使徒行傳 21
21
保羅上耶路撒冷
1離別眾人了後，阮開船一直到哥士，隔日到羅底，對遐去帕大喇， 2佇遐抵著一隻欲過去腓尼基的船，阮就上船出發。 3阮來到看會著塞浦路斯的時，對南旁踅過，去敘利亞，佇泰爾落船，因為船欲佇遐落貨。 4阮尋著一寡門徒，佇遐及𪜶住七日。𪜶得著聖神的指示，勸保羅毋通上耶路撒冷。 5阮及𪜶離別的時間到就離開，繼續阮的路程。𪜶攏導𪜶的某子送阮到城外，佇海邊跪落去祈禱， 6互相相辭了後阮上船，𪜶倒去𪜶兜。
7阮繼續航程對泰爾去到多利買，佇遐給信徒請安，及𪜶住一日。 8隔日，阮出發去凱撒利亞，佇遐住佇傳福音的腓力的厝，伊是耶路撒冷彼七個執事的一個。 9伊有四個猶未結婚的查某子，攏做先知會講預言。 10阮住佇遐幾若日的中間，有一個先知叫做亞迦布對猶太落來。 11伊來尋阮，提保羅的腰帶縛家己的腳及手，講：「聖神按呢講：『此條腰帶的主人會佇耶路撒冷親像按呢互猶太人縛起來，然後交互外邦人。』」
12阮一下聽著，就及彼所在的人苦勸保羅毋通上耶路撒冷。 13保羅應講：「恁哪哭甲按呢，互我的心強欲碎去？我為著主耶穌的名，毋若佇耶路撒冷互人縛，甚至佇遐死嘛甘願。」
14伊毋受苦勸，阮就恬恬，只有講：「願主的旨意實現！」
15幾若日後，阮準備好勢，就上耶路撒冷。 16有一寡對凱撒利亞來的門徒嘛及阮去，導阮去塞浦路斯人拿孫的厝住；伊是早期的門徒。
保羅訪問雅各
17阮到耶路撒冷的時，信徒熱誠接待阮。 18隔日，保羅及阮去訪問雅各；教會的眾長老攏佇遐。 19保羅給𪜶請安，然後將上帝通過伊佇外邦人的中間所做的工作一項一項對𪜶報告。 20𪜶聽了攏歸榮光互上帝，對保羅講：「兄弟，你知，佇遮有幾若萬猶太人成做信徒，𪜶攏熱心遵守律法。 21𪜶有聽著你教示住佇外邦的猶太人，叫𪜶放棄摩西的律法，毋免給𪜶的囝仔行割禮，嘛毋免守猶太人的風俗習慣。 22𪜶一定會聽著你來遮的消息，按呢欲按怎？ 23今著照阮給你講的去做。遮有四個下願的查甫人； 24你導𪜶做夥去參加潔淨禮，替𪜶納所費，互𪜶通剃頭。你按呢做，眾人就知，𪜶所聽著關係你的事毋是事實，閣知你家己嘛有啲遵守摩西的律法。 25不過對已經做信徒的外邦人，阮已經有寫批給𪜶講，阮有裁決叫𪜶毋通食祭偶像的物、血，及捏死的牲生，嘛毋通有淫亂。」
26隔日，保羅導彼四個查甫人及𪜶做夥去參加潔淨禮，然後入去聖殿報告潔淨禮什麼時滿，通為著𪜶逐個人獻祭物。
保羅佇聖殿受掠
27七日的期啲欲滿的時，一寡對亞細亞來的猶太人有看著保羅佇聖殿內，就煽動群眾掠保羅， 28喝講：「以色列人，來鬥相共一下！此個人逐所在教人反對以色列人及摩西的律法，嘛反對此個聖殿。現在伊閣敢導希臘人進入聖殿，污染此個神聖的所在。」 29因為𪜶有看著以弗所人特羅非摩及保羅做夥佇城內，想講保羅有導伊入去聖殿。
30全城擾亂起來，民眾攏走倚來；𪜶掠保羅，給伊拖出去聖殿的外面，殿的門隨時關起來。 31𪜶抵想欲刣保羅的時，有消息傳到羅馬軍營的指揮官遐，講全耶路撒冷啲起擾亂。 32指揮官隨時帶兵及軍官走到民眾遐。民眾一下看著指揮官及兵就停手，無閣拍保羅。 33指揮官倚去掠保羅，叫人用兩條鐵鍊給伊鍊啲，閣問伊是啥人，有做什麼代誌。 34群眾一個喝一款，因為亂操操，指揮官無法度通知實情，就命令兵押保羅入去營房。 35保羅啲欲𬦰砛仔的時，因為群眾雄介介，兵煞著給保羅扛入去。 36群眾隨佇後面喝講：「互伊死！」
保羅為家己辯護
37 保羅抵欲互人押入去營房的時對指揮官講：「我會當給你講一句話𣍐？」指揮官問講：「你識希臘語噢！ 38按呢你就毋是彼個無久以前造反，導四千個殺手走去曠野的埃及人囉。」
39 保羅應講：「我是猶太人，出世佇基利家的大數，是一個不止有名的城市的市民。請你准我對民眾講話。」
40指揮官允准，保羅就徛佇砛仔頂對民眾比手勢。眾人攏恬落去，保羅就用希伯來話對𪜶講話。
Currently Selected:
使徒行傳 21: TTVH
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2021
