Rom munu 2
2
Kazambale éé we blé tegele
(BWgfz 12:14; Gal 6:7–8)
1Bɛwemalé, bii lé i mi bɛ ma we blé, dé i a miomian nya, ibozen dɔna ’ka lo; bii lé i mi bɛ ma we blé, bii, wo kɛlɛwe duoan bé kɛla loo? Amalé dé i mi bɛ ma we blé, ’té i we dɔa ibozen nwiin. 2Ko a gi dɔɔ léé, munu lé wo ke we ’ko zoɛnu kɛlɛna, Kazambale lé wolé we blele a webozen nya. 3Bii lé i bɛzowe kɛlɛmunu ma we blé, ’té i yee we duo kɛla, é a i gi léé, Kazambale ’ka dan ilé we ble lɛ loo? 4Taa, Kazambale lé fua lé é ke alé wezin koo, alé bli tiéé koo, alé ’wuo dɔle we wuo koo, wo nya, i wo yé fɛ boanu nya lɛɛ? I ’ka a gi dɔɔa léé, Kazambale lé wezin éé i bli nɔlaan Kazambale va loo? 5I tɔné gi plɛplɛ valé i bli lé é ’ka nɔlaan lo, wo nya lé i bliflile zun dɔa ibo ma, Kazambale blifliyi zé nya. ’Bɛ yi nya, Kazambale é dan élé weblele tegele nagɔɔn lɛ, 6yé é dan mi faa do do banwo lɛ wo kɛlɛwenu yɛrama; 7munu lé wo ke fuasan koo, tɔbɔle koo, vole é yuɛma koo, wo naginina yara pale wezin kɛlɛle ta nya bɛ, vole é yuɛma lé a glɛ ’ka lo, Kazambale a tadɔ wozé nya; 8naa, munu lé woo webozen lɛgaanma, ’té woo weple lɛdɔama zavɔle nya bɛ, é ’élé bli tɔntɔn valé ’élé bliflile tadɔ ’bɛnu zé nya. 9We tɔntɔn valé nyanéblele kaii é dan bɔ lɛ munu faa lé wo ke wenyané kɛlɛna, wo ma, é bɔa Juifinu ma é vinin, a zuo yé é bɔ Grɛkinu ma. 10Naa, fuasan koo, tɔbɔle koo, vole drɔɔ koo, é dan kɛlɛ lɛ miomian é ke wezin kɛlɛna, azé nya, Juifinu zé ɛ ke é vinin, a zuo Grɛkinu. 11Naa, Kazambale ’ka mi naginian é kɔlɛ ma lo.
12Munu faa lé wo wenyané kɛlɛ, ’té bélidɔwe ’ka tan bɔra lɛ wo va lo, wo dan ga lɛ yé wo ’ka dan wolé we ble lɛ bélidɔwe nya lo, yé munu faa lé wo wenyané kɛlɛ, ’té bélidɔwe a wo va, wo dan ga lɛ yé wo dan wolé we ble lɛ bélidɔwe yɛrama. 13É ’ka kɛlɛ lɛ léé, munu lé woo bélidɔwe maan, wo ɛ ke mi tegelenu nya Kazambale yuɛ gi lo, naa, munu lé woo a ta tawoo, wo ɛ lé we é dan kɛlɛ lɛ tegele. 14Bɛn bɛnu lé, bélidɔwe ’ka wo va lo, ’té woo bélidɔwe fewe kɛla ’woboan bɛ, woo lé bélidɔwe ’ka wo va lo, wa ’wobozen lé bélidɔwe nya; 15mi lé wekɛlɛbɛ lé bélidɔwe a fe, wa nagɔɔn‐an léé, wa dɔɔ ’woboan ’wo bli gi, wolé wevasibli ana we fé, ’té wo gi bɔrɔlenu éé we dɔa wo nwiin, ’té éé we sié wo nwiin é ke zuo é ke zuo. 16Yee ɛ dan bɔra lɛ yian nya lé Kazambale é dan munu lé kyeengiwenu ble lɛ Jézu nya anlé Wenéné yɛrama, a yi nya.
Juifinu valé bélidɔwe lé we lé
(Jér 8:8–9; Jak 4:16–17; Rom 14:13)
17Bii lé ibo laama Juifi bɛ, i pale a bélidɔwe ta, ’té ibo ze vɔa Kazambale tɔ gi; 18i alé blibɔmawe dɔɔ; i alé bélidɔwe dɔɔ amalé i bɔa we va sile lɛ; 19-20wedɔɔle valé webozen kɔlɛ lé ke bélidɔwe nya, é a i lee, amalé bii a ibo tɔ bɔna léé, bii a yuɛwiizannu lé zigɔɔnzan koo, gunuti vamunu lé kyɛsan koo, ’tugyɛzannu gi wepaazan koo, tanyilamunu zan koo, wo nya; 21bii lé i we paan mi bɛnu gi ’naan, i ’ka we paan ibozen gi loo? 22Bii lé i we fé léé, té wo kyeenwo lo ’naan, i ’ka kyeenwoo loo? Bii lé i léé, té wo le bɛ valé gɔné bɛ gini lo ’naan, i ’ka le bɛ ginian loo? Bii lé i miyilinu yé i yuɛ gi bo zo ’naan, i ’ka kyeenwoo wolé kɔnnu gi loo? 23Bii lé i bélidɔwe kɛlɛ i tɔbɔfɛ nya ’naan, i ’ka Kazambale tɔ sɛra bélidɔwe sɛrɛle nya loo? 24Naa, woo Kazambale tɔ sɔnɔan bɛn bɛnu méléna kalé we ma, fɛan zo lé é a é gyɛle sɛbɛ gi, a zo.
25Dé i bélidɔwe tawe kɛla, ’té ganedɔle tɔnɔ a, naa, dé i bélidɔwe sɛra, ’té é a bélé fɛan zo lé i gane ’ka é dɔle lo, a zo. 26Amalé, mi lé wo ’ka a gane dɔ lɛ lo, dé éé bélidɔwe tawe kɛla, ’bɛ ’ka bélé fɛan zo lé a gane a é dɔle loo? 27Mi lé wa yaa yé wo ’ka a gane dɔ lɛ lo, dé éé bélidɔwe lɛ sɔɔan, é ’ka we dɔa i nwiin loo? Bii lé, bélidɔwe sɛbɛ ke i lee, yé i gane a é dɔle, ’té i bélidɔwe sɛra duowo bɛ, é ’ka we dɔa i nwiin loo? 28Mi ’ka Juifi mi nya é kɔlɛ ma lo, yé ganedɔle ’ka fɛ lé wa yé mi kɔlɛ ma, a nya lo. 29Naa, mi a Juifi mi nya é bɔn gi, yé ganedɔle a we lé éé kɛla mi bli gi, a nya, léli yɛrama, é ’ka sɛbɛ yɛrama lo. Juifi mi ’ko tɔ zin fele ’ka sié munu va lo, éé sié Kazambale va.
Currently Selected:
Rom munu 2: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979