२ कोरिन्थी 2

1मै अपन मनमे सोँचलेले रहुँ कि तुहुरिन्हे दुखि करक लग फेनदोस्रे तुहुरिन्के थेन नै अइम। 2काकरेकी यदि मै तुहुरिन्हे दु:खि बनैनु कलेसे तुहुरे बाहेक महिन्हे खुशी बनुइया केऊ नै रहिजाई, जिहिहे मै दुखि बनैनु। 3और मै ज्या बात लिख्नु, उ यी कारणसे लिख्नु, कि मै आइलमे जोन मनैनसे महिन्हे आनन्द मिलेपरना रहे, ओइन्से मै दु:खि ना होऊँ। काकरेकी महिन्हे तुहुरे सक्कुहुनके उप्पर यी बातके भरोसा बा, कि जोन आनन्द मोरिक हो, वहे आनन्द तुहुरिन सक्कुहुनके हो। 4काकरेकी तुहुरिन्हे दु:खि करैना नै हो। पर तुहुरिन्के उप्पर रलक मोरिक प्रशस्त प्रेम तुहुरे जानो कहिके मनके बहुत्ते पीड़ा और वेदनामे बहुत्ते आँश बहैती मै यी चिट्ठी तुहुरिन्हे लिखल रहुँ।

पापके माफ

5यदि केऊ पाप करके दोसुर मनैनहे दुखि बनाइल बा कलेसे ऊ महिन्से धेउर तुहुरिन्हे दुःखि बनाइल बा। 6जोन दण्ड तुहुरिन्मेसे बहुत विश्वासीन उहिहे देले बतो, उ दण्ड ओकर लग बहुत हुइतिस। 7तबेकमारे तुहुरे उहिहे माफ करे परी और सान्त्वना देहे परी, नै ते ऊ बहुत दुखि होजाई और पानीमे डुब्ती रहल मनैयक हस होजाई। 8तबेकमारे मै तुहुरिन्हे अनुरोध करतुँ, कि तुहुरे उहिहे जात्तिके प्रेम कर्थी कहिके कहो। 9तबेकमारे तुहुरिन्हे जाँचक लग, और तुहुरे मोरिक बात मन्थो कि नै मन्थो कहिके पता पाइक लग मै तुहुरिन्हे लिखल रहुँ। 10जिहिहे तुहुरे माफ करथो, उहिहे मै फेन माफ करथुँ। काकरेकी माफ करे परना बातमे मै उहिहे पैलेहेँ माफ कर सेकल बतुँ। और तुहुरिन्के भलाइक लग ख्रीष्टके आघे मै उहिहे माफ करदेले बतुँ,

11ताकि शैतान हम्रिहिन्हे शोषण करे ना सेके, काकरेकी हम्रे ओकर खराब उद्देश्यहे जन्थी।

माकेडोनियक लग यात्रा

12ख्रीष्टके खुशीक खबर प्रचार करक लग त्रोआस शहरमे अइनु ते परमेश्वर महिन्हे खुशीक खबर प्रचार करना बरवार मौका देले रहिँत। 13मै अपन विश्वासी भैया तीतसहे तुहुरिन्के ओहोँरसे समाचार नै नानत देख्नु, तबेकमारे महिन्हे चिन्ता लागतेहे। तबेकमारे त्रोआस शहरके विश्वासीनसे बिदा लेके मै तीतसहे खोजक लग माकेडोनिया प्रदेशमे घुमके आगिनु।

विश्वासी सेबक

14पर परमेश्वरहे धन्यवाद होए, ख्रीष्टके संग रलक हमार एकतक कारण ऊ हरदम अपन संग हमार अगुवाई करथाँ, और हम्रिहिन्हे जित देहवैथाँ। और आब ऊ मीठ बास अइना अत्तर हस हरेक ठाउँमे ख्रीष्टके ज्ञान फैलाइक लग हम्रिहिन्हे प्रयोग करथाँ। 15हम्रे परमेश्वरके लग ख्रीष्टसे बारल धूप हस बती। हमार प्रचार कर्लक समाचार एकथो मीठ बास हस बा, जोन सक्कु मनैनके थेन फैलता अथवा उ मनैनकेमे जेने बँचागिल बताँ, और जेने नै बँचागिल हुइँत। 16जेने नाश हुइतताँ, ओइन्के लग यी एकथो ओइन्हे मुवैना दुर्गन्ध हुइतिन। पर जेने बँचाजाइतताँ, ओइन्के लग यी एकथो जीवन देना सुगन्ध हो। और पक्कै फेन यी काम करना लायकके केऊ फेन नै हो। 17काकरेकी हम्रे उ बहुत्ते मनैनके हस नै हुइती, जेने पैँसक लग परमेश्वरके वचन प्रचार करथाँ। पर हम्रे परमेश्वरके वचन सच्चाई और ख्रीष्टके अधिकारसे प्रचार कर्थी, यी जानके कि परमेश्वर हम्रिहिन्हे हेरतताँ।

Currently Selected:

२ कोरिन्थी 2: DVGNT

Highlight

Copy

Compare