Ester 1
1
Vasti ma ba ya sch'uhumbe smandar ajwalil Asuero
1Ta yorahil te Asuero, ha te Asuero te la scuentahin c'alal India ha to ta Etiopía, huqueb shucwinic (127) ta sehp q'uinal, 2ta hich ora, yich'ojix yip ta ajwalil a te Asuero ta shuctajib ta Susa, te capital yu'un ban c'alal scuentahinej. 3Ta yoxebal ha'bil yochel ta ajwalil a la spasbe q'uin spisil te príncipaletic yu'un soc te mach'atic ay ya'telic; soc tey nix ay a te jtsobaw-soldadohetic yu'un Persia soc Media, te gobernadoretic soc príncipaletic yu'un jujusehp q'uinal, 4scuenta yu'un ta balunwinic (180) c'ahc'al ya ya'be yilic te c'ax bayel sc'ulejal ban c'alal scuentahinej, soc te yutsil soc smuc'ul yip ta ajwalil.
5C'alal c'ax yorahil te q'uine, te ajwalil la spas yan q'uin huqueb c'ahc'al ta yamaq'uil te ts'umbil nichimaltic ta sna ajwalil; te q'uin ha yu'un spisil te pueblo, muc' biq'uit, te ayic ta Susa te capital. 6Te amac' yich'oj ch'alel ta sac soc yaxal lino, jipajtic ta sacal lino soc chi'in-yaxal pac' te jipajtic ta xotbil plata te chucticlambil ta oyetic pasbilic ta mármol-ton. Te huctajibaletic pasbilic ta oro soc ta plata, te piso yich'oj limbeyel ta pórfido, mármol, alabastro, soc yantic t'ujbil tonetic. 7Uch'ic ta vasohetic pasticlambil ta oro, yan yilel te jujun vaso, soc bayel vino yu'un te ajwalil la yuch'ic, hich te bin ut'il yutsil yo'tan te ajwalil. 8Pero halbil ta mandar te mayuc mach'a sujbil ta yuch'el, yu'un te ajwalil hich yalbeyejix ta mandar spisil te mach'atic ya scuentahinic te sna: ha chican bin ya sc'an ya spasic jujutuhl.
9Ha nix hich te ajwalil-ants Vasti la spasbe sq'uin te antsetic te ay ta sna te ajwalil Asuero.
10Ta shuquebal c'ahc'al, te c'alal tse'el yo'tan a te ajwalil ta scaj te vino, la sticon bahel te Mehumán, Bizta, Harbona, Bigta, Abagta, Zetar soc te Carcas, huqueb eunuco-winiquetic te ayic ta a'batinel yu'un te ajwalil Asuero, 11yu'un ya yiq'uic talel ta stojol te ajwalil te ajwalil-ants Vasti soc te corona yu'un, scuenta yu'un ya yac' ta ilel st'ujbilal ta stojol te ants-winiquetic soc te príncipaletic, como mero t'ujbil. 12Pero te ajwalil-ants Vasti ma ba la sc'an la sch'uhumbe smandar te ajwalil te la yich' halbeyel yu'un te eunucohetique. Bayel ilin yu'un te ajwalil, c'ax c'ahc'ub yu'un. 13La sjoc'obe te mach'atic ya sna'ic ta lec te leyetic,#1.13 te leyetic: Ya yal ta hebreo: bin ut'il ay te tiempohetic, como hich c'ahyem ta spasel te ajwalil te ya sjoc'obe spisil te mach'atic ya sna'ic te leyetic soc te bin stojil ta pasel. 14Te mach'atic te mero nopol soc te ajwalil, ha te Carsena, Setar, Admata, Tarsis, Meres, Marsena soc Memucán, huqueb príncipaletic yu'un Persia soc yu'un Media, ha'ic te j'ac'-o'taniletic yu'un te ajwalil soc ha toyol ya'telic ta stojol te nación. 15Te ajwalil la sjoc'obeyic: ¿Bin ya yal te ley te ya sc'an pasel ta stojol te ajwalil-ants Vasti, te bin ut'il ma ba la sch'uhumbe smandar te ajwalil te c'alal ic'ot tal yu'un te eunucohetique? xchi.
16Hich la yal te Memucán ta stojol te ajwalil soc te príncipaletic: Te ajwalil-ants Vasti ma ha'uc nax stahoj smul ta stojol te ajwalil, ha nix hich stahoj smul ta stojol spisil te príncipaletic soc spisil mach'atic ayic ta spisil ta sehp q'uinal yu'un te ajwalil Asuero. 17Como te bin la spas te ajwalil-ants ya me ya'iyic spisil te antsetic, hich ya spehc'ambe sc'oblal te smamalalique; hich me ya yalic: Te ajwalil Asuero la sticon ta iq'uel tal ta stojol te ajwalil-ants Vasti pero ma ba tal, xchihic. 18Ha yu'un te antsetic ta Persia soc ta Media te ya ya'iyic te bin la spas te ajwalil-ants Vasti, hich ni me ya yalbeyic spisil te príncipaletic yu'un te ajwalil; ha ya yac' chicnajuc bayel peq'uel c'oblalil soc ilimba. 19Teme lec ya ya'iy te ajwalil, ac'a yal mandar scuenta ajwalil te ya yich' ts'ihbayel ta leyetic yu'un Persia soc Media scuenta yu'un ma ba ya yich' c'axuntayel a, te hich ya yal: Te Vasti ma me ayuquix bin ora ya xtal xan ta stojol te ajwalil Asuero, xchi. Te ajwalil ac'a yotses yan ajwalil-ants te c'ax lec xan a. 20Te bin ya yal ta mandar te ajwalil ya me yich' a'iyel ta ban c'alal scuentahinej, aunque c'ax muc', hich spisil te antsetic ya me yich'ic ta muc' te smamalalic, pajal te mach'a muc' sc'oblal soc peq'uel sc'oblal, xchi.
21Lec la ya'iyic te ajwalil soc te príncipaletic; ha yu'un te ajwalil hich la spas te bin la yal te Memucán. 22La sticonlan cartahetic ta spisil ta jsehp q'uinal te ban c'alal scuentahinej, ta jujuchahp ts'ihbajel yu'unic soc sc'opic. La yal te spisil te winiquetic ac'a spasic tulan mandar ta snahic, soc te hich me ya yich' puhquel bahel ta sc'op te pueblo yu'une.
Currently Selected:
Ester 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.