कलस्सी 1

1मै पावल यी चिट्ठी लिखतुँ। परमेश्वरके इच्छासे मै येशू ख्रीष्टके एकथो निउतरह्या हुइतुँ। और विश्वासी भैया तिमोथीक ओहोँरसे, 2ख्रीष्टमे उ परमेश्वरके पवित्र मनैनहे और विश्वासयोग्य भैयनहे जेने कलस्सी शहरमे रथाँ। हमार परमेश्वर बाबा तुहुरिन्हे अनुग्रह और शान्ति देती रहे।

धन्यवाद ज्ञापन और प्राथना

3जब हम्रे तुहुरिन्के लग प्राथना कर्थी, तब हम्रे अपन प्रभु येशू ख्रीष्टके बाबा अर्थात परमेश्वरहे धन्यवाद देथी। 4काकरेकी हम्रे सुनल बती कि तुहुरे ख्रीष्ट येशूमे विश्वास करथो, और परमेश्वरके सक्कु पवित्र मनैनहे प्रेम करथो। 5तुहुरे असिन उ आशक कारण करथो, जोन तुहुरिन्के लग स्वर्गमे धारल बा। तुहुरे पैलेहेँ यकर बारेम सुनल बतो। जब सुरुकचो मनै तुहुरिन्के थेन अइलाँ, और तुहुरिन्हे येशू ख्रीष्टके बारेमे खुशीक खबर सुनैलाँ, जोन कि परमेश्वरके सच्चा सन्देश हो। 6जोन सन्देश तुहुरिन्के थेन पुगल बा, और सारा संसारमे फैलता, और बहुत्ते मनै विश्वास करतताँ। असिके तुहुरिन्के बिच्चेम उ समयसे हुइता, जोन दिनसे तुहुरे उ सन्देशहे सुन्लो। और उ सच्चा सन्देशहे पूरा रुपमे बुझगिलो कि परमेश्वर कतरा दयालु बताँ। 7तुहुरे उ सच्चा सन्देश इपाफ्राससे सुन्लो, जे हमार लग ख्रीष्टके विश्वासयोग्य सेबक हो। 8ऊ हम्रिहिन्हे दोसुर मनैनकेमे करना तुहुरिन्के प्रेमके बारेमे बताइल, जोन प्रेम पवित्र आत्मा तुहुरिन्हे देले बा। 9तबेकमारे जोन दिनसे हम्रे यी सुनल बती, वहे दिनसे हम्रे रोट्दिन तुहुरिन्के लग प्राथना करल बती। कि परमेश्वरके आत्मा तुहुरिन्हे ज्ञान और अक्किल दिँत, ताकि तुहुरे हुँकार इच्छाहे पूरा रुपसे बुझे सेको। 10ताकि तुहुरे ओस्तेहेँके व्यवहार करो, जसिके प्रभुक मनै होके व्यवहार करे परना हो। तब तुहुरे हरेक मेरसे प्रभुहे खुशी बनैबो, और तुहुरे हरदम हरेक मेरके मजा काम करबो, और तुहुरे परमेश्वरके बारेमे आकुर धेउर जन्तीजिबो। 11मै प्राथना करतुँ कि परमेश्वर अपन महिमामय शक्तिक प्रयोग करके तुहुरिन्हे बहुत बल्गर बनाइँत, ताकि तुहुरे धैर्य और आनन्दसे अपन दुःखहे सहे सेको। 12और परमेश्वर बाबाहे धन्यवाद देती रहो, जे तुहुरिन्हे उ उत्तराधिकारमे शामिल हुइना योग्यक बनाइल बा। जोन उत्तराधिकार ऊ स्वर्गक राजमे अपन पवित्र मनैनके लग तयार कर्ले बा। 13काकरेकी वहे हम्रिहिन्हे शैतानके शक्तिसे छुटाके अपन दुलार छावक राजमे लेके आइल। 14परमेश्वरके छावक बलिदानसे हम्रिहिन्हे मुक्ति अर्थात पापके माफ मिलल बा।

ख्रीष्टके सर्वश्रेष्ठता

15केऊ फेन परमेश्वरहे देखे नै सेकत। पर जब हुँकार छावा एकथो मनैया बन्लाँ ते परमेश्वरहे ऊ मनैनके आघे प्रकट करदेलाँ। और परमेश्वर ज्या चिज फेन बनैले बताँ। ओम्ने हुँकार सक्कुहुनसे भारी अधिकार बतिन। 16काकरेकी यी वहे (ख्रीष्ट) रहिँत, जे सक्कु चिज बनाइक लग परमेश्वरके संग काम करलाँ। उ बनाइल चिज चाहे स्वर्गक होए या पृथ्वीक, देखैना और नै देखैना, चाहे सिंहासन या राज, चाहे प्रधानता होए या अधिकार यी सक्कु चिज हुँकारे माध्यमसे और हुँकिनेहे आदर देहक लग बनागिल बताँ। 17और कौनो चिज फेन बनाजिनासे पैलेहेँ ख्रीष्ट रहिँत, और हुँकारेमे सक्कु चिज व्यवस्थित रुपमे पलिरथाँ। 18ख्रीष्ट मण्डलीहे डगर देखैथाँ, जोन हुँकार शरीर हो। वहे सुरु हुइताँ, और मुअलमेसे जित्ती होउइयनमे ऊ सुरुक हुइँत, ताकि प्रत्येक बातमे ऊ सक्कुहुनसे भारी रहिँत। 19काकरेकी परमेश्वर बाबक खुशी यम्नेहेँ बा कि परमेश्वरके पूरा स्वभाव ख्रीष्टमे बा। 20और परमेश्वर अपन छावाहे पठैना निर्णय करलाँ, जे अपन खुन बहाइल और क्रूसमे मुगिल। परमेश्वर असिन यी कारणसे करलाँ, ताकि अपन और सक्कु चिजके बिच्चेम मेलमिलाप करवाई सेकिँत। असिके ऊ अपन और उ सक्कु चिजके बिच्चेम शान्ति बनैलाँ, ज्या स्वर्गमे बा और उ सक्कु चिज ज्या पृथ्वीमे बताँ। 21तुहुरे जेने परमेश्वरसे दूर रहो, और तुहुरिन्के सोँच हुँकार विरोधमे रहे, और तुहुरिन्के काम खराब रहे। 22परमेश्वर आब ख्रीष्टहे मनैयक छावा बनाके और हुँकार क्रूसमे मुलक ओहोँरसे तुहुरिन्हे फेन मिलालेलाँ। ताकि ऊ तुहुरिन्हे पवित्र और बिना कलंकके और बिना दोषके बनाके अपन थेन ठरह्वाई सेकिँत। 23ख्रीष्टमे तुहुरिन्के विश्वास बल्गर रहे परत, उ घरक हस जोन एकथो बल्गर जगमे बनागिल रहत। और उ आशाहे जिन छोरहो, जोन अब्बे हमार थेन बा। काकरेकी हम्रे खुशीक खबरमे विश्वास कर्थी। जेकर बारेमे पृथ्वीमे हरेक जहनहे प्रचार करगिल बा, और खुशीक खबर प्रचार करक लग मै पावल एकथो सेबक बनगिनु।

मण्डलीक लग पावलके मेहनत

24आब जोन दुःख मै तुहुरिन्के लग उठैनु, ओकर कारण मै आनन्दित बतुँ। और बहुत्ते दुःख बा, जोन दुःख मनैनहे सहे परहिन। और मै ओसिके दुःख सहतुँ जसिके ख्रीष्ट सहलाँ, ताकि हुँकार शरीरके लग जोन मण्डली हो, उ दुःखहे पूरा करे सेकुँ जोन जरुरी बा। 25परमेश्वर महिन्हे नियुक्त करलाँ, ताकि तुहुरिन्हे हुँकार सन्देश पूरा रुपमे सम्झाई सेकुँ। तबेकमारे मै मण्डलीक सेबक बनगिनु। 26अर्थात उ रहस्यहे जोन युग-युगसे और बितल पुस्तासे गुप्त रहे, पर आब परमेश्वरके उ पवित्र मनैनकेमे प्रकट हुइल बा। 27काकरेकी परमेश्वरके इच्छा रहिन कि हुँकार मनै यी जानलिँत, कि ख्रीष्टके सम्पत्ति और महिमा तुहुरे गैर-यहूदिनके लग फेन हो। और रहस्य यी हो: ख्रीष्ट तुहुरिन्केमे रथाँ। यी बात तुहुरिन्हे हुँकार महिमामे हिस्सेदार हुइक लग आशा देहत। 28हम्रे ख्रीष्टके बारेमे सन्देश प्रचार कर्थी। और उ पूरा ज्ञानके संग जोन ज्ञान परमेश्वर हम्रिहिन्हे देले बताँ। हम्रे सक्कुहुनहे चेतावनी देथी। और सक्कुहुनहे शिक्षा देथी ताकि हम्रे यी पक्का करे सेकी कि जब ओइने परमेश्वरके आघे ठरह्यैहीँ। तब ओइने हरेक जाने ख्रीष्टमे एकथो पक्का विश्वासी हुइल रहिँत। 29यिहिहे पूरा करक लग मै कर्रा मेहनत और संघर्ष करथुँ। उ शक्तिक प्रयोग कर्ती जोन शक्ति महिन्हे ख्रीष्ट देथाँ, और जोन शक्ति मोरिकमे काम करत।

Currently Selected:

कलस्सी 1: DVGNT

Highlight

Copy

Compare