Lim Aŋgàa Ntum 19
19
Por dzə́ʼə́m é Efesor viyá vibaà
1Wáa dzə e ghan se Apolor‑iì dzəə̀n é Korin sìn, a Por sí ghán e mvə̀m wòŋ woo Asia. Wù lòo meesín e Efesor, e yèn aŋgàa biimé ámóʼó fó, 2e dzə̀r aáwune jii, «Kiyoy ke Ranén kí‑iì lo wìy fo vèn é ghan se vèn‑eè wayin shilív e Nyùy wùn á?» Áwune bìnèr jii, «Vèr yòʼ‑oo yií ne yù ji kímóʼ kí dzə̀ á Kiyoy ke Ranén kí.» 3Por dzə́r jii, «Bo vé‑eè wày ven é ndzəv ji ka lèn?» Á bìnèr jii, «Vé‑eè wày bìʼ kinyo ke Joon.» 4Por nèn a naàrì aáwune jii, «Joon‑eè wáy wíri é ndzəv fó dìn ji á bìnèr ne a melív mev. A wù‑uù ló a suúy e wìr dzə̀m jii, wìr wùmòʼ wiy fo wùn bàm, á wáy á shilív e ŋgaàŋ wùn, a wù yoŋ a dzə̀ Jesus. 5Wír vìyi yú kee shooy, e biìmé, á nèn wày áwune é ndzəv lèn e Taàtá Jesus yir.» 6Por yiì lò, e neèr wó aáwuné vitu, Kiyoy ke Ranén kí wìy, e nə̀ə́ aáwuné meliv. Á nèn a suŋnín kfəə́ se làm símóʼ sí jeéy jeéy, e kfə̀n a tiisí vinyo ve á yú fo Nyùy. 7A wír vìne‑eè du wír nshòv sibaà e ghvə̀m.
8Por ku nèn a dzə e Efesor foo fèy, a dù e wír veé Judàá ŋgày bùnrì, a suŋnín fo tèéter, e meé ŋwee e taár. Wùn áwune wáa bìʼ vinyo ve Nyùy, wù wáa dìn áwune mo sáʼ Nyùyi dzəə̀n. 9Ámóʼó wáa yu, a nyaŋ nyaŋén, e làa yòʼ a biimé, e nèn a nyàysì dzə́ə yee kùm Jesus rə̀n e wírí mvəm. Por nèn lì wír ve vé‑eè biimen, wùn áwune dù lèn a dzə e Tiranur lav ŋwàʼ, a suŋnín fo vishiíy vidzə̀m. 10Wù ku nèn a yiì bèy, e meé viyá vibaà, wír veé wòŋ Asia foo fèy adzə̀me wáa yu kinyo kee kùm Jesus, wír veé Juda ve vé‑eè dzəə̀n fóo kfə́n a yu sa.
Wír ámóʼó bíʼnín Por ji á jum a *anyùy
11Por wáa yeʼéy wíri bey, Nyùy wáa yiì, wù wáa yiì viŋgaʼnìn ve vinyò ve bó wìr yòʼ‑oò yiì ne yèn. 12A fə̀m‑eè dzə̀ vifá ve wù‑uù sí maʼ e wùn, ví kù a fèr wír. Wíri nèn a tàʼ vinsàʼ və́ vé ndzə̀y, kìn dzə̀ sé lìm, a dù, a neèr e vé yàsií wùn, á wáa bonén, anyùy ve vé‑eè jívir wírií wáa màʼtì sa áwune.
13Wír veé Juda ámóʼó wáa dzə fo, a vé‑eè sí ghán, jum anyùy. Áwune nèn lò, a mùm sa ji á wáa yòŋ yír Jesus, e bó a jùm anyùy. Wìr lo, wù nèn a suúy aànyùyi jii, «M jum ven e Jesus wo Por fiʼtì və̀y yir.» 14Wír ve vé‑eè yii kinyo kìne‑eè dzə̀ wír saàmbà, a dzə̀ wón Seva woo taà cù wo kuʼùn wo wìr veé Juda. 15Á suuy bèy, nyùy woo shooy nèn dzə̀r jii, «M kì Jesus, e kfə̀n kìíy Por. Vèn dzə̀ kén ala?» 16Ŋgaà nyùy və̀y nèn ŋàʼáy e wír vìyí wùn, e kùŋrí kuŋrín adzə̀m, á wàa meekír fo lav kinshóʼ, aá lémkír ne.
