1 KHO:KHAM 1
1
Kho:kham Davi Nho: Mao: Zo: Pyad
1Ana"- Kho:kham Davi wa gyai mao: mung: yao" daui daui mo, yao: re mai pho' vhe' gesho' ngadqere: yao: malam lo:ngad: ra". 2Airumung: yao" zug: qe wa yao: re kho:kham pho" we"- nao we' daga" na mung: nao re gun caung byid: nae" zomyi: dayaug ngonhaung" re qho nhao la,- yao: wa nao we' te' te' yab mung: nao re lam byid' li" nae"- ga: ta" ako". 3Yaung" ra" myiqe: nau" dayaug re Israel mung" geim" cao" qho: ako". Yao: bam wa airu: yaung" ra" Abishag ga: mang yaug re Shunem mae qho: qhug' ako". Yao: bam wa- yao: re kho:kham pho" jhao" jhui" lo: ako". 4Yao: wa gyai yaung" yaug ngad: ra". Yao: wa kho:kham pho" re lhaug' mung: gun caung byid' ra". Ngadqere: kho:kham pho" wa yao: we' gaung sho: majho" zam" ngad: ra".
Adoniya Kho:kham Ngad: Ga: Ta" Hau" Ra" Khyo
5-6Ana"- Absalom wa shid: byaug mung:- Davi we' Hagid- nho: yauggai zo: Adoniya wa na: dang: jo; ra" yauggai zo: qi" thao" yaug ngad: ra". Yao: wa gyai yaung" yaug ngad: ra". Davi wa pe" ja" khyo we' sin: yang: re: khonhae" re: yao: re maqeim: qu" ngad: ra". Yao: wa kho:kham kad' nae" kao bau: ra". Yao: wa yao: yao" qhid' mae" gyekhe' myao: lhin" jham- myao: jham we' qhid' mae su: nae" byu ngo" xe yaug re jaung: yu: ra". 7Yao: wa Yoab (yao: myhi" wa Zeruia ngad: ra") we' khinjaung Abiatha we' jho" qham mung: yao: shid' yaug wa yao: re bao" thaug' byid: nae" myid vang" byid' ako". 8Ngadqere: khinjaung pho" zadog- Yehoiada nho: yauggai zo: Benaia- Lapa pho" Nathan- Shimi- Rei bam we' Davi nho: kao lhaug mo, wa Adoniya shad' mae mabode, ko" ngad: ra".
9Daba mae- Adoniya wa yao jham- nung: jaung lo: jham- myhaug' to" ra" nung: nau" jham re Enroge qid baug: nhae mae" Lhao Maui laug bam mae xeim: ngaui" byid' ra". Yao: wa Davi nho: yauggai zo: gaje qere re: khai mung: Yuda mung" mae" kho:kham pho" zug: qere: re: ai: xeim: ngaui" poe khyo li" genae" qhid' mae" khai: ra". 10Ngadqere: yao: wa yao" yao: nhaung: Sholamon lapa Nathan- Benaia- Kho:kham pho" nho: kao lhaug' re wa mabo khai ngad: ra".
Sholamon Re Kho:kham Tang: Ko" Ra" Khyo
11Ai: thao- Nathan wa Sholamon nho: yao: myhi" Badsheba jhao" ye: mung: yao: re- Hagi nho: yauggai zo: Adoniya yao: yao: kho:kham tang" yu: ra" khyo re nao mathe' gyo: shi i? ga: myid' ra". Kho:kham Davi wa ai: khyo re pe" maba ngad: ra" lhe"- 12Ni" kao so' we' ni" yauggai zo: Sholamon nho: kao so' re nao khyad' yu nug: re wa- 13Ana" jao"- kho:kham pho" jhao" ye: mung: yao: re- Asang kho:kham we"- nga" zo: Sholamon ni" khu mae kho:kham kad' nhao nae" ga: nao ngore dao:so: byid' to" ra" mangad: i? Aire khoru: mung:- Adoniya wa kho:kham boe" lo va" i? ein: yeta" nae" yao: pha,jhi" byid' ra"- ga: ta" ra". 14Aimung: Nathan wa nao kho:kham pho" we' jho" jhau: na shiko" au:- ngo vao li" mung: nao ta" ra" khyo re jao dang ta" byid: nae" ga: bota" ra".
15Aimung: Batsheba wa yao" yab qe, mae na: ra" kho:kham pho" re yeqhug' ra". Yao: wa gyai mao" ava". Shunem mae" myiqe: nau" Abishag wa yao: re gun caung byid' na: ra". 16Badsheba wa kho:kham qhid' kheim: mae goe; gyo" ra"- Kho:kham pho" wa- nao pe" o: i? ga: myid' ra".
17Yao: wa- Asang kho:kham we"- nga" yauggai zo: Sholamon re ni" thao mae kho:kham kad' nhao nae" ga: ni" Mao"So Asang: mang re lao: yang: nao ngore gang" tang: ra" dao:so: byid' to" ra". 18Ngadqere: Adoniya wa kho:kham boe" jo; ava"- aikhyo re nao pe" maba ngad: ra". 19Yao: wa nung: jaung lo:- yao- myhaug' to" ra" nung: nau" myo: sho' re xeim: ngaui" byid: mung:- yao: wa ni" yauggai zo: qere we' khinjaung pho" Abiatha- ni" gyezug: pho" Yoab bam re ai: poe khyo khai to" ava". Ngadqere: ni" yauggai zo: Sholamon re wa yao: mabo khai ngad: ra". 20Asang kho:kham we"- Israel mung" byu qe alhab' wa ni" khu mae kho:kham khoyaug xo' kad' zai ngad rure yao: bam re ta" kyo: nae" nao re qu" na: ako". 21Nao airu: makad' re wa- nao shid we'- nga" yauggai zo: Sholamon we' ngo wa gyevo qere khyo" kad' ru qhug' nae" ngad: ra"- ga: ta" ra".
22Yao: dao: jhau: na shi" au:- Nathan wa kho:kham kho" khyo joe" li" ra". 23Lapa pho" aimae li" joe" na: ra" khyo kho:kham pho" re ta" kyo" ako". Nathan wa vao ye: mung: kho:kham pho" qhid' kheim: mae ye goe; gyo" ra". 24Ai: thao yao: wa- Asang kho:kham we"- Adoniya re ni" khu mae kho:kham kad' shao: ein: ta" pye' va" i? 25Ana" ba yao:- yao: wa nung: jaung lo: jham- yao jham- Myhaug' to" ra" nung: nau" jham myo: sho' re xeim: ngaui" byid: nae" ye" lo" byaug va". Yao: wa ni" yauggai zo: qe alhab' ni" gyezug: pho" Yoab- khinjaung pho" Abiatha- bam re khai: ra". Ana" za:- yao: bam wa yao: we' poe daga" kad' yang: kho:kham Adoniya kao qhang vashao: wo"- ga: zag: hug' na: ako". 26Ngadqere: asang we"- yao: wa ngo rere:- khinjaung pho" zadog rere:- Benaia rere:- Sholamon rere: makhai ngad: ra". 27Nao kho:kham cegu: alhab' re myid vang" mung:- ni" khu mae kho:kham khoyaug xo' kad' nae" rure ni" zug: qere lhao" mata" nhaung i? ga: ra" ra".
28Kho:kham Davi wa- Badsheba re dam: tug' vao lo nae" ta" mung:- yao: wa kho:kham pho" qhid' kheim: mae ye; jo; ra". 29-30Ailao"- yao: wa Badsheba re- ni" yauggai zo: Sholamon wa nga" khu mae kho:kham xo' kad' shao: ein: Israel Mao"So Asang mang mae ngo nao re byid' to" ra" dao: so re ana" ba ngo phug' cao" nae" ein: ra" khyo re nga" qug: khai: alhab' mae" ngore khyad' yu: ra" yaug- daui: na: ra" Asang re mang lao: yang: ngo nao re dao:so: byid' ra"- ga: ta" ra".
31Badsheba wa goe; gyo" mung:- nga" Asang kho:kham pho" wa apyad ato mae daui: na vashao: wo"- ga: ta" ra". 32Ai: thao kho:kham Davi wa Zadog- Nathan- Benaia bam re khai nhao: ke' ra". Yao: bam joe" vao li" gelao". 33Yao: wa nga" kho:kham kho" mae" zug: qere jhui mung: nga" yauggai zo: Sholamon re nga" loze mae zaung nhao ge,- aimung: Gihon qid thug' khyo yao: re jhui" gyo" ye: ge,. 34Aimae zadog we' Nathan wa yao: re- Israel kho:kham khyo" xau gyad byid: nae" ngad: ako". Ai: thao labo" mad mung:- kho:kham Sholamon kao qhang vashao: wo"- ein: hug' nae" ngad: ako". 35Ce: khyo yao" thao cao" tug' lo mung: yao: wa nga" kho:kham tao" mae lozaung: jo; li" nae". Yao: wa nga" khug mae kho:kham xo' kad' li" nae". Pe"mung:ga"re- yao: wa Israel we' Yuda mung" re eib: ra" yaug khyo" ngoyang khyin: to" ra" yaug ngad: ra"- ga: ta" ra".
36Benaia wa aire boe" sho' kad' zai ngad: ni" Mao"So Asang ai: mau" re jao dang kad' byid: vashao:- 37Asang wa nao kho:kham we' daga" na: lo: ru we' dakhyo:- yao: wa Sholamon we' re: daga" na mung: yao" eib: khang" ru wa ni" eib khang" ru tho' je: jo,nho" dai kham je yang: bo vashao: wo"- ga: tau" ra".
38Aimung: zadog- Nathan- Benaia bam we' kho:kham kao lhaug' yaug wa Sholamon re kho:kham Davi nho: loze dao mae zaung: nhao mung: Gihon qid thug' khyo yao: re jhui" gyo" ye" ako". 39Zadog wa Asang: qhid' kheim: Zaung mae" yao: yu: vin: ra" Zhan:lun: xau am re yu: yu mung: Sholamon re gyad byid' ra". Yao: bam wa labo" re mad: ke' mung: mo, byu qe alhab' wa kho:kham Sholamon kao qhang vashao: wo"- ga: zag: hug' ako". 40Ai: thao yao: bam alhab' mo, yao" thao cao" tug' lo mung: bau: geyang: hug' ru we' khalhao: mad mung: myid gaung nan" sho' thoe hug' yhau: ako".
41Adoniya we' yao" bang" vo qe alhab' poe bin: zo: ko" au:- yao: bam ai: yhau thoe re the' gyo" ako". Yoab wa labo" thoe re the' gyo: lao"- yao: wa ai: vomo" khug mae yhau: ra" thoe wa pe" lajheim: ngad: ra" i? ga: myid' ra". 42Yao: dao: mabin: jhau shire- khinjaung Abiatha nho: yauggai zo: Yonathan joe" li" ra". Adoniya wa vao li" ri:- nao wa byugai dayaug ngad: ra"- nao wa lau dao: gai vin: li" ru ngad nae"- ga: ta" ra".
43Yonathan wa- airu: mangad lhe"- Asang kho:kham Davi wa Sholamon re kho:kham tang: byid' ava". 44Yao: wa zadog- Nathan- Benaia bam we' kho:kham kao lhaug' yaug re Sholamon re jhui" ye: nhao: ra". Yao: bam wa yao: re kho:kham pho" nho: loze dao mae zaung nhao mung:- 45Zadog we' Nathan wa Gihon qid thug' mae kho:kham khyo" yao: re xau gyad byid' ako". Ai: thao yao: bam wa vomo" khug khyo dam: vao lo mung: bau: yang hug' ru we' mo,byu qe wa ana" yhai: na: ako". Ai: yhai thoe wa ana" naonhaung" the' gyo" ru ngad: ra". 46Ana"- Sholamon wa kho:kham ngad: ava". 47Aitho' mago"- kho:kham kho" mae" zug: qe wa kho:kham Davi re ye phug' myao: byid: mung:- ni" Mao"So wa nao tho' mae Sholamon re lahau: qi: nhao mung: Sholamon nho: eib khang" ru wa ni" eib khang" ru tho' jo,nho" dai kham bo vashao: vashao: wo"- ga: ta" ako". Ai: thao Davi wa yao" yab jaung: mae goe; gyo" yang: caung:pa" zo" re"- 48Ana" ba nga" myid:zo: qemae" dayaug re nga" khu mae kho:kham xo' kad' nhao mung: aire ngore myao nhao sho' daui: na nhao: ra" yaug Israel nho: Mao"So Asang re ngonhaung" caung:khin" gelang:- ga: akyu" mho' ra"- ga: ta" kyo" ra".
49Ailao"- Adoniya nho: bang" vo qe wa gyaug gemung: yao: bam alhab' mo, to" yang: yao: yaug yao: to" lo" ako". 50-51Adoniya wa Sholamon re gyai gyaug mung: Asang qhid' kheim: Zaung khug khyo vao ye: yang: phan nho: khyug jham mae yezaui" ci: ra". Adoniya wa Sholamon re gyaug mung: phan nho: khyug jham mae zaui" ci yang:- yao: yao: re mase' pye' nae" ga: kho:kham Sholamon jham thang: yang: ngore ta" nae" rure ngo sao qhid' o: ra"- ga: ta" ra" khyo Sholamon re ta" kyo" ako".
52Sholamon wa yao: jhaug' zaug yaug ngad: re wa yao" xae dakhe' re lhao" re: mayan" nae". Ngadqere: yao: jhaug' mazaug re wa yao: shid: li" nae"- ga: phaug' tau" ra". 53Kho:kham Sholamon wa Adoniya re khai nhao: ke' mung: phan mae" jhui" khyo" yu: ako". Adoniya wa kho:kham pho" jhao" vao ye: mung: yao" qhid' kheim: mae goe; gyo" ra". Kho:kham pho" wa- yao: re yham khyo lo" wa,- ga: ta" ra".
Currently Selected:
1 KHO:KHAM 1: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009