Deuteronomio 1
1
Moisés ya ya'be xan sna' Israel bin yaloj Dios ta Horeb
1Ha te c'opetic te la yal Moisés ta stojol spisil Israel ta jochol taquin q'uinal ta jehch muc'ul-ha' Jordán, ta Arabá, te snuhp'usitayej sba soc Suf, te j'ohlil ay yu'un Parán soc Tofel, Labán, Hazerot soc Dizahab. 2Ta be te ya xc'ax ta wits Seir ay bulucheb (11) c'ahc'al ta behentayel c'alal Horeb c'alal ta Cades-barnea.
3Ta cha'winic (40) ha'bil, ta sba c'ahc'alil yu'un te sbuluchebal (11) u, te Moisés la yalbe ya'iyic te snich'nab Israel spisil te bintic halbot yu'un Jehová; 4ha te c'alal tsalbilix a te Sehón ajwalil yu'un te amorreohetic, te nahinem ta Hesbón, soc te Og ajwalil yu'un Basán, te nahinem ta Astarot ta Edrei. 5Ta stojol banti ya xloc' tal c'ahc'al yu'un te Jordán, ta sq'uinal Moab, te Moisés hahch ta yalbeyel sc'oblal te mandariletic ini:
6Te Jehová te Dios cu'untic, hich la yalbotic ta Horeb: Bayelix tiempo te li' ayex ta wits ini. 7Bahanic ta witsiltic yu'un te amorreohetic soc spisil te q'uinaletic ta sjoyobal, ta Arabá, ta witsiltic, ta spamlejetic, ta Neguev, ta sti'il mar, ta sq'uinal te cananeohetic soc ta Líbano, c'alal ta muc'ul-ha' Éufrates. 8Ilawil, la jca'beyex te q'uinale; ochanic, u'untayahic te q'uinal te jc'axel la yal ta jamal te Jehová te ya ya'be te ame'atatic, ha te Abraham, Isaac soc Jacob, soc te patil al-nich'anetic yu'unique, xchi.
La yich' ya'tel juecetic
9Ta hich ora hich la jcalbeyex: Ma xhu' te jtuquel ya jcuentahinex. 10Te Jehová te Dios awu'unic la sp'oltesexix hich yipal te bin ut'il eq'uetic ayic ta ch'ulchan. 11¡Te Jehová, te Dios yu'un te ame'atatic, ac'a p'ohluquex mil buelta xan a te bin ut'il ayex ta ora ini, soc ac'a ya'beyex bendición hich te bin ut'il yaloj! 12¿Bin ut'il ya xhu' cu'un te jtuquel ya jcuchbeyex awocolic, awihcatsic soc te c'opetic awu'unique? 13Tsahahic loq'uel ta awohlilic, ta jujuchahp awu'unic, winiquetic te ay sp'ijilic, te ya sna'ic q'uinal soc te ay snopojibal yu'unic, scuenta yu'un ya ca'be ya'telic ta jcuentahinwanej awu'unic, xchihon.
14Hich la ajac'bonic te jc'ope: Buen lec ta pasel te bin yac awale, xchihex.
15Ha yu'un la jquic' te príncipaletic ta jujuchahp awu'unic, ha te winiquetic te ay sp'ijilic soc te ay snopojibal yu'unic, la jca'be ya'telic ta jcuentahinwanej ta atojolic, ha jcuentahinwanejetic yu'un lajunwinic yoxbahc' (1,000), yu'un ho'winic (100), yu'un lajuneb yoxwinic (50), soc yu'un lajuntuhl (10), soc jtsobawetic yu'un jujuchahp awu'unic. 16Soc hich la jcalbe mandar te juecetic awu'unic: Ya me awa'iyic te c'op ay ta yohlil te awermanotac, stojil me xachahpanic te winic soc yermano, o soc jyanlum. 17Ma me tsahbiluc awu'unic te mach'a ya xtal ta chahpanel, pajal me xawa'iybeyic sc'op te mach'a peq'uel soc te mach'a muc' sc'oblal. Ma me ayuc mach'a yac axi'ic, como ha yu'un Dios te chahpanele. Te c'op te chuhcul yac awa'iyic ya me awich'ic tal ta jtojol, ho'on ya chahpan, xchihon.
18Ta hich ora la jcalbeyex spisil te bintic la sc'an yac apasique.
Ya'tel lahchaytuhl jtsahtaywanejetic
19Loc'otic tal ta Horeb, la jbehentaytic spisil te xiweltic sba muc'ul jochol taquin q'uinal te awilojic, ta sbehlal te witsiltic yu'un amorreohetic, hich te bin ut'il la spasotic ta mandar te Jehová te Dios cu'untic, hich c'ohotic ta Cades-barnea. 20Hich la jcalbeyex: Hulemex tal ta witsiltic yu'un te amorreohetic, ha te ya ya'botic te Jehová te Dios cu'untique. 21Ilawil, te Jehová te Dios awu'un, la ya'batix te q'uinale. Bahan, u'untaya, hich te bin ut'il la yalbat te Jehová te Dios yu'un te ame'atatique; ma me xiwat soc ma me xpehc'aj awo'tan, xchihon. 22Pero ta apisilic hich tal awalbonic: Ha lec ya jticontic bahel winiquetic te ya xbaht yilic tal te q'uinale. Te c'alal ya suhtic tal ya yalbotic banti behil ya sc'an ya xbohotic soc bin yilel te pueblohetic te banti ya xc'ohotic, xchihex.
