San Juan 10
10
Je̱'e̱ borreegu̶ kweentu̶'ajtpu̶ y je̱'e̱ byorreegu̶ ajku̶xy
1Mu̶'it je̱'e̱ Jesús myu̶naañ: “Janch tu̶y'ajtu̶ñ du'un nnu̶maaygyu̶xy mu̶dyiibu̶ ka'p tyu̶gu̶yu̶u̶ygyu̶xy ma je̱'e̱ borreegu̶ agaj'aguuyu̶ñ, y tyu̶gu̶yu̶u̶ygyu̶xy wiingtuum, je̱'e̱ me̱tzpu̶ je̱'e̱ ajku̶xy. 2Peru̶ je̱'e̱ mu̶dyiibu̶ tu̶gu̶yu̶u̶by ma je̱'e̱ agaj'aguuyu̶ñ, je̱' je̱'e̱ borreegu̶ kweentu̶'ajtpu̶ mu̶dyiibu̶ je̱'e̱ byorreegu̶ kweentu̶'ajtpu̶ñ. 3Je̱'e̱ agaj'aa kweentu̶'ajtpu̶ yaj'awaatzu̶py je̱'e̱ borreegu̶ kweentu̶'ajtpu̶ y'agaj'aa, y chi je̱'e̱ borreegu̶ kweentu̶'ajtpu̶ byorreegu̶ nidu'ug nidu'ug mu̶j'ya'axy xu̶u̶gu'uyaax'eemby, y yo'kmu̶doowu̶p je̱'e̱ byorreegu̶ ajku̶xy, chi yajpu̶dzu̶u̶mgu̶xy agajjooty, 4y ko naty nigu̶xyu̶ tu̶ pyu̶dzu̶u̶mdaaygyu̶xy, chi je̱' jayu̶jp ñu̶kxy, y u̶x'aam je̱'e̱ byorreegu̶ pyanú̶kxu̶gu̶xyu̶ je̱' ko yo'kmu̶doowu̶gu̶xyu̶. 5Ka'p je̱'e̱ borreegu̶ wiingja'ay panú̶kxku̶xy, kyu'ugueepy je̱'e̱ ni'igyu̶ ajku̶xy, je̱' ko yo'kmu̶doogu̶xypy je̱' ko wyiingja'ayu̶ch.”
6Du'un je̱'e̱ Jesús adayaaba ijxpe̱jt yajmu̶dmu̶dyaaku̶ ajku̶xy, peru̶ ka'p je̱'e̱ winju̶wu̶u̶ygyu̶xy neby najty je̱'e̱ Jesús du'un jya'amu̶na'añu̶ñ.
Jesús, je̱' je̱'e̱ oybyu̶ borreegu̶ kweentu̶'ajtpu̶
7Chi je̱'e̱ Jesús ja'adu'ook ñu̶maayu̶gu̶xnu̶ba: “Janch tu̶y'ajtu̶ñ du'un nnu̶maaygyu̶xy: U̶u̶ch je̱'e̱ du'un neby je̱'e̱ agaj'aa ma je̱'e̱ borreegu̶ tyu̶gu̶yu̶u̶ygyu̶xyu̶ñ. 8Ku̶xyu̶ je̱'e̱ mu̶dyiibu̶ jékyu̶p ooygyu̶x ma u̶u̶ch najty u̶u̶ch ka'p nmíñu̶ju̶ñ, y myu̶naangu̶xy najty ko je̱'e̱ Dios najty tu̶ kye̱jxu̶gu̶xyu̶, me̱tzpu̶du̶jk najty je̱'e̱ du'un ajku̶xy; me̱e̱dzaangu̶xy najty je̱'e̱ borreegu̶ ajku̶xy, peru̶ je̱'e̱ borreegu̶ ajku̶xy ka'p je̱'e̱ me̱tzpu̶du̶jk kweentu̶tuungu̶xy. 9U̶u̶ch je̱'e̱ du'un neby je̱'e̱ agaj'aaju̶ñ: pu̶n tu̶gu̶yu̶u̶by ma u̶u̶chu̶ñ, pyaadu̶py je̱'e̱ aanu̶mu̶ ni'idzooku̶ñ. Du'un je̱'e̱ y'ídu̶ch neby je̱'e̱ borreegu̶ mu̶dyiibu̶ jaboom jaboom jop jop pu̶dzu̶u̶mgu̶xpu̶ñ ma je̱'e̱ agaj'aguuyu̶ñ y ñú̶kxku̶xy ju̶kxpu̶ ojkpu̶, y tyu̶gu̶u̶ygyu̶xnu̶ tzuu tzuu.
10“Je̱'e̱ me̱tzpu̶ mu̶'it je̱'e̱ je'eyu̶ myiñ ko naty mye̱e̱dza'añ ko naty jya'ayyaj'o'oga'añ, y ko naty tii yajwindu̶goya'añ; peru̶ u̶u̶ch tu̶ nmíñu̶ch neby je̱'e̱ jugy'ajtu̶ñ wiinu̶u̶xu̶u̶bu̶ mu̶baad mbaatku̶xyu̶ñ, y neby mu̶baad mu̶jku̶je̱e̱ mbaatku̶xyu̶ñ. 11U̶u̶ch du'un u̶u̶ch neby je̱'e̱ oybyu̶ borreegu̶ kweentu̶'ajtpu̶ju̶ñ. Je̱'e̱ oybyu̶ borreegu̶ kweentu̶'ajtpu̶ u̶xtu̶ yejkypy jyugy'ajtu̶ñ je̱' mu̶u̶d je̱'e̱ byorreegu̶ kyu̶xpu̶, 12peru̶ je̱'e̱ mu̶dyiibu̶ mu̶juy je'eyu̶ tuumb, ko je̱'e̱ pa'uk ixy chi je̱'e̱ borreegu̶ u̶x'yo'oy y kye'egy, je̱' ko ka'p je̱'e̱ jye̱'e̱ju̶ch je̱'e̱ borreegu̶ kweentu̶'ajtpu̶ y nan ka'p je̱'e̱ je̱' jye̱' je̱'e̱ borreegu̶. Y ko je̱'e̱ pa'uk je̱'e̱ borreegu̶ mach y chi ku̶xyu̶ yajpoyu̶'u̶gwa'kxtaay yajnu̶kxu̶ydyaaygyu̶xy xii ya. 13Je̱'e̱ du'umbu̶ ja'ay ke̱e̱kp je̱', je̱' ko mu̶juy je̱'e̱ tyuñ, y paady je̱'e̱ borreegu̶ ka'p kweentu̶túñ.
14“U̶u̶ch du'un u̶u̶ch neby je̱'e̱ oybyu̶ borreegu̶ kweentu̶'ajtpu̶ju̶ñ, y n'ixy'ajtypyu̶ch je̱'e̱ nborreegu̶ ajku̶xy y je̱' nan xy'ixy'ajtpu̶ch je̱'e̱ nandu'un ajku̶xy. 15Du'un neby u̶u̶ch je̱'e̱ nDeedy xy'ixy'atyu̶ñ, y u̶u̶ch nan n'ixy'ajtypyu̶ch je̱'e̱ nDeedy nandu'un; y nye̱ge̱e̱mbyu̶ch je̱'e̱ njugy'ajtu̶ñ mu̶u̶d u̶u̶ch je̱'e̱ nborreegu̶ kyu̶xpu̶ ajku̶xy. 16Nan nmu̶u̶du̶ch je̱'e̱ wiingpu̶ borreegu̶ ja'adu'kpú̶ky mu̶dyiibu̶ ka'p tu'ugyu̶ yajpaatku̶xyu̶ñ mu̶u̶d adayaaba, nan nyajmine̱e̱mbyu̶ch je̱'e̱ ya nandu'un ajku̶xy. Je̱' xymyu̶bu̶jku̶byu̶ch n'ayuuk ndu̶y'ajt je̱'e̱ ajku̶xy, y tu'ugyu̶ je̱'e̱ du'un y'ijtku̶xnu̶ch ma je̱'e̱ agaju̶ñ, y nan tu'ug je̱'e̱ kweentu̶'ajtpu̶ naty je'eyu̶ju̶ñ.
17“Xychojkp xyjyu̶wu̶u̶ybyu̶ch je̱'e̱ Dios Teedy je̱' gyu̶xpu̶ ko u̶u̶ch je̱'e̱ njugy'ajtu̶ñ nye̱ga'añ ma je̱'e̱ o'ku̶ñ ke̱e̱ku̶ñ, neby u̶u̶ch ja'adu'ook njuugypyú̶gu̶chu̶ñ. 18Ni pu̶n u̶u̶ch je̱'e̱ njugy'ajtu̶ñ xykya'apu̶jku̶yu̶ch, pu̶nu̶ ka'p u̶u̶ch naty du'un nmu̶na'añ, u̶u̶ch je̱'e̱ ku̶'u̶m nye̱ge̱e̱mby. Nmu̶u̶du̶ch je̱'e̱ ane̱'e̱mu̶ñ u̶u̶ch, neby u̶u̶ch je̱'e̱ njugy'ajtu̶ñ nyé̱gu̶chu̶ñ y neby u̶u̶ch ja'adu'ook njuugypyú̶gu̶chu̶ñ. Du'un u̶u̶ch je̱'e̱ nDeedy tu̶ xy'ane'emy ko u̶u̶ch n'o'ogu̶ch y njuugypyú̶gu̶chu̶ch ja'adu'ook.”
19Ko je̱'e̱ judío ja'ay adayaaba ayuuk du'un mu̶doogu̶xy, chi ja'adu'ook me̱jtzpú̶ky ñayyajwa'kxu̶gu̶xy y ka'p ñay'ayuukwinju̶wu̶u̶yu̶ ajku̶xy. 20Nimay najty myu̶naangu̶xy:
—¿Ti yu̶'u̶ ko mgweentu̶tuungu̶xy, ka'a'oybyu̶mu̶u̶d yu̶'u̶ y looku̶ yu̶'u̶?
21Peru̶ chi nije̱' najty myu̶naangu̶xy:
—Ni pu̶n du'un mu̶baad kya'akápxy kya'amu̶dya'agy pu̶nu̶ ka'a'oybyu̶mu̶u̶d naty. ¿Nej mu̶baad je̱'e̱ ka'a'óybyu̶ wiindzja'ay da'a yajwindu̶kxu̶'kku̶xyu̶?
Je̱'e̱ judío ja'ay ajku̶xy ka'p je̱'e̱ Jesús ku'ubu̶jkku̶xy
22Tu̶u̶chpyojjooty najty, y jim Jerusalén najty xu̶u̶ jyadyii, je̱'e̱ mu̶jtzajptu̶jk najty jim yajwinxu̶u̶duumb. 23Jiiby je̱'e̱ Jesús najty ma je̱'e̱ mu̶jtzajptu̶jku̶ñ, y wyu̶dity najty ma je̱'e̱ mu̶jtzajptu̶jk winduuy mu̶dyiibu̶ je̱'e̱ ja'ay tyijpyu̶ñ ajku̶xy Salomón. 24Mu̶'it je̱'e̱ judío ja'ay jyu'ubigu̶u̶yu̶gu̶xy y yajtu̶u̶wu̶gu̶xy:
—¿U̶xtu̶ mu̶naanu̶ u̶u̶ch da'a xy'ok'awa'anaanu̶ ajku̶xy pu̶nu̶ miich je̱'e̱ Cristo? U̶u̶ch cham awaanu̶ky ajku̶xy tu̶y tu'uda'agy.
25Chi je̱'e̱ Jesús y'adzoowu̶ ajku̶xy:
—Tu̶ u̶u̶ch miich n'awaanu̶ ajku̶xy y ka'p u̶u̶ch miich je̱'e̱ n'ayuuk ndu̶y'ajt tu̶ xymyu̶bu̶jku̶ ajku̶xy. Ku̶xyu̶ tijaty u̶u̶ch nduumby mu̶u̶d u̶u̶ch je̱'e̱ nDeedy y'ane̱'e̱mu̶ñ, je̱' je̱'e̱ du'un wa'adzu̶ yajni'igu̶xu̶'kp ko u̶u̶ch nje̱'e̱ju̶ch je̱'e̱ Cristo; 26peru̶ miich ajku̶xy ka'p u̶u̶ch miich je̱'e̱ n'ayuuk ndu̶y'ajt xymyu̶bu̶jku̶ ajku̶xy, je̱' ko ka'p u̶u̶ch miich nborreegu̶'ajtku̶xy. 27Je̱'e̱ nborreegu̶ju̶ch xyo'kmu̶doobu̶ch je̱'e̱ ajku̶xy, y u̶u̶ch n'ixy'ajtku̶xypyu̶ch je̱' y xypyanú̶kxku̶xpu̶ch je̱'. 28U̶u̶ch je̱'e̱ jugy'ajtu̶ñ wiinu̶u̶xu̶u̶bu̶ nmo'owaangu̶xypy, y nimu̶naaxu̶u̶ kya'atu̶gooygyu̶xu̶ch y nan ni pu̶n u̶u̶ch je̱'e̱ ku̶'u̶jooty xykya'apu̶jku̶ch ajku̶xy. 29Je̱'e̱ mu̶dyiibu̶ u̶u̶ch je̱'e̱ Dios Teedy tu̶ xyajku̶'u̶du̶gu̶'u̶yu̶ñ mu̶j je̱'e̱ ni'igyu̶ ka'p du'un ni tiiju̶ñu̶ba,#10.29 Je̱' mu̶dyiibu̶ u̶u̶ch je̱'e̱ Dios Teedy tu̶ xyajku̶'u̶du̶gu̶'u̶yu̶ñ mu̶j je̱'e̱ ni'igyu̶ ka'p du'un ni tiiju̶ñu̶ba. Nije̱' wiingpu̶ jaaybyu̶du̶jk myu̶naangu̶xy: je̱'e̱ nDeedyu̶ch mu̶dyiibu̶ u̶u̶ch je̱'e̱ tu̶ xyajku̶'u̶du̶gu̶u̶ydya'ayu̶ñ, mu̶j je̱'e̱ ni'igyu̶ ka'p du'un ni tiiju̶ñu̶ba. y ni pu̶n je̱'e̱ mu̶baad kya'apu̶jkku̶xyu̶ mu̶dyiibu̶ ku̶'u̶jooty myu̶dajtypyu̶ñ. 30U̶u̶ch y je̱'e̱ Dios Teedy tu'ugyu̶ u̶u̶ch du'un ajku̶xy.
31Chi je̱'e̱ judío ja'ay tzaa ja'adu'ook konu̶'kku̶xy y ka'adzaangu̶xy je̱'e̱ Jesús najty, 32peru̶ je̱'e̱ Jesús ñu̶maayu̶gu̶xy:
—Tu̶ u̶u̶ch je̱'e̱ oybyu̶ may nduñ ma je̱'e̱ mwinduuy miich ajku̶xyu̶ñ mu̶u̶d u̶u̶ch je̱'e̱ nDeedy myu̶k'ajtu̶ñ, ¿y mu̶dyiibu̶ u̶u̶ch xyajku'uga'adzu̶'u̶waangu̶xp?
33Chi je̱'e̱ judío ja'ay y'adzoogu̶xy:
—Ka'p je̱' nyajku'uga'adzu̶'u̶waangu̶xypy ko je̱'e̱ oybyu̶ tu̶ mduñ, je̱' nyajku'uga'adzu̶'u̶waangu̶xypy ko je̱'e̱ Dios mu̶j mu̶gapxtu̶goy. Miich ja'ay miich, peru̶ du'un miich mnayyajnaxyii neby je̱'e̱ Diosu̶ñ.
34Chi je̱'e̱ Jesús ñu̶maayu̶gu̶xy:
—Ma je̱'e̱ mgu'utujku̶ñ miich ajku̶xyu̶ñ du'un jiiby kyuja'ayu̶ch: ‘U̶u̶ch du'un mu̶naan ko miich mdíosu̶ch ajku̶xy’. 35Yajnejwu̶u̶by du'un neby je̱'e̱ Dios ñaky myu̶na'añu̶ñ, y ka'p mu̶baad pu̶n myu̶na'añ ko du'un kya'ajaanchu̶ch, y dios je̱'e̱ Dios ja'ay xu̶u̶mooy je̱'e̱ mu̶dyiibu̶ je̱'e̱ y'ayuuk tyu̶y'ajt yajmu̶gue̱jxu̶ñ yajwa'kxu̶ch ajku̶xy. 36U̶u̶ch Dios u̶u̶ch tu̶ xywyin'ixy y tu̶ xykyéxyu̶ch ya naaxwiiñ, ¿y ti ko du'un mmu̶naangu̶xy ko u̶u̶ch je̱'e̱ Dios tu̶ nmu̶gapxtu̶goy, ko u̶u̶ch du'un tu̶ nmu̶na'añ ko u̶u̶ch je̱'e̱ Dios xy'Ung'aty? 37Pu̶nu̶ ka'p u̶u̶ch je̱'e̱ tuung nduñ mu̶dyiibu̶ u̶u̶ch je̱'e̱ nDeedy tyuumbyu̶ñ, ka'p u̶u̶ch je̱'e̱ n'ayuuk ndu̶y'ajt xymyu̶bu̶jku̶ ajku̶xy. 38Peru̶ pu̶nu̶ nduumbyu̶ch je̱' je̱'e̱ mu̶dyiibu̶ u̶u̶ch je̱'e̱ nDeedy tyuumbyu̶ñ; oy u̶u̶ch je̱'e̱ n'ayuuk ndu̶y'ajt xykya'amu̶bu̶jku̶ch ajku̶xy, peru̶ mmu̶bu̶jkku̶x je̱'e̱ mu̶dyiibu̶ u̶u̶ch nduumbyu̶ñ, wan mnejwu̶u̶ygyu̶xu̶ch ku̶xyu̶ wa'adzu̶ ko u̶u̶ch je̱'e̱ nDeedy mu̶u̶d n'ity y je̱' ijtp mu̶u̶d u̶u̶ch.
39Chi ja'adu'ook ja'amadzaangu̶xnu̶ba, peru̶ ke̱e̱k je̱'e̱ Jesús ka'p yajmajch.
40Chi je̱'e̱ Jesús ja'adu'ook wyimbijtnu̶ba Jordán mu̶jnu̶u̶'awiimb, y chi jim wyu̶'u̶mu̶u̶y ma je̱'e̱ Juan jékyu̶p jya'ayyajnu̶u̶béjtyu̶ñ. 41Mayjya'ay je̱'e̱ Jesús oy jim y'ixyii, y myu̶naangu̶xy najty:
—Tu̶y'ajtu̶ñ je̱'e̱ du'un, oy je̱'e̱ Juan ijxpe̱jt mu̶jwinma'añbyu̶ ni tu'ug ka'atuuñ, peru̶ du'un neby adayaaba ja'ay ku̶xyu̶ nigapxy nimu̶dyaakyu̶ñ, tu̶y'ajtu̶ñ najty je̱'e̱ du'un.
42May je̱'e̱ ja'ay mu̶bu̶jky ajku̶xy je̱'e̱ Jesús y'ayuuk tyu̶y'ajt ma je̱'e̱ jimbu̶ it lugaaru̶ñ.
Currently Selected:
San Juan 10: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005