17Wír veé Efesor wùn à wír veé Juda vee fó adzə̀me yú kinyo kee shooy, a fàn. Wíri ku nèn a ghvəm yír Taàtá Jesus, a shaàsìn. 18Wír ve vé‑eè biimen kinyo ke Jesuse wáa wìy anín, a toyrí mo vé‑eè rə́si yii shív. 19A ve vé‑eè din sə́me wiy aàŋwàʼ vév səme, báʼti, ton e wírí si. Á táŋ káv ŋwàʼ woo shooy, wáa dzə mbàm see kisha ke mbàm ke fəvír kí nsə̀kì mtàn (50,000), a sí mbàm mòʼóne dzə̀ mbàm sinín.#19.19: Sí mbàm e mòʼóne‑eè dzə̀ moo vilaʼày vé ŋgaà lìm veé kishiíy bey. 20Kinyo ke Nyùy ki ku nèn a nəə́ e wírí meliv bey kitávín, a kuy, a dù duùn fó mbìy.
Melaà meé Efesor
21Por nèn wìy lò, e wày ji wun du e Jerusalem, lóo dù, é wun wáa shaà dzə́ə fó wòŋ Masedonia wùn à woo Akayàa. Wù kfən sùúy jii, «M wíy dù, e meé fo, é m ku dù sa, e yèn Rom.» 22Wù nèn tsə̀nsí Timoti wùn Eratur ve vé‑eè sə́ wun, á wáa dù fo mbìy e wòŋ woo Masedonia. Wù kfən sìíy, e dzə̀ʼtì e wòŋ woo Asia shishàr.
23Kú a dzə e ghan fóo fèy, melaà me tavín mè nèn kèʼ e Efesor bìʼ kinyo ke Jesus. 24Taà kilàm wùmòʼ wáa dzə fo, aá yoŋ ji Demetiyur. Wù‑uù ton vifá ve ví sə́nin lav nyùy wo á yoŋ ji Atemer, a lim yee shooyi fó séʼ wo kuʼùn e vé kilàme. 25Wù nèn wìy lò, e jàŋrì áwune, e kfə̀n jàŋrì sa aŋgàa lìm ámóʼó ve vé‑eè lim sa vifá vee bey, a suúy jii, «Vèn kì ji vèsən kùʼkìr e mbàm adzə̀m bèn, a dzə̀ bìʼ lim rə̀n. 26A vèn yén, kfə̀n yú sa kinyo ke jwè woo Por və̀y yii e Efesor fèn, kfə̀n yii woŋ Asia e dzə̀m. Wù ghán, suuy ji anyùy ve á fer e wóo víne yòʼ dzə̀ á anyùy gheéy, binèr wír anín. 27M nén a yen ji tàm kí wìy yiì, lim yesəné bìr, e kfə̀n yiì, é lav nyùy woo Atemer və̀n lay. A kí kòóy bèy, bo á shòór ne nyùy wo kuʼùn və̀n, wo wír veé Asiàa ghvə́mé, a kitú ke nsay ki ghvə́m kidzə̀m.»
28Áwune yú bey, kí gaár melív mev, á wáa waamé jii, «Atemer woó Efesor dzə̀ nyùy wo kuʼùn.» 29Ntèʼ nèn lò, e bvəə̀rí e dzə̀m. Wíri báʼtí, e bàm Gayur wùn Aritakur ve vé‑eè ghán wùn à Por, a dzə̀ wír veé Masedonia, a sə̀ŋ, a dù sho e kirə̀ʼ ké kileèy.#19.29: Kirə̀ʼ kin ki dzə̀, a vé‑eè bòm moo vidàŋ, e kaàrí, e tàr mo dzə̀ wíri dzə̀ʼə̀m shó ansə̀kì ansə̀kì, a leéy kileèy. 30Por wáa tàʼ ji wun du, e sùŋnín e wír vìyi, aŋgàa biimée sháʼnín. 31Atǎr ntèʼ ámóʼó ve yì‑iì dzəə̀n ŋkar sə́ sí tsə́nsí sá ntum, a lon jii, lá wù yòʼ mùm, e tìír a kiwuú kfə́ é kirə̀ʼ ké kileèy foo fèy. 32A wír vìyi kù bvəər virə́ʼ, waáme waàmén. Aámóʼó waáme kinyo ke sən kí, ámóʼó ke sən kí, bìʼ fo kùʼùn wìr yòʼ‑oò kiìn kinyo ke vé‑eè baʼtin fó, a yiì. 33Ámóʼó yén mo wír veé Judàa cuur Aleŋsanda fo mbìy, e nèn a kwàʼtì ji kinyo ki kooy a dzə̀ á bìʼ wun. Wù nèn a sə̀tì wíri e kiwó ki ji wun túner a kitú kfə́. 34Áwune yén, a kì dzə̀ wír woó Juda, e nèn kfə̀n màysì, a waamé waamén jii, «Atemer woó Efesor dzə̀ nyùy wo kuʼùn.» Á ku nèn rə̀sí, a yiì bèy ntàmda.
