Ruma 15
15
1Ay itam tiba, dewa tam inyamag te, masine tuwa katanya fag fagbulun, roro lag tam igfagbulun nu anway igfabiyatan tam iba at yud katvngvd antam nu gamatangan. Lag tam sigad gfaning tam fakaumsigun mandi. 2Tam fagfaningun, antuwa tam iba at fakaumsigun. Fagbuluni tuwa at masine sa tam iba, laman ro katvngvd tuwa tam iba nu gafanud sa tam Fun Isus.
3Faningi tuwa kata tam Fun Isus at nafagbulun. Kanya di nafaning at fakaumsigun mandi. Dewa te, gafalingunan dawdaw, nafaning tuwa tam Diyus fasadan. Ay katanya tam Isus nadalan, kata yangay sik taw tagfaning Diyus at nadalan ebi ebi. Sa sik afud tam Diyus fanlongan, tumap tam kanya fag taw longan, te, “At ngay taw ayuwayu igfalingun tam Diyus. Ay anggan aw, igfaning aktuway tam Diyus, gafalingunan kyangay.”#15:3 Danyu 69:9 Katanya ebi kanya fag taw at nadalan. Ay anggan tam Fun Isus, katanya yangay.
4Fagayu at marirukan si tam Diyus fanlongan, e fagafoyungun tuwa sa antam. Kanya wan tagfoyung antam nu gsungatanan, ay tagfatvngvd tam amatanganan. Ay at fanambagun katanya at fagafoyungun antam, laman kaugat tuwa nu antam igfanseg, te, tam Diyus fagurungan wa ban fiya at ngay longan.
5Tam Diyus wan tagfon antam tam fagmaasungatanun ay tagfatvngvd tam amatanganan. Nu katanya, katsi igdarangin aw sa anya, te laman kanya igfaugat tuwa nu kadkafanyuwan am, kata tam Fun Isus nu kafanyu antam. 6Teway nu katvngvd anya tuwa nu kadkafanyuwan am, masadi tuwa ay amatanganan. Ay tarabangan tuwam igfauseganan tam Diyus, tam Fun Isus at Tama.
Faningi Tam Fun Isus Ugali nu Gfaudgufudan Tam Tam Iba
7Nu katanya katsi, faningi tam Fun Isus ugali. Kanya ebi, magup tuwa dawdaw sa antam. Ay katsi itam, magupi yangay sa tam ngay iba, teway katanya wan at sadik faran nu gfauseganan tam tam Diyus.
8Ku ngay fadugsay, glong aw ayu te, ebi tam Fun Isus, nanansungatan tuwa nananfagurungan at Tama fatuyanan sas taw Udyu. Fakatanyaun at nafagbulun, laman fasaful sas taw Udyu te, tam Diyus di gfanlamangan. Katanya tam Fun Isus nu kafanyu taw Udyu. 9Ay katanya tam Fun Isus nafagbulun, inke fanambagun yangay sas taw yud Udyu. Teway tam Fun Isus ebi gina igfagurungan at Tama fatuyanan, nananfadasug yangay tam Diyus at fakafanyuun sas taw yud Udyu. Ay katsi sik ngay taw yud Udyu guseganan wa ayuwayu tam Diyus at fakafanyuun. Nu katanya, katsi tam nalag, dewa taw Udyu ay dewa taw yud Udyu, tam Fun Isus infanyu tuwa fagayu. Ay nu katanya, dewa tam sadsamanan ayuwayu, magupi tuwa sa tam iba.
Ay nu tumap tam si tam Diyus ngaba fanlongan, lumag tam te, tam Diyus kaumsig tuwa glag taw Udyu ay taw yud Udyu nu gtarabangan tuwa igfauseganan anya.
At sadi tam tapan, igfoyung antam sik taw Udyu at longan sas Diyus. Glong unu te, “Em Diyus, nanfauseganan ban aw emu sis wa taw yud Udyu. Ay ginanya ban dumanyu aw sik danyu.”#15:9 2 Samwel 22:50; Danyu 18:49
10Ay at sadi yak tapan siginan tam Diyus fanlongan, iglong te, “Am fag ngay taw yud Udyu, useganani yangay fasfuwani taw Udyu.”
