प्रेरितान कामे 25

फेस्तुसान होम्बुर

1फेस्त ता प्रान्तामाय पोचणेबाद तीन दिहा बादमाय कैसरिया फायरीन यरूशलेम हा गीयो 2तेवी मुख्य याजक एने यहूदी माणहान प्रमुख तान ओगांण पौलुसा विनंती केरील; 3एने ताह विनंती केरीन तान विरोधामाय हे ईच्छाने, कि तो ताह यरूशलेम माय हादील, कारण कि ते ताह वाटेमायबी मारीन टाकणेन घात केरतीन एता. 4फेस्तूस ने उत्तर आपील, “पौलुस कैसरिया माय, एने मी स्वताह जेल्दी ताहारी जाईल.” 5ओवतो कियील, “तुम्रेमाय जो अधिकार मेलतेन तास हेरी चालणे, एने केध्दीह आवो, माणहान काही अनुचित काम किरील हि तर तापोर दोष लावा.” 6तामाय कूण आठ दहा दिह रेयीन तो कैसरियाला निकलू गीयो एने दिहीरा एक दिह न्याय आसनापोर बोहीन पौलुसाह दिहरी जातीन आज्ञा आपील. 7ताहेरया तो आवा तेवी ते यहूदी यरूशलेम माय आवा एता, तास जवळपास उबरीयेल रेयीन तां पोर जादा इही कठीण इही आरोप लागाडील, ज्यान प्रेमान ते आपुह शकत एता. 8पुण पौलुसुसाने उत्तर आपील, “मी जे नापून यहूदी व्यवस्था एने नाहं मंदिरान, एने नाहं कैसराच्या विरुद्धामाय काल्ल्हा अपराध किरील हि?” 9तेवी फेस्तान यहूदी माणहाह आनंद केरणेन केरता इच्छासे पौलुसाह कियील, काय तू ईच्छातो हि कि यरूशलेमेन जा एने ताहारी मार ओगाण तारो हा मुकदमो निश्चित किरील जाऊ.

पौलुसान कैसर से विनता

10पौलुसुसाने केदा, मी कैसरान न्याय आसनासमोर उबरील हि मारो मुकदमो हा कैसारला एणेन जुवी जोहलो कि तू हाजो रीतीमाय ओलखणेस, कि यहूद्यांन मी काही अपराध किरील नाहं. 11केध्दीह मी अपराधी हि एने मारीन टाकील जाणे योग्य कालो काम किरील हि तर मारणेन नाहं अन्याय पुण ज्या वातून हा मारपुर दोष लागाळ हि केध्दीह तामायवाला कूण पुण हि वात खेरो ठेरणार नाहं, तर कूण माहु तान आथाम होपहू शकत नाहं मी कैसराची न्याय आपतेन हि. 12तेवी फेस्तान मसलत लीन सभा हादील एने ज्याह वातू केयीन उत्तर आपील, तुमूह कैसरचा न्याय मांगील हि, तू कैसराउखेर जाही.

अग्निप्पान होम्बुर पौलुस

13काही दिह निवरणेओवतो अग्निप्पा राजा एने बर्निकाने कैसरीयामाय आवीन फेस्तूस माय भेट आपील. 14ताह जादा दिह ताहारी रेणेनओवतो फेस्तराने पौलुसुसान विषयाम राजाह कियील, एक माणुह हि ताह फेलिक्स बोन्दिखाणामाय सोडीन गीयो हि. 15ताहेरया मी यरूशलेम माय एता तेवी मुख्य याजक एने यहूदी डाय डाया तान न्यायाधीशाउगी ईच्छाएनिका तापोर दण्डाज्ञा आपील जाणे. 16पुण मी ताह उतार आपील कि रोमियांची हि रीत नाहं कि काल्लोबी माणुह दण्डाला होपीन आपुतेव्ही ताहवोर गुनोरेचनारो एने आरोपी ओगाण ओगाण उबरीयेल रेयीन मुद्दो लीन दोबान उत्तर आपतेन नाहं. 17सेवट जे न्या एक्ठाच एईन तेवी काय मी काही टाइम नाहं लागडेल पुण दिहरान एक दिह न्याय आसनापोर बोहीन ता माणहाह लावणेन आज्ञा आपील. 18ताहेरया तान वाडी उबरीयेल रेणा तेवी तास अनुचित वातून दोष लागाडील नाहं जोहलो मी होमजाडणे एतो. 19पुण ते आपणो मताफाय यीशु नाव कायताहा माणहान विषय माय जो मारीन गीयो एतो एने पौलुसुसाने जीवतालू देखाडील एता विवाद केरतीन एता. 20मी चौकशीतमाय एतो, कि आवो वातून पोचील कोहलो लागाडूज्यानकेरता मी ताह फुसील, काय तू यरूशलेमेन जाही कि ताहारी आवो वातून निर्णय होवो. 21पुण ताहेरया पौलुसुसाने न्याय आपील कि तान मुकदमान निर्णय महाराजाधिराज ज्ञान न्या होवो ताहारी मी हि आज्ञा आपील कि जो ताहवोर ताह कैसरीयाम मोकलतालु नाहताह कैदीम मेलठोन. 22तेवी अग्निप्पा फेस्तूसाह कियील, मी पुण ता माणाहान होमलूह इच्छितो तान कियील, तू हेकाले होयलू ले. 23सेवट दिहरेदीह ताहेरया अग्निप्पा एने बर्निका मोठली धुमधामसे आवा एने पलटणान सरदार एने नगर ने प्रमुख माणहाहे-या दरबारामाय पोचेल तेवी फेस्तुसान आज्ञा आपील कि ते पौलुसाह लीन आवु. 24फेस्तुसान कियील, “हे राजा अग्निप्पा, एने हे आखा माणहा, जो आमरा न्या हेरी हि, तुमूह आवो माणहेच देखताला ज्यान विषयातमाय आखा यहूदयान यरूशलेम माय एने ईहे पुण आयडीन आयडीन विनंती केरील कि ज्यान जीवतालू रेणे उचित नाहं. 25पुण मी ओलखिन लीईल कि तान इही काही किरील नाहं कि ताह मारीन टाकील जाऊ; कि ताहेरया तान स्वताह च हा महाराजाधीराजाने न्याय आपील तेवी मी ताह मोकलणेन निर्णय किरील.” 26मी तान विषय माय काल्लीज निश्चित वात देखील नाह का आपणो स्वामी आहने लिखू जानकेरता मी ताह तुम्राओगाण एने विशेष केरीन राजा अग्निप्पा, तारो ओगाण लावील हि कि चौकशी केरणेन ओवतो माहु काही लेखणेन जूळनू. 27काहाकाय कि बोन्दि हि मोकलने एने जे दोष तापोर लागाडील गीया तास नाहं केणेन, माहु वाया जान पुळील.

Currently Selected:

प्रेरितान कामे 25: NLXNT

Highlight

Copy

Compare