35Wìr wo wù‑uù sáŋ vinyo ve wòŋ yiì lò, e sə̀r wír vìy, e yòŋ áwune jii, «Ven vee wír veé Efesor, wìr wùmòʼ dzə̀ shó wo wù méŋ ji bó yòʼ kér Efesor və̀n lav nyùy woo Atemer wùn à tíy nyùy ye yí‑iì gbuùn fó yuví a? 36Mo vèn kiìn ji bó yòʼ dzə̀ wìr shàʼnín kee shooy, bo vèn kì dzə́ nyaáŋ, e làa yòʼ a yuŋsí. 37Vèn wìy e wír vìne fen, a bó á yoʼ shòŋ kifá fo lav se anyùy, a bó á yoʼ kuù nyùy wòsən woo wiíy woo shooy. 38A Demetiyur wùn à wír vəə́ kì kér kinyo kímóʼ kí wùn à wír vìne, bo vishiíy vé nsaʼ vi dzə̀ ve dzə̀ áwune dù, e yèn vé saʼa, é wùn áwune sáʼ fó. 39A kinyo kímóʼ kí kfə̀n dzə̀ shó, e shaà kin, bo á wíy saʼ e kishiíy ke atǎr ntèʼé yii dzəʼə̀mè. 40M suuy bèn, bìʼ fo m fan ji a tàm bo vèsən yíi koóy kinyo bìʼ melaà mee lán mèn. A bó kí yòʼ kòóy, wìr wàa ker kinyo kée bìnèr.» 41Wù suúy bey, e nèn siìr màŋgòŋ və̀y e bàm.
Currently Selected:
Lim Aŋgàa Ntum 19: LNB
Highlight
Copy
Compare
Share
Want to have your highlights saved across all your devices? Sign up or sign in
© 2022 CABTAL
Lim Aŋgàa Ntum 19
19
Por dzə́ʼə́m é Efesor viyá vibaà
1Wáa dzə e ghan se Apolor‑iì dzəə̀n é Korin sìn, a Por sí ghán e mvə̀m wòŋ woo Asia. Wù lòo meesín e Efesor, e yèn aŋgàa biimé ámóʼó fó, 2e dzə̀r aáwune jii, «Kiyoy ke Ranén kí‑iì lo wìy fo vèn é ghan se vèn‑eè wayin shilív e Nyùy wùn á?» Áwune bìnèr jii, «Vèr yòʼ‑oo yií ne yù ji kímóʼ kí dzə̀ á Kiyoy ke Ranén kí.» 3Por dzə́r jii, «Bo vé‑eè wày ven é ndzəv ji ka lèn?» Á bìnèr jii, «Vé‑eè wày bìʼ kinyo ke Joon.» 4Por nèn a naàrì aáwune jii, «Joon‑eè wáy wíri é ndzəv fó dìn ji á bìnèr ne a melív mev. A wù‑uù ló a suúy e wìr dzə̀m jii, wìr wùmòʼ wiy fo wùn bàm, á wáy á shilív e ŋgaàŋ wùn, a wù yoŋ a dzə̀ Jesus. 5Wír vìyi yú kee shooy, e biìmé, á nèn wày áwune é ndzəv lèn e Taàtá Jesus yir.» 6Por yiì lò, e neèr wó aáwuné vitu, Kiyoy ke Ranén kí wìy, e nə̀ə́ aáwuné meliv. Á nèn a suŋnín kfəə́ se làm símóʼ sí jeéy jeéy, e kfə̀n a tiisí vinyo ve á yú fo Nyùy. 7A wír vìne‑eè du wír nshòv sibaà e ghvə̀m.
