प्रतिनिधि 8
8
यहूदिया त सामरिया राज्य अन्तर उगाही देण
(8:1—12:25)
शाऊल सतसंग भुंजाण
1पर शाऊल स्तफनुस मारण जे पूरा राजि थिआ। तेस रोज केआं यरुशलेम शेहरे सतसंग अन्तर सुआ अशी आई। सद प्रतिनिधि छड़ दी कइ होर सोब विश्वासी यहूदिया त सामरिया राज्य अन्तर खिल्हिर गे। 2कुछ भक्त मेह्णु स्तफनुस कब्र अन्तर छड़ा त तसे जे शोक किआ। 3पर तिखेईं शाऊल सतसंग भुंजाण लगो थिआ; होर गी गी घेई कइ मड़दी त जिल्हाणु ढीड़ ढीड़ कइ जेहेल अन्तर छाण लगो थिआ।
सामरिया राज्य अन्तर प्रतिनिधि फिलिप्पुस
4त जे विश्वासी इएर-ओवर खिल्हिर गो थिए, से खुश खबरी प्रचार कते रिहे। 5प्रतिनिधि फिलिप्पुस सामरिया राज्य घेई कइ मेह्णु अन्तर मसीहे खुश खबरी शुणाण लगा। 6जपल मेह्णु फिलिप्पुसे बोके शुणी, होर तेसे बेलि भुणे बाड़े चमत्कारे निशाणी हेरी त तेन्हि यक चत भोई कइ तसे बोकी पुठ मन ला। 7किस कि सुआ जेईं अन्तरा लियारी दी दी कइ जुठी आत्मा बाहर निस गई, होर सुआ अदरंगे बीमार मेह्णु त लटे बि ठीक भोई गे। 8ईं भोई कइ तेस शेहर अन्तर सुआ खुशी एई गई।
जादूगर शिमौन
9पर तेस शेहर अन्तर शमौन नओएं यक मेह्णु थिआ। पेहले पेहले से जादू टौणा कर कइ सामरी मेह्णु हैरान कताथ त अपफ जे महान बोताथ। 10मठुड़ केआं बोडे तकर सोब जेईं तसे इज्जत कर कइ बोतेथ, “ए मेह्णु परमेश्वरे से शक्ति भो, जे ‘महाशक्ति’ बोलिन्ती।” 11तेन सुआ रोज केआं अपु जादू बइ से सोब हैरान कइ रखो थिए। तोउं त से तसे बोक मानतेथ। 12पर जपल तेन्हि फिलिप्पुस केईआं परमेश्वरे राज्य बारे त यीशु मसीहे नओएं खुश खबरी शुणी त तस पुठ विश्वास किआ। होर कि मड़द कि जिल्हाणु सोबी पोण अन्तर चुसिए। 13त शमौने बि विश्वास किआ त पुओणि अन्तर चुस कइ फिलिप्पुस जोई साते बिशण लगा। से फिलिप्पुसे बेलि भुणे बाड़ी निशाण त बोडे बोडे चमत्कारे कम हेर कइ हैरान भोई घेन्ताथ।
14जपल से प्रतिनिधि, जे यरुशलेम शेहर अन्तर थिए, शुणु कि सामरी मेह्णु परमेश्वरे वचन मनण लग गे, त तेन्हि पतरस त यूहन्ना सामरिया राज्य जे लंघाए। 15तेन्हि दुहि घेई कइ तेन्हि जे प्रार्थना की कि तेन्हि शुची आत्मा मेईंयेल। 16किस कि अपल तकर शुची आत्मा तेन्हि बुचा केसे पुठ बि ना थी अओ; से त सद प्रभु यीशु नओएं बेलि पुओणि अन्तर चुसिए थिए। 17तोउं पतरस त यूहन्ना तेन्हि पुठ हथ रखा त तेन्हि पुठ शुची आत्मा एई गई।
18जपल जादूगर शमौने हेरु कि प्रतिनिधि के हथ रखणे बेलिए शुची आत्मा मेती, त तेन रुपेई नी कइ तेन्हि जे बोलु, 19“एस शक्ति मेन्धे बि दिए कि जेस केसे पुठ अउं हथ रखुंण त तेस बि शुची आत्मा मेईंयेल।” 20पर पतरसे तेस जे बोलु, “तें रुपेई तोउ जोई खतम भोई गो लौते, किस कि तेईं सोचु कि रुपेई दी कइ तोउ परमेश्वरे वरदान मेई सकता। 21एस अन्तर ना तें कोई बांट असी होर ना कोई हेस्सेदारी; किस कि तें मन परमेश्वरे अगर सच्चा नेईं। 22तोउं त, इस बुराई केआं अपु मन बदलीण दे त प्रभु जे प्रार्थना कर कि तें मने ई बुरे विचार माफ करियेल। 23किस कि मोउं लगतु कि तें शंकरेड़ तकर जड़ा-टाड़ा भरिए असा त तु पापे बेलि चिसी गो असा।” 24शमौने जवाब दिता, “ना जी, ईं न करे! तुस मोउं जे प्रभु केईं प्रार्थना दुआ करे कि जे बोके तेईं बोली, तेन्हि बुचा कोई बि मोउं पुठ ना एईयेल।” 25पतरस त यूहन्ना जपल उगाह दी कइ प्रभु वचन शुणाई छे, त से यरुशलेम शेहर जे घेई गे। तेन्के इस सफर अन्तर तेन्हि सामरिया राज्ये सुआ ग्राईं ग्राईं खुश खबरी शुणान्ते गे।
कूश देशे राजे अधिकारी यीशु पुठ विश्वास करण
26फि प्रभु यक स्वर्गेदूते प्रतिनिधि फिलिप्पुस जे बोलु, “खड़ भो त दखणे दिशाई कना जे, तेस बत जे गा, जे यरुशलेम शेहर केआं गाजा शेहर जे घेन्ति। ए रुणे बथ भो।” 27त से खड़ भोई कइ घेई गा, त हेरता की? कूश#8:27 कूश देश: दखण मिस्र त सुदान देश जे बोतेथ। देशे यक राजे अधिकारी तेनबाई अओ थिआ, जे कूश देशे राणी कन्दाके मन्त्री त खजांची थिआ। से परमेश्वरे पूजा अराधना करण जे यरुशलेम शेहर जे अओ थिआ। 28से अपु रथ पुठ सवार भोई कइ वापस घेन्त पेंत यशायाह भविष्य वक्ते लिखो कताब पढ़ुण लगो थिआ। 29तोउं शुची आत्माई फिलिप्पुस जे बोलु, “भेएड़ घेई कइ एस रथ जोई साते गा।” 30फिलिप्पुस तसे भेएड़ जे दौड़ा त तस यशायाह भविष्य वक्ते लिखो कताब पढ़ण शुण कइ पुछु, “तुस जे पढ़ुण लगो असे, तेस समझते बि ना?” 31तेन बोलु, “जपल तकर कोउं मोउं समझाल नउ त अउं कीं समझता?” तोउं तेन फिलिप्पुसे छनेअरे कर कइ बोलु कि से बि रथ पुठ चढ़ कइ तसे भेएड़ बिशे। 32धरमे कताबे जे भाग से पढ़ुण लगो थिआ, से ईं थिआ:
“से ढडुड़ ईं कटण जे नीइ गा,
होर जीं केउ अपु नितणे बाड़े सामणि अडोल बिश घेन्तु,
तिहांणि तेन बि अपु मुंह न खोलु।
33तेस जोई बेज्जती त अन्याय भुआ, किस कि से चुपचाप बिशा।
तसे कोई पीढ़ी नेईं,
किस कि तसे प्राण धरती पुठा नी छो असे।”#यशायाह 53:7-8
34तोउं तेन राजे अधिकारी फिलिप्पुस केआं पुछु, “अउं तें छनेअरे कता, भविष्य वक्ता ईं केसे बारे बोता, अपु या केसे होरी बारे?” 35त फिलिप्पुस बोलुण लगा। तेन धरमे कताबी एस भागी अपु बोके मतलब बणाई कइ तस यीशु खुश खबरी शुणाई। 36घेन्त पेंत से यक पाणि लाबु केईं पुजे। तोउं तेन राजे अधिकारी बोलु, “हेर, इठि पुओणि असु। अब मोउं पुओणि अन्तर चुसीण केआं रोक त नेईं ना।” 37[फिलिप्पुसे बोलु, “अगर तु पूरे मन जोई विश्वास कता त चुसी सकता।” तेन जवाब दुतु, “अउं विश्वास कता कि यीशु मसीह परमेश्वरे कुआ भो।”]#8:37 कुछ पुराणे लेख अन्तर ए भाग नेईं। 38तोउं तेन रथ खड़ेरणे बोलु। त फिलिप्पुस त से राजे अधिकारी दुहे जेईं पुओणि बुच घेई गे, त तेन से राजे अधिकारी पाण अन्तर चुसा। 39जपल से पुओणि अन्तरा बाहर आए, त प्रभु आत्मा फिलिप्पुस घिन गई, त तेन राजे अधिकारी से फिर ना काआ। से राजे अधिकारी खुशी जोई अपु बथ घेई गा। 40पता फिलिप्पुस अशदोद शेहर अन्तर केई गा। तोउं जपल तकर से कैसरिया#8:40 कैसरिया शेहर यक बंदरगाह असा त ए पतलमियास बंदरगाहे दखण दिशा अन्तर कोई 64 किलोमिटर दूरी पुठ असा। शेहर न पुजा, तपल तकर ग्राईं ग्राईं खुश खबरी शुणान्ता गा।
Currently Selected:
प्रतिनिधि 8: pgg
Highlight
Share
Compare
Copy
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.