11Ay sa tibak afud, e tapan yangay tam taglong te, “Fagayu am taw yud Udyu, fauseganani tuwa tam Fun.”#15:11 Danyu 117:1
12Ay sa sik afud Isayas rirukan, e tapan tam te, “Umsure wa ban Dabid Fufu sat dagat daga. Ay kanya wa ban tagmagurang sas fagayu fulan taw. Ay anggan ban taw yud Udyu nu gfanseg, sanya yangay fag Fun.”#15:12 Isayas 11:10
Katanya tam nalag siginan tam Diyus fanlongan. Ay kanya fagayu igfoyung antam te, tam Diyus kaumsig tuwa glag taw Udyu ay taw yud Udyu nu gtarabangan tuwa igfauseganan anya.
13Ay katsi igdarangin aw ayu, am fagayu tagafanud sa tam Isus. Igdarangin aw ayu sa tam Diyus, teway kanya wan tagfatvngvd tam amatanganan, laman igfanseg tuwa tam sat ngay fatuyanan. Igdarangin aw te, laman kanya igfaugat tuwa nu guseganan am, ay igfanabayan yangay ayu, laman kaugat yay nu gfanseg am sat ngay fatuyanan. Ay at Masine fag Falad wan tagfaamatanganan ayu, laman matvngvd tuwa nu gfanseg am, te, tam Diyus fagurungan wa ban fiya at ngay fatuyanan sa antam.
Pablu at Fagnaawatun at Rirukan sas Taw Ruma
14Ku ngay fadugsay, intuyan aw te, masine wa long ay ugali. Ay intuyan kyangay te, ngayu wan ay nasaful sa baliwa tam Diyus at ngay foyungan. Ay mafafoyung wam sa ay iba. 15Ay dewa katanya naawat aw tuy ku rirukan ababa, ay nafalongun akwan tibak lungud. Saful kwa te, saful wa ro am, ku ngay foyungan iste fag rirukan, ay dewa katanya nalong akyay laman ban gamatang tuwam gugat.
Ay ku fagnaawatun tuy ku rirukan sa ayu, teway igfaning aw tam Diyus at nafon angku ku fagbulun. 16Sik tagfoyung aw tam Fun Isus sa sangay taw yud Udyu. Ay katanya ku fagbulun nu kafafaskudanan, kata taw Udyu nu gfon at famanyun sas Diyus. Teway tam Diyus ebi e filian tuwa sik ngay taw Udyu tagfagbulun at fagbulun, tagfon tiba famanyun sas Diyus. Ay katanya yangay ku fagbulun katsi. Tam Diyus akyangay at filian, tagfagbulun at fagbulun. Anway te, angku ku famanyun sas Diyus, antuwa sik ngay taw yud Udyu at nafanud sa ku foyungan. Ay tam Diyus guseganan tuwa nu nalag kanya fag ngay taw, teway tam Diyus nu glag, at Masine fag Falad nafasine wan kanya fag ngay taw.
17-18Katanya nu gfagbulun aw Diyus fagbulun. Nu katanya, kadaragang aw. Ay dewa aw kadaragang katanya, dakdi gamatangan te, ku nafagbulun mandi. Roro ngap tam Fun Isus tuwa tagfagbulun. Kanya tuwa at ke fagbulun si angku, laman taw yud Udyu sumaful tuwa igfaning Diyus. Madyay tam Fun Isus tuwa tagfaleleganan angku ay tagfon angku ku foyungan. 19Ay kanya yangay tagsugu at Masine fag Falad, laman at Masine fag Falad igfon angku fagmadaragangun. Ay nu katanya mafafagbulun aw sik ngay fagbulun iglabi taw fagmafabulun, laman at ngay taw nu nalag, umtuyan te, ku ngay foyungan siginan wa fiya tam Diyus.
