Gāluega 4
4
Ko Petelu ma Ioane i Mua o te Taupulega
1Koi tautatala atu ia Petelu ma Ioane ki tagata kae kua taunuku mai ni ohitāulaga,#4.1; ni ohitāulaga ko iētahi tuhituhiga e lea mai ni ohitāulaga pule te takitaki o nā leoleo o te Mālumalu, ma iētahi o te kau Hatukaio. 2Nae hē fiafia kilātou ona nae akoako e nā apohitolo iēnei e toka lua ki tagata, ko Iehu kua toe tū mai te oti, ma ko te mea ia e fakamāonia ai ko nā tino kua oti ka toe fakatutū mai te oti. 3Oi na puke ai e kilātou te toka lua, ma e ona kua pō i te taimi tēnā, na tuku ai e kilātou te toka lua ki te falepuipui ke pa ki te aho alafaki. 4Kae e tokalahi nā tino na fakalogo ki te fekau ma na talitonu ki ei; ma na tuputupu ai pea lava te nūmela o tagata na fakapotopoto ki ei, ma na maua he tai lima afe.
5I te aho alafaki, na fakamāopōpo mai ai ki Ieluhalema nā takitaki o Iutaia, te kau toeaina, ma nā faiākoga o te Tūlāfono. 6Na fono fakatahi kilātou ma Anaha te Ulu Ohitāulaga, vēnā ma Kaiafa, ma Ioane, ma Alehana, ma iētahi tino uma mai te puikāiga Ulu Ohitāulaga. 7Na fakatutū e kilātou ia Petelu ma Ioane i mua o te fono ma na fehili vē atu ai ki ei, “Na vēhea ona mafai e koulua oi fakamālōlō te pipili? E o ai te mana pe ko te igoa na koulua faia ai te mea tēnei?”
8Na fakatumulia ia Petelu i te Agaga Paia, oi na tali vē atu ai, “Koutou nā takitaki o te nuku ma toeaina: 9kāfai kimāua e koutou hukehukea i te aho nei e uiga ki te gāluega lelei na ki mā faia ki te pipili, ma pe na vēhea foki ona fakamālōlōgia, 10e tatau foki la ke iloa e koutou uma vēnā ma tagata uma o Ihalaelu, ko te tino tēnei e koutou kitea mai, kua fakamālōlōgia kātoa i te mana o te igoa o Iehu Keliho te Nahaleta—tē na koutou fakahātauloa ma na toe fakatū mai te oti e te Atua. 11Ko Iehu ko ia te fakatatau ki ei te tuhituhiga paia e vē mai,
‘Ko te fatu nae inoino koutou nā faufale ki ei,
kua kavea ma fatu e pito hili ona tāua.’ #Hal 118.22
12Ko te fakaolataga e maua oioti e ala ia te ia; e hēai hētahi tino i lalo o te lagi kātoa kua fōki mai e te Atua, e ia mafaia oi fakaola kitātou.”
13Na ofo nā tino o te Taupulega ki nā fakamatalaga a Petelu ma Ioane ona ko te hē mātataku, kae maihe lava i te kilātou iloaga ko te toka lua tēnei nae hē ni tino lauiloa pe na akoakogia. Oi na hāfia ai e kilātou ko te toka lua tēnei nae ni hoa e o Iehu. 14Kae kua hēai lele ha lātou kupu na mafai ke fai, auā kua kilātou kitea atu ko te taulealea na fakamālōlō, e tutū fakatahi mai ma kilāua. 15Oi na fakatonu ai e kilātou te toka lua ke olo ki fafo o te potu fono, kae kua kāmata oi talatalanoa lava kilātou. 16Kua fakatau fehili tētahi ki tētahi vēnei, “Heā nei ta kitātou ka fai ki te toka lua tēnei? Kua iloa e tagata uma lele e nonofo i Ieluhalema, te vāvega ofōfogia na kilā faia, ma e hē mafai kitātou ke lea e hēki faia e kilāua te mea tēnei. 17Kae e tatau ke lapataki mālohi kitātou ki te toka lua, ke nahe toe tautatala lele ki he tino i te igoa o Iehu. I te faiga tēnei, ka tāofiofia ai te toe halalau o tēnei tala ki tagata.”
