Nahum 2
2
De oha o Nineveh
1Nineveh, tangada oohaa mee gu humai e hai baasi adu gi de goe.
Dagitilo i honga de buibui o de aduhale;
hagaloosia de haiava;
hagadaabena ina oodou goloa hebagi,
gai hagammahi ina goodou ma de lo taane!
2 Tagi Maolunga e hagaahe ange naa de mahamaha o Jacob
bei de mahamaha o Israel,
e dee galemu donu de gau e oohaa mee gu oha gilaau ma gu ngadi dagodo
gai gu hadihadi olaau laa.
3Denga mee hungihungi o ono daane hebagi e mmea;
denga daane hebagi e kahu i malo mmea.
Baalanga o denga hada hebagi e dabadaba mai
i de laangi olaadeu e hagadabena ai;
gai gilaadeu e aloalohagi alaadeu dao i lo te moana.
4Denga hada hebagi e hagakemo mai i honga haiava,
gai e saavini saele i lodo mommee malaelae.
Gilaadeu e bei de ula o denga lama;
gilaadeu e maalama bei denga uila.
5Ia e manadua naa ono daane hebagi dau;
gai gilaadeu e baakuu naa i delaadeu seesee e hulo.
Gilaadeu e hagamoolau e hulo gi de buibui,
gai de mee buibui gu lava i de hagaduu age.
6Denga haitoga o ssaalingaa vai gu maahuge
gai denga hale danuaa gu maoha.
7Dono hahine hodooligi#2.7 dono hahine hodooligi: muna Hebrew i kinei e dee iloo danuaa dono hagadoonunga. gu deai ono malo,
gai gu gaavee gee mai i de henua.
Ono haahine hai hegau gu gonogono
bei de koo o denga manu kono,
ma de hagailiili honga olaadeu hadahada.
8 Nineveh gu bei dagodo o de vai e vava laa,
ma gu odi vai i ono lodo.
Gilaadeu e hagataba, “De kaba! De kaba!”
aagai e deai donu dangada e huuhuli dua mai.
9Gaiaadia denga selevaa,
gaiaadia denga goolo!
E lagolago mmao ono goloa danuaa,
ma de lava i goloa hagamogomogo alodahi.
10Nineveh gu se ngadi aduhale,
gu maoha ma gu ngadi dagodo ai!
Dangada gu maatagu, gai olaadeu duli gu pole;
dangada alodahi gu manavasaa,
gai gu mada tea olaadeu mada!
11I hee iai de hale o denga laiono,
go de mommee alaadeu e haangai ai alaadeu dama,
gai go de mommee o de laiono daane ma de laiono hahine e hulo aagena,
madali denga dama, gai gilaadeu e dee maatagu?
12De laiono daane e oha kano e gaimee ai ana dama
gai gu daa dahi manu e gaimee ai de laiono hahine;
gai e hhao lo tono hale i manu aana ne daa ga maakau
gai e hhao ono haonga i manu aana ne mau.
13“Tilo, au e hai baasi adu gi de goe,
go Tagi o denga hagabuulinga hebagi e hagadaba.
Au e dudu naa oo hada hebagi,
gai au laiono mmahi e daa naa ga maakau i de gadilaasa.
Au e kave gee naa mee alodahi aau ne mau i henua i lalo.
Gai leo o oo dangada hagailoo
e deai naa donu dangada e langona.”
Currently Selected:
Nahum 2: DBD
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.