Proverbs 8
8
De hagahi a de heiangi abodonu
1E aha, de heiangi e dee oo laa ma e hagaagahi?
De donu ange e dee oo mai laa?#Pro 1.20-21
2Ia e duu i honga denga mommee maolunga i gaogao de haiava,
i de mommee iai hesilihaginga o denga haiava,
3ma gaogao denga haitoga e ulu ai gi lo te aduhale,
ma de oo i gaogao denga haitoga:
4“Au e hagaagahi adu goodou, dangada alodahi,
gai agu muna ni muna ange gi dangada alodahi.
5De gau llodo ssenga, haia gi maanetonu goodou,
de gau ssenga, haia gi tonu ange goodou.
6Goodou hagalaangona, go hiidinga e hanu agu mee hagamogomogo e tala adu;
au e hhanga dogu ngudu e tala de mee heohi.
7Au e tala de muna abodonu i dono ngudu,
au e kino i de tala muna baubau.
8Muna alodahi aagu e tala e heohi,
e deai donu se muna dee heohi aabe se muna hhadu iai.
9Agu muna alodahi e molomolo ange gi gilaadeu e tonu ange,
gai e dee haisala donu ange gi dangada e iloo mee.
10Gaavee agu agoago, e dee go denga selevaa;
gaavee de heiangi, e dee go denga goolo danuaa.
11Go hiidinga de heiangi e danuaa ange i denga hadu hagamogomogo,
gai e deai donu se mee ange oou e lodo ai e maua de hagahedae ange aagena.
12Gai ogu dagodo, de heiangi, au e noho madali de donu ange,
gai de iloo mee ma de maanetonu e daakodo i ogu daha.
13De madagu i Tagi Maolunga e kino i de baubau;
au e kino i de hagamaolunga ma de lodo maolunga,
ma dahulinga baubau aama de hadu muna.
14Muna bale ma de heiangi abodonu e daakodo i ogu daha,
au e dahi ogu donu ange ma de mmahi.
15Go au, de heiangi o denga hodooligi e dagi ai,
gai denga dagi e hagatuu ai denga hainga heohi,
16go au, de heiangi, a denga dagi ma de gau aamua
e dagi ai i de heohi.
17Au e aloha i gilaadeu e aaloha i de au,
gai gilaadeu e hagammahi e saalaa au e gidee naa e gilaadeu au.
18De lava ma de hagadubu e daakodo i ogu daha,
ma de lava e dee odi aama de hagadagadaga age.
19Ogu hua e danuaa ange i denga goolo ma goolo hagamogomogo,
gai hua mai i ogu daha e danuaa ange i selevaa danuaa;
20au e seesee i de haiava o de heohi,
ma haiava o de hagamodu heohi,
21ma de bolo ange de lava gi gilaadeu e aaloha i de au,
ma de hhao gi hoohonu olaadeu mommee doange mee.
22 Tagi Maolunga ne hai au i taamada hugadoo o ana hegau,
gai go au aana ne hai i mua o ana hegau madagidagi loo.#Rev 3.14
23Madagidagi loo gai au gu dahi donu,
ma mai i taamada age, aama mai i mua de dahi o henua i lalo.
24De masavaa tigi ai se moana gelo, gai au gu dahi donu,
de masavaa tigi ai saalingaa vai lagolago iai vai.
25I mua de hagatuu age o denga mounga i olaadeu mommee,
i mua de hanu duuduu, gai au gu haanau;
26i mua dana hai henua i lalo ma denga duu malaelae i kilaa,
aabe go de mama o de gelegele o henua i lalo.
27Au gu noho donu i de masavaa aana ne hai ai de langi ga hagaduu i dono mommee,
ma de masavaa aana ne maaga ai luu baasi o de moana gelo;
28de masavaa aana ne hai ai denga giliiga i lo te langi,
ma de hagatuu ai denga dagelo o tai,
29ma de masavaa aana ne hagamodu ai de ngaadonga o tai,
gi dee hagahaisala ina ai e tai ana muna,
ma de masavaa aana ne hagailonga ai denga dagelo o henua i lalo.
30Gai au, de heiangi, se labagau e noho madali ia.
Au ne lodo danuaa i laangi alodahi,
ma de malangilangi i ono daha i masavaa alodahi,
31ma de malangilangi i henua i lalo alodahi aana ne hai,
ma de lodo danuaa i dangada.
32Deenei ai, agu dama, goodou hagalaangona agu muna;
e manuuia gilaadeu e daudali i ogu haiava.
33Nnoho mai hagalaangona agu agoago gi heiangi ai goodou,
goodou aude hagangadi mee ina.
34E manuuia tangada e hagalaangona agu muna,
ma de dagitilo i ogu haitoga,
ma de tali i ma togu haitoga.
35Go hiidinga be goai e gidee au e gidee de mouli,
gai Tagi Maolunga e abodonu ange gi de ia.
36Aagai be goai e dee gidee au e hagaduasala donu huu ia,
gai gilaadeu alodahi e kino i de au, e llodo donu i de magau.”
Currently Selected:
Proverbs 8: DBD
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.