Rŏma 6

Dèò d́ŏ Krĭstu abu

1Mègōnu, wò kò òwe dèkhòwè abu cab́ô̆htè wi gī nib́èdosè Kib́ĭcè ahluată nu ā? 2Ńò! Dî ḿî gōnu ńò. Wî thĭ b́è htŏgè dèkhòwè, mègōnu d́ō, wò kò òwed́ò̆ dèkhòwè abu cadè̄? 3Thĭ thîhè̆ tèpwè htè b́ĕ wa kha dèŭsab́ăhtĭ d́ŏ Jezŭ Krĭstu abu nu, wi nib́è htŏ dèŭsab́ăhtĭ d́ŏ Zè dèthĭ abu nu. 4Mègōnu d́ō, b́ĕ wi nib́è dèŭsab́ăhtĭ nu, wè b́è b́ŭlăplogè kî wi thĭplogè Cè. Gōnu akhoacè̆, acab́ô̆ Krĭstu htaboge d́ŏ dèthĭ aklè̆ d́ŏ Ca Pa adòathe abu nu, wa ḿî ḿî wò kò òb́èbò̄ d́ŏ dèthôḿô̆ athè̆ abu nu.

5Mègōnu d́ō, wî gî̄ ḿî ma dèbwè lò ploplo kî Krĭstu d́ŏ dèthĭ abu d́ō, wî gî̄ ḿî tèpwè ahtaboge ploplo kî Cè d́ŏ dèthôḿô̆ abu nu nu. 6Wî thîhè̆ tèpwè htè we neb́î̆cè alila nu b́è htalaplo htŏ Krĭstu d́ŏ Zu Krusu alò nu, cab́ô̆htè dèkhòwè anebî̆cè adèkhodèă kè̄ b́è mèkè̆mèôbò̄, kî wè dî ḿîbebò̄ dèkhòwè azôabwè be ńò nu. 7Manè̄ d́ō, bija dèbwè gī thĭ d́ō, cè kî dèkhòwè nu tè b́èkja be lōwa ńò. 8Wu b́u htè wi thĭplo Krĭstu d́ō, wa gā htaboge plokò̆ Cè d́ŏ dèthôḿô̆ abu nu. 9Acab́ô̆ wî thîhè̆ adĕ Krĭstu nu b́è b́awè̄htoge htŏ dèthĭ aklè̆ kî Ci di thĭ b́è taplă be ńò. Dèthĭ do no dè b́è Cè ńò. 10Hlĕ Ci thĭ nu, Ci thĭlè̄kè̆ dèkhòwè, kî dèkhòwè do no dè b́è be Cè ńò, kî khŏnujo Zè dèò ḿî ploplo kî Kib́ĭcè. 11Gōnu akhò̆, thĭ gō gomob́è thĭ thĭlè̄kè̆ dèkhòwè, ḿî òthôḿô̆gè d́ŏ B́ĭcè abu d́ŏ Jezŭ Krĭstu abu nu.

12Mègōnu akhoacè̆, thĭ ti ib́è dèkhòwè ŭi thĭ neb́î̆cè ńò. Thĭ dò sòkhĕńeb́è thĭ dèthaèni alē ńò. 13Thĭ neb́î̆cè gî̄ dî ḿîb́è dèrî̄dècŭ ad́oaphja za dèkhòwè ńò. Ḿî thĭ ki ihtab́è thĭ neb́î̆cè Kib́ĭcè, kî gomobò̄ thĭ ne athĭ hwă anib́ègè dèòthôḿô̆ tòcò nu. Thĭgè mèb́è thĭ ne thèd́è̆klô̆ ad́oaphja dè d́ŏ Kib́ĭcè ò dòkhò̆ nu. 14Dèkhòwè tu ŭitcaib́è thĭ dèòthôḿô̆ ńò, manè̄ thĭ tò ò dèhmèla alè̄ ńò ḿî Kib́ĭcè adèhludètă alè̄ nu.

Dèdî̄dèhma Azôabwè tòcò

15Wò kò ò kî ahluată, tè b́è dèhmèla ńò wò d́ò do d́ō, wò òhlô̆òla agè̄ mè dèkhòwè wò d́ò do ā? 16Thĭ thîhè̆ tèpwè htè b́ĕ thĭ ŏlăphlalakô agā khazô bija dèbwèbwè d́ō, thĭ phî̆htagè zô zô zè bwè nu, kî taplakhă lò thĭ gî̄ ḿî ma dèkhòwè azôabwè d́ō, agē leihŭ thĭ d́ŏ dèthĭklè̆ nu, ḿî taplakhă lò thĭ dî ḿî za dèsòkhĕńelēthèhô̆ htè aleihŭ wa d́ŏ Kib́ĭcè dèdî̄dèhma azô ńò. 17Wa htăhtai B́ĭcè adèhludètă! Manè̄, hlĕ aŭsu nu thĭ ḿîgè dèkhòwè azôabwè, barasă khŏnujo thĭ phîni lŏtholŏthagè dèdî̄dèhma ab́èd́òŭd́ò̆sa thĭ acè̆ nu. 18Thĭ hlô̆htaphlòhta htŏ dèkhòwè azôabwè kî thĭ ḿîgè dèdî̄dèhma azôabwè. 19(Thĭ gî̄ thîhè̆htôbò̄ anikhĭ, jò d́ò dèjî̄b́è aphlò̆ thĭ nigu nu.) Jò d́ò̆sa thĭ hlĕ athè̆lè̄kho nu, thĭ mèigè thĭ neb́î̆cè dèkî̆kkèmèhlò̆ kî dèkorokhara azôabwè, ḿî khŏnujo, mèibò̄ cè dèdî̄dèhma azôabwè pĕhtazòhta d́ŏ dèwîdètcă anikhĭ dòkhò̆.

20Hlĕ thĭ ḿî dèkhòwè azôabwè akhî nu, thĭ dè mèb́è tèpwè dèdî̄dèhma adè ńò. 21Thĭ nib́èbò̄ danè̄? Da dimĭ ńò, ḿî dèthăwā lò. Manè̄ dèphîdèmè ajo domo ḿî agudu d́ŏ dèthĭ aklè̆ akhoacè̆ nu. 22Nòthò̆ hnò̆nu, khŏnujo thĭ b́è b́ăplè htŏ kî dèkhòwè d́ŏ thĭ ḿîgè Kib́ĭcè azôabwè, thĭ nib́è htŏ dèwîdètcahtĭ acô̆thèlè̆ alei thĭ d́ŏ dèòthôḿô̆ alahtŭlablo nu. 23Dèkhòwè asôahlè̆ ḿî dèthĭ, Kib́ĭcè adèi ḿî dèò alahtŭlablo d́ŏ wî B́ĭcè Jezŭ Krĭstu abu nu.

Currently Selected:

Rŏma 6: GRNT21

Highlight

Copy

Compare

Want to have your highlights saved across all your devices? Sign up or sign in

Geba Roman New Testament © Bible Society of Myanmar, 2021.

Learn More About Geba Roman New Testament