Nu katanya, igfoyung kwa fiya at Masine fag Barita. Ay katsi, ngayayu wa sirut ku nadasug, nu kamoyung aw gugat. At sadik fungfung, fulan Erusalem, ay at sadik fungfung, talun Ilirikum. Sad buknga nafamoyung kwan. 20Ay ebi ginan ngaro ku fakaumsigun nu kamoyung aw, sa tuwa sik ngay talun at yud yay batang e kamoyung, laman aw yay at nafasigad nu kamoyung sanya. 21Igfaning aw tam tapan sa sik afud tam Diyus fanlongan, taglong te, “Dewa te, katsi at ngay taw ya gsaful sa tam Diyus baliwa, bandi ban sumaful yadi. Ay dewa te, ya batang gdungug, bandi ban dumungug tuwa.”#15:21 Isayas 52:15 Katanya ku fagbulun. Igfoyung aw sat yud batang gdungug.
Pablu nu Gfoyung at ngay Fasadanan
22-23Ku ngay fadugsay, katsi glong aw te, ebi ginan kaumsig kwa glo sanya sa ayu. Anway te, kwa gugat maatunglus, teway ngayu yay ku fagbulun iste. Ay roro katsi, e nafoyung tuwa, iste fag ngay talun fagayu. Nu katanya intabu wan iste ku fagbulun. 24Ay ku fasadan katsi, lumo kwan, nangadasug sas talun Ispanya. Ay gina ban aw glo, nandalan kyay ayu sanyas Ruma, laman anyay tam nangudgufudan sik kadugayun. Ay nu ntabu wa ban sanya nu antam naladlagan sirut, fatunglus kyay sa ku fagyadasugun fag talun. Ay nu masine di sa ayu, ginanya ban foni tuwa angku ku nayudanan, laman maadasug aktuwa sanya fag talun.
25-26Ay katsi kya maatunglus daw sanya sa ayu, teway e fagbulun kyay sadi iste. Tam ngay fadugsay stes talun Akaya nadungug te, katsi tibak tagafanud sis fulan Erusalem, igbiya at nayudanan. Ay anggan at fataban fag talun, talun Masidunya, nadungug yangay. Nu katanya, tam ngay fadugsay iste fag duwak talun nadiyuganan te, “Nantarabang yay tam.” Ay katsi ngani, nafaful wan at fantarabang. Ay nanfosuk yay ami kanya fag fantarabang sas fulan Erusalem.
27Tam ngay fadugsay iste fag duwak talun, masine dawdaw at nafagbulun. Dewa te, iste fag duwak talun, sik ngay taw yud Udyu ayuwayu, kaumsig tuwa gtarabang at ngay fadugsay taw Udyu. Ay katanya at nafagbulun, kata tuwa igsali at bedan sas taw Udyu. Teway siginans taw Udyu nu kafasigad ebi ataw at Masine fag Barita. Ay katsi taw Udyu nafadasug wan sas taw yud Udyu Masine fag Barita. Ay taw yud Udyu nu gafanud tuwa, tam Diyus at ngay famanyun sas taw Udyu, igdasug yangay sas taw yud Udyu. Nu katanya, katsi, taw yud Udyu nu gfon at famanyun sas taw Udyu, kata at fansali at nadasugan anya tam Diyus famanyun.
28Ay gina long ban intabu nu gfosuk ami kanya fag famanyun sas Erusalem, lumo kwa fiya sanya sa ayu. Ay sanya ginan lumo kyay fiya, sas talun Ispanya. 29Ay igsaful aw te, gina ban tam naladlagan, tam Fun Isus igfauseganan ban dawdaw antam fagayu.
30Ku ngay fadugsay, get aw sa ayu te, darangini tuwa dawdaw angku sa tam Diyus, teway itam fagayu tam Fun Isus watam at taw, ay si wa antam at Masine fag Falad, tagfoyung antam nu kadkafanyuwan.
31Nu katanya, darangini tuwa, laman ban gina ami glo sas Erusalem baliwa, laman ban tam Diyus igdingding tuwa emi siginan sangay taw sanya fag talun at yud gafanud sa tam Fun Isus. Ay darangini yangay te, laman ban tam Diyus at ngay taw sis Erusalem kaumsig tuwa igbul em ubanan fag famanyun sa anya. 32Ay nu katanya tuwa ban, guseganan kwa long nanlag ayu sanya, sas Ruma, tam Diyus nu kaumsig. Ay nu naladlagan watam, fatvngvd wa long ban am ku amatanganan.
33Tam Diyus wan tagufud ayu ay tagfanabayan ayu. Kin, katanyai tuwa.
Currently Selected:
Ruma 15: TAWEAST
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
Ruma 15
15
1Ay itam tiba, dewa tam inyamag te, masine tuwa katanya fag fagbulun, roro lag tam igfagbulun nu anway igfabiyatan tam iba at yud katvngvd antam nu gamatangan. Lag tam sigad gfaning tam fakaumsigun mandi. 2Tam fagfaningun, antuwa tam iba at fakaumsigun. Fagbuluni tuwa at masine sa tam iba, laman ro katvngvd tuwa tam iba nu gafanud sa tam Fun Isus.
3Faningi tuwa kata tam Fun Isus at nafagbulun. Kanya di nafaning at fakaumsigun mandi. Dewa te, gafalingunan dawdaw, nafaning tuwa tam Diyus fasadan. Ay katanya tam Isus nadalan, kata yangay sik taw tagfaning Diyus at nadalan ebi ebi. Sa sik afud tam Diyus fanlongan, tumap tam kanya fag taw longan, te, “At ngay taw ayuwayu igfalingun tam Diyus. Ay anggan aw, igfaning aktuway tam Diyus, gafalingunan kyangay.”#15:3 Danyu 69:9 Katanya ebi kanya fag taw at nadalan. Ay anggan tam Fun Isus, katanya yangay.
4Fagayu at marirukan si tam Diyus fanlongan, e fagafoyungun tuwa sa antam. Kanya wan tagfoyung antam nu gsungatanan, ay tagfatvngvd tam amatanganan. Ay at fanambagun katanya at fagafoyungun antam, laman kaugat tuwa nu antam igfanseg, te, tam Diyus fagurungan wa ban fiya at ngay longan.
5Tam Diyus wan tagfon antam tam fagmaasungatanun ay tagfatvngvd tam amatanganan. Nu katanya, katsi igdarangin aw sa anya, te laman kanya igfaugat tuwa nu kadkafanyuwan am, kata tam Fun Isus nu kafanyu antam. 6Teway nu katvngvd anya tuwa nu kadkafanyuwan am, masadi tuwa ay amatanganan. Ay tarabangan tuwam igfauseganan tam Diyus, tam Fun Isus at Tama.
Faningi Tam Fun Isus Ugali nu Gfaudgufudan Tam Tam Iba
7Nu katanya katsi, faningi tam Fun Isus ugali. Kanya ebi, magup tuwa dawdaw sa antam. Ay katsi itam, magupi yangay sa tam ngay iba, teway katanya wan at sadik faran nu gfauseganan tam tam Diyus.
8Ku ngay fadugsay, glong aw ayu te, ebi tam Fun Isus, nanansungatan tuwa nananfagurungan at Tama fatuyanan sas taw Udyu. Fakatanyaun at nafagbulun, laman fasaful sas taw Udyu te, tam Diyus di gfanlamangan. Katanya tam Fun Isus nu kafanyu taw Udyu. 9Ay katanya tam Fun Isus nafagbulun, inke fanambagun yangay sas taw yud Udyu. Teway tam Fun Isus ebi gina igfagurungan at Tama fatuyanan, nananfadasug yangay tam Diyus at fakafanyuun sas taw yud Udyu. Ay katsi sik ngay taw yud Udyu guseganan wa ayuwayu tam Diyus at fakafanyuun. Nu katanya, katsi tam nalag, dewa taw Udyu ay dewa taw yud Udyu, tam Fun Isus infanyu tuwa fagayu. Ay nu katanya, dewa tam sadsamanan ayuwayu, magupi tuwa sa tam iba.
Ay nu tumap tam si tam Diyus ngaba fanlongan, lumag tam te, tam Diyus kaumsig tuwa glag taw Udyu ay taw yud Udyu nu gtarabangan tuwa igfauseganan anya.
At sadi tam tapan, igfoyung antam sik taw Udyu at longan sas Diyus. Glong unu te, “Em Diyus, nanfauseganan ban aw emu sis wa taw yud Udyu. Ay ginanya ban dumanyu aw sik danyu.”#15:9 2 Samwel 22:50; Danyu 18:49
10Ay at sadi yak tapan siginan tam Diyus fanlongan, iglong te, “Am fag ngay taw yud Udyu, useganani yangay fasfuwani taw Udyu.”
11Ay sa tibak afud, e tapan yangay tam taglong te, “Fagayu am taw yud Udyu, fauseganani tuwa tam Fun.”#15:11 Danyu 117:1
12Ay sa sik afud Isayas rirukan, e tapan tam te, “Umsure wa ban Dabid Fufu sat dagat daga. Ay kanya wa ban tagmagurang sas fagayu fulan taw. Ay anggan ban taw yud Udyu nu gfanseg, sanya yangay fag Fun.”#15:12 Isayas 11:10
Katanya tam nalag siginan tam Diyus fanlongan. Ay kanya fagayu igfoyung antam te, tam Diyus kaumsig tuwa glag taw Udyu ay taw yud Udyu nu gtarabangan tuwa igfauseganan anya.
13Ay katsi igdarangin aw ayu, am fagayu tagafanud sa tam Isus. Igdarangin aw ayu sa tam Diyus, teway kanya wan tagfatvngvd tam amatanganan, laman igfanseg tuwa tam sat ngay fatuyanan. Igdarangin aw te, laman kanya igfaugat tuwa nu guseganan am, ay igfanabayan yangay ayu, laman kaugat yay nu gfanseg am sat ngay fatuyanan. Ay at Masine fag Falad wan tagfaamatanganan ayu, laman matvngvd tuwa nu gfanseg am, te, tam Diyus fagurungan wa ban fiya at ngay fatuyanan sa antam.
Pablu at Fagnaawatun at Rirukan sas Taw Ruma
14Ku ngay fadugsay, intuyan aw te, masine wa long ay ugali. Ay intuyan kyangay te, ngayu wan ay nasaful sa baliwa tam Diyus at ngay foyungan. Ay mafafoyung wam sa ay iba. 15Ay dewa katanya naawat aw tuy ku rirukan ababa, ay nafalongun akwan tibak lungud. Saful kwa te, saful wa ro am, ku ngay foyungan iste fag rirukan, ay dewa katanya nalong akyay laman ban gamatang tuwam gugat.
Ay ku fagnaawatun tuy ku rirukan sa ayu, teway igfaning aw tam Diyus at nafon angku ku fagbulun. 16Sik tagfoyung aw tam Fun Isus sa sangay taw yud Udyu. Ay katanya ku fagbulun nu kafafaskudanan, kata taw Udyu nu gfon at famanyun sas Diyus. Teway tam Diyus ebi e filian tuwa sik ngay taw Udyu tagfagbulun at fagbulun, tagfon tiba famanyun sas Diyus. Ay katanya yangay ku fagbulun katsi. Tam Diyus akyangay at filian, tagfagbulun at fagbulun. Anway te, angku ku famanyun sas Diyus, antuwa sik ngay taw yud Udyu at nafanud sa ku foyungan. Ay tam Diyus guseganan tuwa nu nalag kanya fag ngay taw, teway tam Diyus nu glag, at Masine fag Falad nafasine wan kanya fag ngay taw.
17-18Katanya nu gfagbulun aw Diyus fagbulun. Nu katanya, kadaragang aw. Ay dewa aw kadaragang katanya, dakdi gamatangan te, ku nafagbulun mandi. Roro ngap tam Fun Isus tuwa tagfagbulun. Kanya tuwa at ke fagbulun si angku, laman taw yud Udyu sumaful tuwa igfaning Diyus. Madyay tam Fun Isus tuwa tagfaleleganan angku ay tagfon angku ku foyungan. 19Ay kanya yangay tagsugu at Masine fag Falad, laman at Masine fag Falad igfon angku fagmadaragangun. Ay nu katanya mafafagbulun aw sik ngay fagbulun iglabi taw fagmafabulun, laman at ngay taw nu nalag, umtuyan te, ku ngay foyungan siginan wa fiya tam Diyus.