23Lec la jca'iy te bin la awalic. Hich la jtsa lahchaytuhl winiquetic ta awohlilic, jujutuhl ta jujuchahp. 24Te winiquetic loq'uic bahel, mohic bahel ta witsiltic, c'ohtic ta spamlej yu'un Escol, la stsahtayic te q'uinale. 25La stulbeyic sit te awal-ts'unubil yu'un te q'uinale, la yich'botic tal soc hich la yalbotic: Mero lequil q'uinal te ya ya'botic te Jehová te Dios cu'untic, xchihic. 26Pero ma ba la ac'anic te mohex bahel, la atoy abahic ta stojol te smandar Jehová te Dios awu'unic. 27Hahchex ta wulajanel ta anahilpaq'uic, hich la awalic: Ya yilintayotic te Jehová, ha scuentahil te la sloq'uesotic tal ta sq'uinal Egipto yu'un ya yac'otic ta sc'ab te amorreohetic, hich ya slajinotic. 28¿Banti ya xbohotic? Te quermanotactic la spehc'ambotic co'tantic c'alal la yalic: Te ants-winiquetic ini ha muc' xan soc naht xan a te bin ut'il te ho'otique; ha muq'uic te pueblohetic yu'unic soc ay sts'ahculetic c'alal ta ch'ulchan; soc la jquilcotic te sts'umbal Anac, xchihex.
29Ha yu'un la jcalbeyex: Ma xiwex, ma me xaxi'ic. 30Te Jehová te Dios awu'unic, ha te mach'a ya xnahilij bahel awu'unic, ya me yac' guerra ta acuentahic, hich te bin ut'il spisil te bintic la spas ta acuentahic ta Egipto te la awilique. 31Ta jochol taquin q'uinal awilojic te Jehová te Dios awu'unic te la spetex tal, hich te bin ut'il jtuhl winic ya spet snich'an, ta spisil te be banti behenemex ha to c'alal hulex tal ta lugar ini, xchihon. 32Pero aunque hich ay, ma ba la ach'uhunic te Jehová te Dios awu'unic, 33te mach'a nahilij bahel awu'unic ta be ta scuenta c'ahc' ta ahc'abal soc ta tocal ta c'ahc'alel, yu'un ya ya'beyex awilic te banti ya xbehenex soc banti yac apas acampamentohic.
Dios la ya'be castigo Israel
34Te c'alal la ya'iybeyex ac'opic te Jehová, ilin yu'un soc jc'axel la yal ta jamal: 35Ni jtuhluc winic yu'un ha'i chopol jcaj ts'umbalil ini ya xc'oht yil te lequil q'uinal te jc'axel la jcal ta jamal te ya ca'be te ame'atatique; 36ha nax te Caleb snich'an Jefone ya me yil stuquel, soc ya ca'be soc snich'nab te q'uinal te banti behen, como jun yo'tan la st'un bahel te Jehová, xchi.
37Soc te Jehová ilin ta jtojol ta acuentahic, hich la yalbon: Ha nix hichat ma ba ya x'ochat tey a. 38Te Josué snich'an Nun, te mach'a yac yac'bel sba ta a'batinel awu'un, ha ya x'och stuquel. A'beya yip yo'tan, como ha me ya ya'be yich' te q'uinal te Israel. 39Soc te alaletic awu'unic, te la awalic te ya me yich'ic tsaquel bahel, te alaletic awu'unic te ma to sna'ic stsahtayel te bin lec soc te bin ma lecuc, ha te ya x'ochic tey a; ya ca'beyic soc ha ya yich'ic. 40Yan te ha'exe, suhtanic bahel, bahanic ta jochol taquin q'uinal ta sbehlal te Mar Rojo, xchi.
Tsalot Israel ta Horma
41Ha yu'un hich la awalbonic: La jta jmulcotic ta stojol Jehová. Ya xbohotcotic, ya cac'cotic guerra, hich te bin ut'il spisil smandar la ya'botcotic te Jehová te Dios cu'untic, xchihex. Hich jujutuhlex la atsaquic te awa'tejibic yu'un guerra, la acuyic te ma ba wocol ya xmohex bahel ta witsiltic. 42Pero la yalbon te Jehová: Halbeya: Ma me xbahex soc ma me xawaq'uic guerra, como ma ba ayon ta awohlilic; scuenta yu'un ma ba ya stsalex a te acontrahique, xchi.
43Hich la jcalbeyex, pero ma ba la awa'iybonic te jc'ope; la atoy abahic ta sc'axuntaybeyel te smandar Jehová, mohex bahel ta scuenta atoybahilic ta witsiltic. 44Pero loq'uic tal stahex te amorreohetic te nahinemic tey ta witsiltic, la snutsex bahel hich te bin ut'il ya spas xux, la stsalex bahel ta Seir c'alal ta Horma. 45Hich suhtex tal, la awoq'uetay abahic ta stojol Jehová, pero ma ba la ya'iybeyex ac'opic, ma ba la sts'ehchiquintayex. 46Ha scuentahil te bayel c'ahc'al hilex ta Cades.
Currently Selected:
Deuteronomio 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.