8Por ku nèn a dzə e Efesor foo fèy, a dù e wír veé Judàá ŋgày bùnrì, a suŋnín fo tèéter, e meé ŋwee e taár. Wùn áwune wáa bìʼ vinyo ve Nyùy, wù wáa dìn áwune mo sáʼ Nyùyi dzəə̀n. 9Ámóʼó wáa yu, a nyaŋ nyaŋén, e làa yòʼ a biimé, e nèn a nyàysì dzə́ə yee kùm Jesus rə̀n e wírí mvəm. Por nèn lì wír ve vé‑eè biimen, wùn áwune dù lèn a dzə e Tiranur lav ŋwàʼ, a suŋnín fo vishiíy vidzə̀m. 10Wù ku nèn a yiì bèy, e meé viyá vibaà, wír veé wòŋ Asia foo fèy adzə̀me wáa yu kinyo kee kùm Jesus, wír veé Juda ve vé‑eè dzəə̀n fóo kfə́n a yu sa.
Wír ámóʼó bíʼnín Por ji á jum a *anyùy
11Por wáa yeʼéy wíri bey, Nyùy wáa yiì, wù wáa yiì viŋgaʼnìn ve vinyò ve bó wìr yòʼ‑oò yiì ne yèn. 12A fə̀m‑eè dzə̀ vifá ve wù‑uù sí maʼ e wùn, ví kù a fèr wír. Wíri nèn a tàʼ vinsàʼ və́ vé ndzə̀y, kìn dzə̀ sé lìm, a dù, a neèr e vé yàsií wùn, á wáa bonén, anyùy ve vé‑eè jívir wírií wáa màʼtì sa áwune.
13Wír veé Juda ámóʼó wáa dzə fo, a vé‑eè sí ghán, jum anyùy. Áwune nèn lò, a mùm sa ji á wáa yòŋ yír Jesus, e bó a jùm anyùy. Wìr lo, wù nèn a suúy aànyùyi jii, «M jum ven e Jesus wo Por fiʼtì və̀y yir.» 14Wír ve vé‑eè yii kinyo kìne‑eè dzə̀ wír saàmbà, a dzə̀ wón Seva woo taà cù wo kuʼùn wo wìr veé Juda. 15Á suuy bèy, nyùy woo shooy nèn dzə̀r jii, «M kì Jesus, e kfə̀n kìíy Por. Vèn dzə̀ kén ala?» 16Ŋgaà nyùy və̀y nèn ŋàʼáy e wír vìyí wùn, e kùŋrí kuŋrín adzə̀m, á wàa meekír fo lav kinshóʼ, aá lémkír ne.
17Wír veé Efesor wùn à wír veé Juda vee fó adzə̀me yú kinyo kee shooy, a fàn. Wíri ku nèn a ghvəm yír Taàtá Jesus, a shaàsìn. 18Wír ve vé‑eè biimen kinyo ke Jesuse wáa wìy anín, a toyrí mo vé‑eè rə́si yii shív. 19A ve vé‑eè din sə́me wiy aàŋwàʼ vév səme, báʼti, ton e wírí si. Á táŋ káv ŋwàʼ woo shooy, wáa dzə mbàm see kisha ke mbàm ke fəvír kí nsə̀kì mtàn (50,000), a sí mbàm mòʼóne dzə̀ mbàm sinín.#19.19: Sí mbàm e mòʼóne‑eè dzə̀ moo vilaʼày vé ŋgaà lìm veé kishiíy bey. 20Kinyo ke Nyùy ki ku nèn a nəə́ e wírí meliv bey kitávín, a kuy, a dù duùn fó mbìy.
Melaà meé Efesor
21Por nèn wìy lò, e wày ji wun du e Jerusalem, lóo dù, é wun wáa shaà dzə́ə fó wòŋ Masedonia wùn à woo Akayàa. Wù kfən sùúy jii, «M wíy dù, e meé fo, é m ku dù sa, e yèn Rom.» 22Wù nèn tsə̀nsí Timoti wùn Eratur ve vé‑eè sə́ wun, á wáa dù fo mbìy e wòŋ woo Masedonia. Wù kfən sìíy, e dzə̀ʼtì e wòŋ woo Asia shishàr.