使徒行傳 21
21
保羅上耶路撒冷
1離別眾人了後，阮開船一直到哥士，隔日到羅底，對遐去帕大喇， 2佇遐抵著一隻欲過去腓尼基的船，阮就上船出發。 3阮來到看會著塞浦路斯的時，對南旁踅過，去敘利亞，佇泰爾落船，因為船欲佇遐落貨。 4阮尋著一寡門徒，佇遐及𪜶住七日。𪜶得著聖神的指示，勸保羅毋通上耶路撒冷。 5阮及𪜶離別的時間到就離開，繼續阮的路程。𪜶攏導𪜶的某子送阮到城外，佇海邊跪落去祈禱， 6互相相辭了後阮上船，𪜶倒去𪜶兜。
7阮繼續航程對泰爾去到多利買，佇遐給信徒請安，及𪜶住一日。 8隔日，阮出發去凱撒利亞，佇遐住佇傳福音的腓力的厝，伊是耶路撒冷彼七個執事的一個。 9伊有四個猶未結婚的查某子，攏做先知會講預言。 10阮住佇遐幾若日的中間，有一個先知叫做亞迦布對猶太落來。 11伊來尋阮，提保羅的腰帶縛家己的腳及手，講：「聖神按呢講：『此條腰帶的主人會佇耶路撒冷親像按呢互猶太人縛起來，然後交互外邦人。』」
12阮一下聽著，就及彼所在的人苦勸保羅毋通上耶路撒冷。 13保羅應講：「恁哪哭甲按呢，互我的心強欲碎去？我為著主耶穌的名，毋若佇耶路撒冷互人縛，甚至佇遐死嘛甘願。」
14伊毋受苦勸，阮就恬恬，只有講：「願主的旨意實現！」
15幾若日後，阮準備好勢，就上耶路撒冷。 16有一寡對凱撒利亞來的門徒嘛及阮去，導阮去塞浦路斯人拿孫的厝住；伊是早期的門徒。
保羅訪問雅各
17阮到耶路撒冷的時，信徒熱誠接待阮。 18隔日，保羅及阮去訪問雅各；教會的眾長老攏佇遐。 19保羅給𪜶請安，然後將上帝通過伊佇外邦人的中間所做的工作一項一項對𪜶報告。 20𪜶聽了攏歸榮光互上帝，對保羅講：「兄弟，你知，佇遮有幾若萬猶太人成做信徒，𪜶攏熱心遵守律法。 21𪜶有聽著你教示住佇外邦的猶太人，叫𪜶放棄摩西的律法，毋免給𪜶的囝仔行割禮，嘛毋免守猶太人的風俗習慣。 22𪜶一定會聽著你來遮的消息，按呢欲按怎？ 23今著照阮給你講的去做。遮有四個下願的查甫人； 24你導𪜶做夥去參加潔淨禮，替𪜶納所費，互𪜶通剃頭。你按呢做，眾人就知，𪜶所聽著關係你的事毋是事實，閣知你家己嘛有啲遵守摩西的律法。 25不過對已經做信徒的外邦人，阮已經有寫批給𪜶講，阮有裁決叫𪜶毋通食祭偶像的物、血，及捏死的牲生，嘛毋通有淫亂。」
26隔日，保羅導彼四個查甫人及𪜶做夥去參加潔淨禮，然後入去聖殿報告潔淨禮什麼時滿，通為著𪜶逐個人獻祭物。
保羅佇聖殿受掠
27七日的期啲欲滿的時，一寡對亞細亞來的猶太人有看著保羅佇聖殿內，就煽動群眾掠保羅， 28喝講：「以色列人，來鬥相共一下！此個人逐所在教人反對以色列人及摩西的律法，嘛反對此個聖殿。現在伊閣敢導希臘人進入聖殿，污染此個神聖的所在。」 29因為𪜶有看著以弗所人特羅非摩及保羅做夥佇城內，想講保羅有導伊入去聖殿。
30全城擾亂起來，民眾攏走倚來；𪜶掠保羅，給伊拖出去聖殿的外面，殿的門隨時關起來。 31𪜶抵想欲刣保羅的時，有消息傳到羅馬軍營的指揮官遐，講全耶路撒冷啲起擾亂。 32指揮官隨時帶兵及軍官走到民眾遐。民眾一下看著指揮官及兵就停手，無閣拍保羅。 33指揮官倚去掠保羅，叫人用兩條鐵鍊給伊鍊啲，閣問伊是啥人，有做什麼代誌。 34群眾一個喝一款，因為亂操操，指揮官無法度通知實情，就命令兵押保羅入去營房。 35保羅啲欲𬦰砛仔的時，因為群眾雄介介，兵煞著給保羅扛入去。 36群眾隨佇後面喝講：「互伊死！」
保羅為家己辯護
37 保羅抵欲互人押入去營房的時對指揮官講：「我會當給你講一句話𣍐？」指揮官問講：「你識希臘語噢！ 38按呢你就毋是彼個無久以前造反，導四千個殺手走去曠野的埃及人囉。」
39 保羅應講：「我是猶太人，出世佇基利家的大數，是一個不止有名的城市的市民。請你准我對民眾講話。」
40指揮官允准，保羅就徛佇砛仔頂對民眾比手勢。眾人攏恬落去，保羅就用希伯來話對𪜶講話。
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2021