1 तिमुथि 3
3
सतसंगे मुखिया
1ए त सच्ची बोक असी कि जे मुखिया बणुण चहन्ता, तेन खरु कम करणे मन किओ असा। 2त इ जरूरी असु कि मुखिया दोषी ना लौता, त यके जुएली धाणि लौता, फर्तुआटा ना लौता, मेह्णु जुए सुसुर बिशणे बाड़ा लौता, जेसे मेह्णु इज्जत कते। से सेवा पाणि करणे बाड़ा लौता त बधिया शिचालणे बाड़ा लौता।#तीतुस 1:6-9 3ना प्याकड़, ना कुटीण बाड़ा, ना झगड़ीण बाड़ा त ना लालची लौता, बल्कि से खरा लौता। 4तेन अपु टब्बरे खरा ख्याल रखो लौता त अपु गभुर बि वश अन्तर रखो लौते। 5(किस कि जे अपु टब्बरे सुसुर ख्याल ना रख बटता, से परमेश्वरे सतसंगे कीं ख्याल रखता?) 6फि नोउआं विश्वासी ना भुण चहिए, किस कि ईं ना भुओ लौतु कि से रोभ किढ़ाल त शैताने ईं सज्जा मेईंयेल। 7विश्वासी मेह्णु छड़ दी कइ होरे मेह्णु के बुच बि मुखिये खरी इज्जत भो लौती। ई ना भुओ लौतु कि तेन्हि मेह्णु के चाथि के बझई जुए जीं जानवर जाल अन्तर फस कइ छूट ना बटते, तीं से बि शैताने जाल अन्तर फस घियेल।
सतसंगे सेवक
8तीं सतसंग अन्तर जे सेवक भुन्ते से इज्जतदार लौते। से ढोंगी त प्याकड़ ना लौते, होर अपु फायदे लालची बि ना लौते। 9पर परमेश्वरे दुतो विश्वासे सच्चा वचन अपु अन्तरात्मा अन्तर रखणे बाड़े लौते। 10इन्हि सेवकी बि पेहले परखुण जरूरी असु। तोउं अगर नरदोष मेईंयेल त से सतसंगे सेवक बणाण। 11तिहांणि जिल्हाणु बि इज्जतदार लौती। से दोष लाणे बाड़ी ना लौती, बल्कि खरी त हर बोक पुठ यकीन करणे लेएक लौती। 12सेवक यके जुएली धाणि लौता, अपु गभुरु त अपु टब्बरे बधिआ ख्याल रखणे बाड़ा लौता। 13किस कि जे सेवके कम सुसुर कते तेन्हि खरी इज्जत मेती त यीशु मसीह पुठ जे विश्वास असा तस बोलुण जे बि सुआ हिम्मत मेती।
बोडी नियको बोक
14मोउं उम्मीद असी की अउं झट तोउ केईं जे एन्ता, फि बि ई चिट्ठि तोउं लिखुण लगो असा 15कि अगर मोउं एण अन्तर चेरे भोई घियेल त तोउ पता लगियेल कि जीन्ता परमेश्वरे गी, जे कि सतसंग असा, तथ अन्तर मेह्णु कीं उरतुण-बरतुण, किस कि से सच्चाई थम त खाई भो। 16होर एथ अन्तर कोई शक नेईं कि हें विश्वासे नियोको बोक सुआ बोडी असी:
यीशु मसीह मनख बण कइ जमा,
शुची आत्माई तस धर्मी बोलु,
तेन स्वर्गेदूती दर्शण दिते,
त तेस बारे पूरी धरती पुठ प्रचार भुआ,
धरती पुठ सुआ मेह्णु तेस पुठ विश्वास किआ,
त परमेश्वर बोडी महिमा जुए तस स्वर्ग जे घिन गा।
Currently Selected:
1 तिमुथि 3: pgg
Highlight
Share
Copy
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.
