Amós 1
1
Castigo ta stojol te nacionetic
1Ha sc'op Amós, jtuhl jcanan-tuminchij ta Tecoa, te la yalbe sc'oblal te Israel ta yorahil Uzías ajwalil yu'un Judá, soc te Jeroboam snich'an Joás, ajwalil yu'un Israel, cheb ha'bil ma to xtal nihquel a. 2Hich la yal:
Ya x'awon Jehová c'alal ta Sión,
ya yac' ta a'iyel sc'op c'alal Jerusalén,
te aquiltic yu'un te jcanan-tuminchijetic ya xtaquij
soc ya xtaquij te ba wits Carmelo.
3Hich yaloj te Jehová:
Ta scuenta oxchahp mulil yu'un Damasco,
ta scuenta chanchahp,
ma ba ya jcom te castigo yu'une;
como la swuyticlanic te Galaad
ta swuyojibal pasbil ta hierro.
4Ya ca'be sc'ahc'al te sna Hazael,
ha ya slajinlan te tulan ts'ahquetic yu'un Ben-adad.
5Ya jwac'ticlambe sc'atal-te'el
te ochibaletic yu'un Damasco;
ya jlajinlan te mach'atic nahinemic
ta spamlej yu'un Avén,
soc te jcuentahinwanejetic yu'un Bet-edén;
soc te pueblo yu'un Siria
ya me yich'ic iq'uel bahel ta Kir, xchi te Jehová.
6Hich yaloj te Jehová:
Ta scuenta oxchahp mulil yu'un Gaza,
ta scuenta chanchahp,
ma ba ya jcom te castigo yu'une;
como la yic' bahel ta chuquel spisil te jun pueblo
yu'un ya ya'be ta sc'ab Edom.
7Ya ca'be sc'ahc'al te ts'ahquetic yu'un Gaza,
ha ya slajinlan te tulan ts'ahquetic yu'une.
8Ya jlajinlan te mach'atic nahinemic ta Asdod,
soc te jcuentahinwanejetic yu'un Ascalón;
ya cac' xan jc'ab ta scontrahinel Ecrón,
soc ya me xlaj te filisteohetic te cuxul hilemique.
9Hich yaloj te Jehová:
Ta scuenta oxchahp mulil yu'un Tiro,
ta scuenta chanchahp,
ma ba ya jcom te castigo yu'une;
como la yac' ta sc'ab Edom jun pueblo,
ma ba la yich' ta cuenta te chapbil-c'op
ta stojol mach'atic yermano sbahic.
10Ya ca'be sc'ahc'al te ts'ahc yu'un Tiro,
ha ya slajinlan te tulan ts'ahquetic yu'une.
11Hich yaloj te Jehová:
Ta scuenta oxchahp mulil yu'un Edom,
ta scuenta chanchahp,
ma ba ya jcom te castigo yu'une;
como la snuts bahel ta espada te yermano,
ma ba la yac' ta ilel sc'uxul yo'tan;
u'untaybil spisil ora yu'un te sc'ahc'al yo'tan,
stalel sq'uejoj yilimba.
12Ya ca'be sc'ahc'al te Temán,
ha ya slajinlan te tulan ts'ahquetic yu'un Bosra, xchi.
13Hich yaloj te Jehová:
Ta scuenta oxchahp mulil yu'un Amón,
ta scuenta chanchahp,
ma ba ya jcom te castigo yu'une;
como la sjambe sch'uht ta espada
te antsetic yu'un Galaad te swoloj yalic,
yu'un ya smuc'ubtes xan te sq'uinale.
14Ya ca'be sc'ahc'al te ts'ahc yu'un Rabá,
ha ya slajinlan te tulan ts'ahquetic yu'un,
soc xnilet ta yorahil guerra,
soc tulan ic' ta yorahil ic'al-ha'al.
15Te ajwalil yu'un ya x'ic'ot bahel ta chuquel,
soc spisil te príncipaletic yu'une, xchi te Jehová.
Currently Selected:
Amós 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.