23Kú a dzə e ghan fóo fèy, melaà me tavín mè nèn kèʼ e Efesor bìʼ kinyo ke Jesus. 24Taà kilàm wùmòʼ wáa dzə fo, aá yoŋ ji Demetiyur. Wù‑uù ton vifá ve ví sə́nin lav nyùy wo á yoŋ ji Atemer, a lim yee shooyi fó séʼ wo kuʼùn e vé kilàme. 25Wù nèn wìy lò, e jàŋrì áwune, e kfə̀n jàŋrì sa aŋgàa lìm ámóʼó ve vé‑eè lim sa vifá vee bey, a suúy jii, «Vèn kì ji vèsən kùʼkìr e mbàm adzə̀m bèn, a dzə̀ bìʼ lim rə̀n. 26A vèn yén, kfə̀n yú sa kinyo ke jwè woo Por və̀y yii e Efesor fèn, kfə̀n yii woŋ Asia e dzə̀m. Wù ghán, suuy ji anyùy ve á fer e wóo víne yòʼ dzə̀ á anyùy gheéy, binèr wír anín. 27M nén a yen ji tàm kí wìy yiì, lim yesəné bìr, e kfə̀n yiì, é lav nyùy woo Atemer və̀n lay. A kí kòóy bèy, bo á shòór ne nyùy wo kuʼùn və̀n, wo wír veé Asiàa ghvə́mé, a kitú ke nsay ki ghvə́m kidzə̀m.»
28Áwune yú bey, kí gaár melív mev, á wáa waamé jii, «Atemer woó Efesor dzə̀ nyùy wo kuʼùn.» 29Ntèʼ nèn lò, e bvəə̀rí e dzə̀m. Wíri báʼtí, e bàm Gayur wùn Aritakur ve vé‑eè ghán wùn à Por, a dzə̀ wír veé Masedonia, a sə̀ŋ, a dù sho e kirə̀ʼ ké kileèy.#19.29: Kirə̀ʼ kin ki dzə̀, a vé‑eè bòm moo vidàŋ, e kaàrí, e tàr mo dzə̀ wíri dzə̀ʼə̀m shó ansə̀kì ansə̀kì, a leéy kileèy. 30Por wáa tàʼ ji wun du, e sùŋnín e wír vìyi, aŋgàa biimée sháʼnín. 31Atǎr ntèʼ ámóʼó ve yì‑iì dzəə̀n ŋkar sə́ sí tsə́nsí sá ntum, a lon jii, lá wù yòʼ mùm, e tìír a kiwuú kfə́ é kirə̀ʼ ké kileèy foo fèy. 32A wír vìyi kù bvəər virə́ʼ, waáme waàmén. Aámóʼó waáme kinyo ke sən kí, ámóʼó ke sən kí, bìʼ fo kùʼùn wìr yòʼ‑oò kiìn kinyo ke vé‑eè baʼtin fó, a yiì. 33Ámóʼó yén mo wír veé Judàa cuur Aleŋsanda fo mbìy, e nèn a kwàʼtì ji kinyo ki kooy a dzə̀ á bìʼ wun. Wù nèn a sə̀tì wíri e kiwó ki ji wun túner a kitú kfə́. 34Áwune yén, a kì dzə̀ wír woó Juda, e nèn kfə̀n màysì, a waamé waamén jii, «Atemer woó Efesor dzə̀ nyùy wo kuʼùn.» Á ku nèn rə̀sí, a yiì bèy ntàmda.
35Wìr wo wù‑uù sáŋ vinyo ve wòŋ yiì lò, e sə̀r wír vìy, e yòŋ áwune jii, «Ven vee wír veé Efesor, wìr wùmòʼ dzə̀ shó wo wù méŋ ji bó yòʼ kér Efesor və̀n lav nyùy woo Atemer wùn à tíy nyùy ye yí‑iì gbuùn fó yuví a? 36Mo vèn kiìn ji bó yòʼ dzə̀ wìr shàʼnín kee shooy, bo vèn kì dzə́ nyaáŋ, e làa yòʼ a yuŋsí. 37Vèn wìy e wír vìne fen, a bó á yoʼ shòŋ kifá fo lav se anyùy, a bó á yoʼ kuù nyùy wòsən woo wiíy woo shooy. 38A Demetiyur wùn à wír vəə́ kì kér kinyo kímóʼ kí wùn à wír vìne, bo vishiíy vé nsaʼ vi dzə̀ ve dzə̀ áwune dù, e yèn vé saʼa, é wùn áwune sáʼ fó. 39A kinyo kímóʼ kí kfə̀n dzə̀ shó, e shaà kin, bo á wíy saʼ e kishiíy ke atǎr ntèʼé yii dzəʼə̀mè. 40M suuy bèn, bìʼ fo m fan ji a tàm bo vèsən yíi koóy kinyo bìʼ melaà mee lán mèn. A bó kí yòʼ kòóy, wìr wàa ker kinyo kée bìnèr.» 41Wù suúy bey, e nèn siìr màŋgòŋ və̀y e bàm.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2022 CABTAL