गलाती 1

पावलके ओहोँरसे नमस्कार

1मै पावल, तुहुरिन्हे यी चिट्ठी लिखतुँ, और मै एकथो निउतरह्या हुइतुँ। मै निउतरह्या हुइक लग मनैनके समूह या मनैनके माध्यमसे नै रोजगिनु। पर महिन्हे येशू ख्रीष्ट और वहे परमेश्वर बाबा रोज्लाँ, जे येशू ख्रीष्टहे मुअलमेसे जिवैलाँ। 2और मोरिक संग रहल सक्कु विश्वासी भैयनके ओहोँरसे मै यी चिट्ठी गलातिया प्रदेशमे रहल मण्डलीक विश्वासीनके समूहहे लिखतुँ।

3मै प्राथना करतुँ कि हमार परमेश्वर बाबा और प्रभु येशू ख्रीष्ट तुहुरिन्हे अनुग्रह और शान्ति दिँत। 4हमार परमेश्वर और बाबक इच्छा अनुसार ख्रीष्ट येशू अपनहे अप्निहीँ हमार पापके कारण बलिदान करदेलाँ ताकि हम्रे यी वर्तमान संसारके मनैनके खराब प्रभावसे बँचल रहे सेकी। 5मै प्राथना करतुँ कि मनै परमेश्वरके महिमा सदादिन कर्ती रहिँत। आमेन! (यकर मतलब हुइत, अस्तेहेँ होए।)

कौनो दोसुर खुशीक खबर नै हो

6मै निराश बतुँ, कि जोन परमेश्वर तुहुरिन्हे ख्रीष्टके अनुग्रहसे बलैलाँ, हुँकिन्हे अतरा झत्ति छोरके तुहुरे एकथो दोसुर मेरिक शिक्षाहे स्वीकार करलेलो, जिहिहे कौनो-कौनो मनै खुशीक खबर हो कहिके कथाँ। 7एक्केथो किल सच्चा खुशीक खबर बा। पर कौनो-कौनो मनै तुहुरिन्हे भ्रममे पारे चहथाँ, और ख्रीष्टके खुशीक खबरहे बिगारे चहथाँ।

8पर यदि हमारमेसे कौनो एक जाने या स्वर्गमेसे एकथो स्वर्गदूत फेन आके हमार सुनैलक खुशीक खबर बाहेक कौनो दोसुर मेरिक खुशीक खबर सुनाई कलेसे परमेश्वर ओइन्हे सदाकालके दण्ड दिँत। 9जसिके मै तुहुरिन्हे पहिले फेन कहिसेकल बतुँ। ओस्तेहेँके मै फेनदोस्रे तुहुरिन्हे कहतुँ कि जोन खुशीक खबरहे तुहुरे स्वीकार कर्ले बतो। ओकर उल्टा केऊ तुहुरिन्हे दोसुर मेरिक खुशीक खबर सुनाई कलेसे परमेश्वर उहिहे सदाकालके दण्ड दिँत। 10यी फरछ्वार बा कि मै मनैनहे खुशी बनैना कोशिस नै करथुइतुँ। पर मै परमेश्वरहे खुशी बनाई चहथुँ। यदि मै अभिनसम मनैनेहे खुशी बनैती रतुँ कलेसे मै ख्रीष्टके सेबक नै रतुँ।

पावलके बोलावत

11हे मोरिक विश्वासी भैयो, मै तुहुरिन्हे बतादेहतुँ कि जोन खुशीक खबर मै तुहुरिन्हे सुनैले बतुँ, उ खुशीक खबर मनैनके बनाइल नै हो। 12काकरेकी मै यी कौनो पुर्खनसे नै भेटैनु, और ना ते महिन्हे कौनो धार्मिक गुरु सिखैलस। पर येशू ख्रीष्ट महिन्हे यी खुशीक खबर बुझक लग सहायता करलाँ।

13-14हे भैयो, तुहुरे जन्थो कि जब मै यहूदी धरमके नियम पालन करुँ ते कसिके जिअतुहुँ। मोरिक बहुत्ते संघरियन जेने मोरिके उमेरके रहिँत, ओइने फेन यहूदी धरमके नियम पालन करतिहिँत। पर मै उ सक्कुहुन्हे नियम कानुन पालन करनामे जितगिनु। काकरेकी मै अपन पुर्खनके रीति-रिवाजहे अपन पूरा मनसे पालन करतुहुँ। उ समयमे येशूहे विश्वास करुइया मण्डलीक उ विश्वासीनहे सताइक लग मै हिर्गरेसे दँतल रहुँ, जेने परमेश्वरके आराधना करिँत। मै उ सक्कुहुन्हे नाश करना कोशिस कर्ले रहुँ।

15-16पर तब्बेहेँ परमेश्वर अपन छावाहे मोरिकमे प्रकट करना निर्णय करलाँ, ताकि मै गैर-यहूदिनके बिच्चेम जाके येशूक बारेमे प्रचार करे सेकुँ। परमेश्वरे हुइँत जे महिन्हे मोरिक जलम हुइनासे पैलेहेँ रोजलेलाँ। और अपन अनुग्रहक कारण ऊ महिन्हे अपन सेवा करक लग बलैलाँ। जब येशू अपनहे मोरिकमे प्रकट करलाँ, तब मै सल्लाहा लेहक लग केक्रो थेन नै गैनु। 17और जेने महिन्से आघे निउतरह्या बनगिल रहिँत, ओइन्से भेँटा करक लग मै यरुशलेम शहरमे नै गैनु; पर मै तुरुन्ते अरब देशमे चलगिनु, और वहाँसे मै दमस्कस शहरमे फिर्ता होगिनु।

18तब तीन साल पाछे मै पत्रुस (केफास) हे भेँटा करक लग यरुशलेम शहरमे गैनु, और ओकर थेन मै पन्द्र दिनसम रनु। 19पर मै याकूबसे किल भेँटा कर्नु, जे एकथो निउतरह्या और प्रभुक भैया रहे। 20परमेश्वर जन्थाँ कि जोन बात मै तुहुरिन्हे लिखतुँ उ बात पूरा रुपमे सच्चा बा।

21उ निउतरह्यनसे भेँटा करके सेकके मै सिरिया प्रदेश और किलिकिया प्रदेशमे गैनु। 22उहिसे आघे यहूदिया प्रदेशके मण्डलीक विश्वासीन व्यक्तिगत रुपसे महिन्हे कबु नै देखल रहिँत। 23पर ओइने अतरा किल सुनल रहिँत कि एक समयमे जे हम्रिहिन्हे सताइतेहे, आब वहे मनैया येशू ख्रीष्टमे उ विश्वासके प्रचार करता, जोन विश्वासहे ऊ नाश करना कोशिस करल रहे। 24तबेकमारे ओइने परमेश्वरके महिमा कर्ती रथाँ। काकरेकी परमेश्वर महिन्हे एकथो सतुइया मनैयामेसे ख्रीष्टके अनुयायीक रुपमे बदलदेलाँ।

Currently Selected:

गलाती 1: DVGNT

Highlight

Copy

Compare