Nahúm 1
1
Dios ya ya'be spacol Nínive
1Ha sc'op-jalwanej ta stojol Nínive. Te libro yu'un te snahalsit Nahúm te talem ta Elcos.
2Te Jehová, ha Dios te ay xut'et yo'tan
soc te ya yac' spacol;
te Jehová ya ya'be spacol
soc ay bayel yilimba;
ya ya'be spacol te mach'atic ya xcontrahinot yu'un
soc ya yilintay te scontrataque.
3Te Jehová ma orahuc ya x'ilin soc ay bayel yu'el,
ma ba ya yal te mayuc smul te mach'a ay smule.
Te Jehová ya xbehen ta yic'al-ha'al soc ta sutu-ic',
soc te tocaletic ha ts'u'lum ta yoc.
4Ya yut te mar, ya yac' taquijuc,
ya yac' taquijuc spisil te muc'ul-ha'etic.
Te Basán soc te Carmelo ya xuch'ub,
soc ya xluhbaj te nichim yu'un Líbano.
5Ya xnihquic te witsiltic ta stojol,
soc te tsehletic ya x'uhlic.
Te lumq'uinal ya syuc' sba ta stojol,
te bahlumilal soc spisil mach'atic nahinemic tey a.
6¿Mach'a ya xcuhch yu'un te yilimba?
¿Mach'a ya xhu' ya stehc'an sba
ta stojol te sc'ahc'al yilimbahe?
Te yilimba hich ya xmahl cohel te bin ut'il c'ahc',
soc ya xwuy te tontiquil ta stojol.
7Te Jehová lec yo'tan,
ha tulan ahnibal ta yorahil wocol;
ya scanantay te mach'atic ha smuc'ulinej yo'tanique.
8Pero hich te bin ut'il snojel ha'
ya slajinlan te mach'atic ya xcontrahinot yu'un,
ha ya snuts bahel ta yihc'al q'uinal te scontrataque.
9¿Bin a te yac anopic ta scontrahinel te Jehová?
¡Jc'axel ya slajin;
ma ba cheb buelta ya ya'be spacol te scontratac!
10Hich ya xc'ohtic te bin ut'il ch'ixetic te sts'otoj sbahic,
soc ts'ajal ta syacubelic,
ya xlajic ta c'ahc' hich te bin ut'il taquin ha'mal.
11Ha'at Nínive, loc' tal ta atojol
te mach'a la schap bin chopol ta scontrahinel te Jehová,
ha jtuhl chopol j'ac'-o'tanil.
12Hich yaloj te Jehová:
Aunque tulanic te asiriahetic soc bayelic,
ya me yich'ic bulel soc ya xch'ayic bahel.
La jcac' c'axuc awocol, Judá,
pero ma ba ya caq'uix xan awocol.
13Ya jwuybat te yugo acuchoj
soc ya jtuch'bat achucojibal, xchi.
14Te Jehová la yalbat ac'oblal, Nínive,
ma ba ya xna'botix abihil.
Ta templo yu'un te dios awu'un
ya jinticlan te bin lop'taybil
soc te loc'omba pasbil ta uhltesbil taq'uin,
tey ya jpasbat amuquel a,
como ihlaybilat.
La yich' halel ya yich' lajinel Nínive
15¡Ilawil, tey ta sba witsiltic
ay te yoc te mach'a ya yich' tal te lec yach'il c'op,
te ya yalbe sc'oblal te lamal q'uinale!
Pasa te q'uinetic awu'un, Judá,
c'ohtesa ta pasel te bintic awaloj ta jamal,
como mayuquix bin ora ya yochintayat
te mach'a chopol yo'tan;
jc'axel la yich'ix lajinel.
Currently Selected:
Nahúm 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.