18Oi na toe fekau ai e kilātou te toka lua, ma na fakatonu ai kilāua ke nahe toe tautatala lele pe akoako e kilāua he tino, i te igoa o Iehu. 19Kae na tali mai ia Petelu ma Ioane, “E tatau ke fuafua e koutou pe ko tēfea te mea e hako i te kikila a te Atua—pe ko te uhitaki atu kia te koutou, pe ko te uhitaki ki te Atua. 20Auā e hē kimā mafaia oi hē tautatala e uiga ki nā mea kua kikila ma fakalogo kimāua ki ei.” 21Oi na toe lapataki mālohi ai te Taupulega ki te toka lua, ma na tuku ai ke olo. Kua kilātou kitea e hē kilātou mafaia oi fakahala te toka lua, auā ko tagata uma kua viviki ki te Atua ona ko te mea na tupu. 22Ko te taulealea na fakamālōlō e ala i te vāvega, kua hili atu i te fa hefulu tauhaga tona matua.
Kua Tatalo nā Tino kua Talitonu ke Kilātou Maua te Lototele
23Na tatala fakahaoloto loa lava ia Petelu ma Ioane, oi na olo ai loa ki te lātou vāega ma taku ki ei te mea na lea ake ai nā ohitāulaga pule ma nā toeaina. 24I te lagonaga e nā tino kua talitonu te mea tēnei, oi na kau fakatahi uma ai kilātou i te tatalo ki te Atua: “Te Tamana ma tē na faia te lagi ma te lalolagi, te tai ma mea uma i loto! #Eho 20.11; Nem 9.6; Hal 146.6 25E ala i te Agaga Paia na vāgana ai koe kui mai i to mātou tupuna ko Tavita tau kaukauna, i te leaga vēia, #Hal 2.1-2 (LXX)
‘Heā te na feita ai ia tagata nukukehe;
heā te na fai ai e tagata a lātou
tau pulepulega kino?
26Ko tupu o te lalolagi na hāuni,
ma takitaki na pulepule fakatahi,
ke teteke ki te Aliki ma ki tana Mehia.’
27Auā e moni lava ko Helota ma Ponitiō Pilato, na potopoto fakatahi i te kakai tēnei ma tagata nukukehe vēnā ma tagata o Ihalaelu, ke teteke ki tau Kaukauna paia ko Iehu, tēia na kē fakaukuagia ke kavea ma Mehia.#Mat 27.1-2; Mlk 15.1; Luk 23.1, 7-11; Ioa 18.28-29 28Na potopoto kilātou ke fakatino ho he mea na finagalo koe ke tutupu, e ala i tō mana. 29Ma i te taimi nei te Aliki, kikila kia lātou kupu fakamataku kua fai mai kia te kimātou, ma fōki mai ki au kaukauna te avanoa ke folafola ai e kimātou tau fekau, e aunoa ma he mataku. 30Fālō atu tō lima ke fakamālōlō ai ia tagata, ma ke mafai ke fai ni fakailoga ma ni vāvega e ala i te igoa o tau Kaukauna paia ko Iehu.”
31Kua uma te fai o te lātou tatalo, oi na lūlū ai te nofoaga nae māopōpo ai kilātou. Na fakatumulia kilātou uma i te Agaga Paia, ma na kāmata ai oi tautatala i te fekau a te Atua, e aunoa ma he mataku.
Kua Fakaaogā Fakatahi a lātou Meatōtino
32Kua gātahitahi ia loto ma māfaufau o te vāega kua talitonu kia Iehu. E hēai lele he tino o kilātou na lea ko ana meatōtino e a ia lava, kae na kilātou fakaaogā fakatahi nā mea uma lele a kilātou tau toka tahi. #Gāl 2.44-45 33Na molimau te kau apohitolo ki te toetū o te Aliki ko Iehu i he tūlaga matuā mālohi, ma na liligi e te Atua ki luga o kilātou uma nā fakamanuiaga e lahi. 34Ko nā mea uma nae manakomia e kilātou, na maua e kilātou. Ko nā tino nae iei o lātou fale ma ni fenua, na fakatau atu e kilātou ma ko te tupe na maua mai, 35na kilātou tuku atua ki te kau apohitolo; oi na fakahoahoa ai nā tupe fuafua ki nā manakoga o kilātou tau toka tahi.
36Ma ko Iohefa la, te ha-Levī na fānau i Kupulona, tē nae fakaigoa e te kau apohitolo kia Panapa (ko tona uiga “Ko Tē e Fakamākeke ki tagata”), 37na fakatau atu e ia he fenua e o ia, oi na kaumai ai te tupe kua fōki ki te kau apohitolo.
Currently Selected:
Gāluega 4: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust