okoniko vudutonku.

21Mantad diri om ongoi oku nogi dii silo Vonuvo Siria om Vonuvo Kilikia. 22Nga i tongopoiuuntunan di tulun do aparsaya di Koristus silo Vonuvo Yudia nga aupo kotutun dogo. 23Iti noo tinangaran norongou diolo pasal dogo do, “Iri nopo i Poulus di pinopokoruol daton#1:23 daton: ditokou di pogulupo, nga papaabarno dii maino do ponudukan pasal do aparsaya di Koristus, i nokinamanjo daa potingkod di pogulupo,” kadiolo. 24Om pangarajouno#1:24 pangarajou: pongompod dii iolo do Kinoringan do iokuno i kinoontodon diolo mangarajou.

Currently Selected:

Golotia 1: LabukPKV

Highlight

Copy