Nu katanya, igfoyung kwa fiya at Masine fag Barita. Ay katsi, ngayayu wa sirut ku nadasug, nu kamoyung aw gugat. At sadik fungfung, fulan Erusalem, ay at sadik fungfung, talun Ilirikum. Sad buknga nafamoyung kwan. 20Ay ebi ginan ngaro ku fakaumsigun nu kamoyung aw, sa tuwa sik ngay talun at yud yay batang e kamoyung, laman aw yay at nafasigad nu kamoyung sanya. 21Igfaning aw tam tapan sa sik afud tam Diyus fanlongan, taglong te, “Dewa te, katsi at ngay taw ya gsaful sa tam Diyus baliwa, bandi ban sumaful yadi. Ay dewa te, ya batang gdungug, bandi ban dumungug tuwa.”#15:21 Isayas 52:15 Katanya ku fagbulun. Igfoyung aw sat yud batang gdungug.
Pablu nu Gfoyung at ngay Fasadanan
22-23Ku ngay fadugsay, katsi glong aw te, ebi ginan kaumsig kwa glo sanya sa ayu. Anway te, kwa gugat maatunglus, teway ngayu yay ku fagbulun iste. Ay roro katsi, e nafoyung tuwa, iste fag ngay talun fagayu. Nu katanya intabu wan iste ku fagbulun. 24Ay ku fasadan katsi, lumo kwan, nangadasug sas talun Ispanya. Ay gina ban aw glo, nandalan kyay ayu sanyas Ruma, laman anyay tam nangudgufudan sik kadugayun. Ay nu ntabu wa ban sanya nu antam naladlagan sirut, fatunglus kyay sa ku fagyadasugun fag talun. Ay nu masine di sa ayu, ginanya ban foni tuwa angku ku nayudanan, laman maadasug aktuwa sanya fag talun.
25-26Ay katsi kya maatunglus daw sanya sa ayu, teway e fagbulun kyay sadi iste. Tam ngay fadugsay stes talun Akaya nadungug te, katsi tibak tagafanud sis fulan Erusalem, igbiya at nayudanan. Ay anggan at fataban fag talun, talun Masidunya, nadungug yangay. Nu katanya, tam ngay fadugsay iste fag duwak talun nadiyuganan te, “Nantarabang yay tam.” Ay katsi ngani, nafaful wan at fantarabang. Ay nanfosuk yay ami kanya fag fantarabang sas fulan Erusalem.
27Tam ngay fadugsay iste fag duwak talun, masine dawdaw at nafagbulun. Dewa te, iste fag duwak talun, sik ngay taw yud Udyu ayuwayu, kaumsig tuwa gtarabang at ngay fadugsay taw Udyu. Ay katanya at nafagbulun, kata tuwa igsali at bedan sas taw Udyu. Teway siginans taw Udyu nu kafasigad ebi ataw at Masine fag Barita. Ay katsi taw Udyu nafadasug wan sas taw yud Udyu Masine fag Barita. Ay taw yud Udyu nu gafanud tuwa, tam Diyus at ngay famanyun sas taw Udyu, igdasug yangay sas taw yud Udyu. Nu katanya, katsi, taw yud Udyu nu gfon at famanyun sas taw Udyu, kata at fansali at nadasugan anya tam Diyus famanyun.
28Ay gina long ban intabu nu gfosuk ami kanya fag famanyun sas Erusalem, lumo kwa fiya sanya sa ayu. Ay sanya ginan lumo kyay fiya, sas talun Ispanya. 29Ay igsaful aw te, gina ban tam naladlagan, tam Fun Isus igfauseganan ban dawdaw antam fagayu.
30Ku ngay fadugsay, get aw sa ayu te, darangini tuwa dawdaw angku sa tam Diyus, teway itam fagayu tam Fun Isus watam at taw, ay si wa antam at Masine fag Falad, tagfoyung antam nu kadkafanyuwan.
31Nu katanya, darangini tuwa, laman ban gina ami glo sas Erusalem baliwa, laman ban tam Diyus igdingding tuwa emi siginan sangay taw sanya fag talun at yud gafanud sa tam Fun Isus. Ay darangini yangay te, laman ban tam Diyus at ngay taw sis Erusalem kaumsig tuwa igbul em ubanan fag famanyun sa anya. 32Ay nu katanya tuwa ban, guseganan kwa long nanlag ayu sanya, sas Ruma, tam Diyus nu kaumsig. Ay nu naladlagan watam, fatvngvd wa long ban am ku amatanganan.
33Tam Diyus wan tagufud ayu ay tagfanabayan ayu. Kin, katanyai tuwa.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines