रोमी 6

पापे वश केआं छुड़कुण, त मसीह लिए जीण

1में बोलो बोकी पुठ मोखयाल कोउं जेईं ई बोलियाल कि “चले, अस पाप त गलती कते रेहन्ते, ताकि परमेश्वरे कृपा असी पुठ हउ बि भोल।” 2पर अउं बोता कि ना, कदी ना! किस कि अस पापे वश केआं छुड़की गो असे, होर गलती त पाप कर कइ हउ ना जीन्ते। 3तुस त जाणते ना कि अस सोब, जे यीशु मसीहे नओएं बइ पुओणि अन्तर चुसिए असे, तसे जुओई साते मर बि गो असे। 4तोउं त, तसे नओएं बइ पुओणि अन्तर चुस कइ मरणे बेलि जीं अस तेस जोई साते पथि बि गो असे, ताकि जीं बोउए अपु महिमाईं बेलिए मसीह मरो तेन्हि अन्तरा दुबारी जीआ, तिहांणि अस बि नोई जमणे जिन्‍दगी जीएल।

5त किस कि अस मसीहे मरण अन्तर तेस जोई मी गो असे, त जरूर तसे जीण अन्तर बि तेस जोई मीते। 6अस जाणते कि तेस जोई साते हें पुराणे सभाव बि क्रूस पुठ मर गे, ताकि गलती त पाप करणे हें सभाव मुक घियेल, त तढ़िया पता अस पापे गुलाम ना रिहेल। 7किस कि जे मर गा, से पापे वश केआं छुड़क कइ अजाद भोई गे। 8तोउं त, किस कि अस मसीह जोई साते मर गो असे, त हें विश्वास ईं असा कि अस तेस जोई साते जीन्ते बि। 9किस कि अस जाणते कि परमेश्वरे मसीह मरो तेन्हि अन्तरा दुबारी जीआ, त से फि कदी ना मरता; तेस पुठ फि मौत कदी जीत ना बटती। 10मसीह जपल मरा, से हें गलती त पापे लिए यके लिंगि मरा। पर से अभेईं परमेश्वर जुए सात बिशुण जे जीन्ता भोई गो असा। 11तोउं त, तुस बि अपु अपफ गलती त पाप करण जे मरोरे समझे, पर परमेश्वरे लिए मसीह यीशु अन्तर जीन्ते समझे।

12तोउं त, तुस अपु खतम भुणे बाड़े जिसम पुठ पापे इच्छाई हेसाब जुए जीण ना दिए कि पाप तुसी पुठ राज करेल। 13होर ना अपु जिसमे अंग अधर्मे हथियार बणुण जे पापे हवाले करे। पर अपु अपफ मरो तेन्हि अन्तरा जीन्ता भुओ समझ कइ परमेश्वरे हवाले करे त अपु अंग धरमे हथियार बणुण जे परमेश्वरे धे दिए। 14तुस कदी पापे वश अन्तर ना रिहे, किस कि तुं जीण नियमे वश अन्तर ना, पर परमेश्वरे कृपाई वश अन्तर असु।

पापे गुलामी केआं छुड़की कइ धरमे गुलाम बणुण

15मोखयाल कोउं जेईं ई बोलियेल कि “चले, अस गलती त पाप कते रेहन्ते, किस कि अस नियमे वश अन्तर नेईं, बल्कि परमेश्वरे कृपाई वश अन्तर असे।” अउं बोता, कदी ना। 16कि तुस ना जाणते ना कि जेसे निआंग मानणे लिए तुस अपफ जे तेयारेरते, तसेरी गुलाम बणते। चहे तुस पाप करण लिए अपफ जे तेयारेरते, जेसे अखिर फल मौत असी, त तुस पापे गुलाम बण गो असे। होर चहे तुस परमेश्वरे निआंग मानणे लिए अपफ जे तेयारेरते, जेसे बेलिए तुस धर्मी कम कते, त तुस तसेरी गुलाम असे। 17पर परमेश्वरे धन्यवाद लौता भो कि तुस जे पेहले पापे गुलाम थिए, अब पूरे मन जुए तेस शिच मानणे बाड़े बण गे, जे तुसी मेओ थी। 18होर पापे वश केआं छुड़क कइ तुस धर्मी परमेश्वरे गुलाम बण गे। 19ई सोब बोक समझाणे लिए तुस कमजोर असे। तोउं त मेईं गुलामी के मशाल दी कइ बोलो असु। त जीं तुसी अपु अंग अधर्मे कमे लिए त पापे गुलाम बणाई छो थिए, तिहांणि अब अपु सम्हाई अंग शुचा भुणे लिए धर्मी परमेश्वरे गुलाम बणाई छड़े।

20जपल तुस पापे गुलाम थिए, त धर्मी परमेश्वरे निआंग मनण केआं अजाद थिए। 21पर तेस अजादी बेलि तुं की फायदा भुआ? तुसी त अब तेन्हि कमी हेर शरम एन्ती, किस कि तेन्हि कमी के अखिरि फल मौत असी। 22पर अब पाप केआं अजाद भोई कइ त परमेश्वरे गुलाम बण कइ तुसी जे फायदा भो असा, तसे बेलिए तुस शुचे भुन्ते, त अखिर अन्तर अमर जीवन मेता। 23किस कि पाप करणे मजूरी मौत असी, पर परमेश्वरे वरदान हें प्रभु मसीह यीशु अन्तर अमर जीवन असा।

Currently Selected:

रोमी 6: pgg

Highlight

Compare

Copy