कलस्सी 3

पवित्र जीवन बितैना शिक्षा

1यी असिके हो जसिके परमेश्वर तुहुरिन्हे मुअलमेसे जिवैलाँ, जब ख्रीष्टहे ऊ मुअलमेसे जिवैलाँ। तुहुरे उ चिजमे मन लगाऊ, जोन चिज परमेश्वर तुहुरिन्के लग स्वर्गमे धारल बताँ। जहाँ परमेश्वरके थेन ख्रीष्ट सक्कुहुनसे सम्मानित ठाउँमे बैठ्लाँ। 2पृथ्वीक चिजमे नै होके स्वर्गक चिजमे अपन ध्यान लगाऊ। 3तुहुरे अपन पापी स्वभावके लग मुगिल बतो, और तुहुरिन्के जीवन ख्रीष्टके संग परमेश्वरकेमे नुकल बा। 4ख्रीष्ट, जे तुहुरिन्हे लावा जीवन देहत, जब ऊ यी संसारमे फिर्ता अइहीँ तब तुहुरे फेन अइबो और हुँकार महिमामे शामिल हुइबो। 5तबेकमारे तुहुरे उ खराब काम करना छोरदेऊ, जोन काम तुहुरिन्के पापी स्वभावसे सम्बन्धित बा। और जोन पृथ्वीमे बताँ जसिके कि व्यभिचार, अशुद्धता, कामुकता और खराब इच्छा। और लाल्ची ना बनो, जोन मूर्तिपुजा करल हस हो। 6मनै यी खराब काम करथाँ, तबेकमारे परमेश्वर पक्कै फेन ओइन्हे कर्रा दण्ड दिहिन। 7और तुहुरे फेन, जब यी खराब बातमे जीवन बिताइतोहो, तब तुहुरे फेन अस्ते काम करो। 8पर आब तुहुरिन्हे यी सक्कु बातहे छोरदेहे परी, जसिके कि क्रोध, रीस, बिह्रे मुना और दोसुर जहनके बारेमे खराब बात बत्वैना। 9एकदोसुर जहनसे झूँट ना बोलो, काकरेकी तुहुरे अपन पुरान पापी स्वभावहे और सक्कु खराब कामहे छोरदेले बतो। 10और आब तुहुरे लावा मनै बनगिल बतो। तुहुरिन्हे बनुइया परमेश्वर तुहुरिन्हे धेउरसे धेउर अपन नन्हेँ बनाइतताँ, ताकि तुहुरिन्हे अपन बारेमे पूरा ज्ञान देहे सेकिँत। 11तबेकमारे ग्रीक और यहूदिनके बिच्चेम कौनो भेदभाव नै हो। ना खतना करल ना ते खतना नै करल, ना असभ्य ना ते विदेशी, ना ते नोकर और ना ते ऊ, जे नोकर नै हो। पर ख्रीष्ट किल एकथो बताँ जे महत्त्वपूर्ण बताँ, और ऊ अपन सक्कु मनैनमे रथाँ।

ख्रीष्टियन जीवन

12जब कि परमेश्वर तुहुरिन्हे अपन पवित्र मनै हुइक लग चुनल बताँ, और तुहुरिन्हे प्रेम करथाँ। तबेकमारे तुहुरे करुणा, भलाई, दीनता, नम्रता और सहनशीलता धारण करो। 13और एकदोसुर जहनसे सहना और माफ करना भावना बनैले रहो। यदि तुहुरिन्हे किहुसे कौनो गुनासो बा कलेसे उहिहे ओस्तेहेँके माफी करो, जसिके प्रभु तुहिन्हे माफ कर्ले बताँ। 14सक्कुहुनसे खास काम जोन तुहुरिन्हे करे परना हो, उ यी हो कि तुहुरे एकदोसुर जहनहे प्रेम करो। असिक करके तुहुरे पूरा रुपसे एकजुट होजिबो। 15ख्रीष्टके देना शान्तिहे तुहुरिन्के मनमे राज करे देऊ। काकरेकी तुहुरे सक्कु जाने एकथो शरीरके अंग हुइतो। तबेकमारे तुहुरिन्हे एकदोसुर जहनके संग शान्तिसे रहक लग बलागिल बा। और सदादिन धन्यवाद कर्ती रहो। 16हरेक समय ख्रीष्टके सन्देशके बारेमे सोँचो, ताकि यी बात उ सक्कु बातहे नियन्त्रण करे, जोन तुहुरे करथो और सोँच्थो। और पूरा बुद्धिमानीसे एकदोसुर जहनहे सिखाऊ। और चेतावनी देऊ। और अपन-अपन मनमे धन्यवादके संग परमेश्वरके लग भजन और स्तुति गीत और आत्मिक गीत गाऊ। 17ज्या बात तुहुरे बोल्थो या करथो, सक्कु चिज प्रभु येशूक नाउँसे करो, और प्रभु येशूक माध्यमसे परमेश्वर बाबाहे धन्यवाद चह्राऊ।

ख्रीष्टियन परिवार सम्बन्धी शिक्षा

18हे जन्नी मनै, तुहुरिन्हे अपन-अपन थरवक अधिनमे रना चाही। काकरेकी ख्रीष्टके विश्वासी हुइलक ओहोँरसे तुहुरे असिक करे परना हो। 19हे थारु मनै, अपन-अपन जन्नीनहे प्रेम करो, और ओइन्से नम्र रहो। 20हे छाईछावन, ज्या चिज तुहुरिन्के दाईबाबा करे कहिहीँ उहिहे करो। काकरेकी यिहिसे प्रभु खुशी हुइथाँ। 21हे बाबन, अपन छाइछावनहे रीस ना उठाऊ, असिन ना होए कि ओइने निराश होजाँइत, और उ करना बन्द करदिँत जिहिसे परमेश्वर खुशी हुइथाँ। 22हे नोकरहुँक्रे, जेने यी संसारमे तुहुरिन्के मलिक्वा हुइँत, सक्कु बातमे ओइन्के आज्ञा पालन करो। उ मनैनके हस ना करो, जेने मनैनहे खुशी बनाइक लग देखैथाँ। पर ईमानदारी और परमेश्वरके डरके संग ओइन्के बात मानो। 23ज्या चिज तुहुरे करथो उहिहे तुहुरे पूरा मनसे करो। यी सोँचके कि मनैनके लग नै हो पर प्रभुक लग करतो। 24काकरेकी तुहुरे जन्थो कि प्रभु तुहुरिन्हे ईनाम दिहीँ। जोन यी हो कि ऊ तुहुरिन्हे उ आशीषमेसे तुहुरिन्के बख्रा दिहीँ, जोन आशिष ऊ अपन सक्कु मनैनके लग तयार कर्ले बताँ। तुहुरे प्रभु येशू ख्रीष्टके सेवा कर्ती रहो। 25काकरेकी जे खराब काम कर्ती रही, परमेश्वर उहिहे दण्ड दिहीँ; परमेश्वरमे किहुहे फेन पक्षपात नै हुइत।

Currently Selected:

कलस्सी 3: DVGNT

Highlight

Copy

Compare