लूका 6:27-49

पोन आय तुम्हाआ होमलिनाराहा कोत्लू का आपाआ दुष्मनापो प्रेम को; जो तुमाआ दुश्मन होय तियाआ हाजो को. जो तुमामे शाप आपी तियाहा आशीर्वाद दया, जो तुमामे बदनाम कोअत्लू, त्याकोता प्रार्थना को. जो ताआ एक गालोपो थापोड देही आगाडी दिहरू गाल पण आगाडी को; अने जो ताआ डोगलो सांडाडत्लू तियाहा बनियन ए घेऊन जाहु विरोध कोहू नाहा. जो कोडु ताअही मांगनारू तियाहा आप; अने जो ताआ वस्तु मागित लेही त्यापोरोत मागहु नाहा. जेहलो तुमामे लागेहे का मांहे तुमाआरी कोअनारू तुमु पण त्याआरी तेहलूज को. जर तुमु आपाआ प्रेम कोअनारापोज प्रेम कोअनारू ताहा तुमाआ नाहाकोत जाखो? काहाके पापी पण आपाआ प्रेम कोअनारापो प्रेम कोअता जर तुमु आपाआ हाजो कोअनाऱ्या उपऱ्यो हाजो कोअता तीयाम तुमाआ नाहाकोत जाखो? काहाके पापी पण ऐहलेच कोअता. जर तुमु उद्धार आपी त्याआरोत फासी लेअला आशा तेहित होय ताहा तुमाआ नाहाकोत जाखो? काहाके पापी पाप्याहा उद्धार आपोहो का तो तेवडोग फासी मेलविनारू. पोन आपाआ दुष्मनापो प्रेम को अने हाजो को अने फासी जोडीला आशा तोहुं नाहा, अने उध्दार दया; अने तुमा कोअता वोडो फोल होय अने तुमु परमप्रधानो पोऱ्ये ठराविलो काहाके तो तियापो जे तियाआ आभार मानणारु नाहा अने वाईटापो पण दयालु होय जेहलो तुमाआ बाह्हू दयालु होय तेहलूज तुमु पण दयालु व्हा. दोष लागाडहु नाहा, काहाके तुमापो पण दोष लागाड्यू जानारू नाहा दोषी ठेरवूहू नाहा, म्हणजे तुमामे पण दोषी ठेरव्यो जानारू नाहा दिहराहा क्षमा को म्हणजे तुमामे पण क्षमा कोअयी जाइअलो. आपा म्हणजे तुमामे पण आपलोम आवे मांहे माप दाबीन-दाबीन अने आलाडीत अने हिग पोईत तुमाआ पोदर कालतेहे काहाके ज्या मापोवांही तुमु आपाहा तियाआ मापोवांही तुमामे पण आप्लु जाइअलो. फासाडी तिये तियाहा एक दृष्टान्त कोयु, कि आंदलू आन्दालाहा वात कोहू शकतो नाहाकोत? नाहाकोत ते बेन खाडामेहे पोअनारू नाहा? शिष्य आपाआ गुरुपोरोत वोडू नाहा पण जो पुरो हिकीही तो आपाआ गूरुहोस उवे. तू आपाआ पायहोओ डोआमेऱ्यूं कोचाराहा काहा पालत्लू? अने आपाआ डोआमेऱ्यूं कोसरू होमजाडीत नाहा? तू आपाहाज डोआमेऱ्यो कोचाराहा पालीत नाहा ताहा आपाआ पायहोहो केहलो कोहू शकतो, ओ पाही थोबिलो जा ताआ डोआमेऱ्यूं कोसरू काढीत आपुहू काहा? ऐ कपटी पहीले ताआ डोआमेऱ्यूं कोसरू काड, फासाडी जो कोसरू ताआ डोआम होय तियाहा हाजा प्रकारे पालहु काढहु सेकेहे. कोडलो हाजो साड नाहा, जो बेन कामोओ फोल लेतावणारू एन कोडलो बेन कामोओ साड नाहा जे हाजो फोल लेतआविही. हर एक साड आपाआ फलोपारोत ओलख जाहो काहाके मांहे काटाआ साडोपरोत अंजीर तोडीत नाहा अने बोराआ साडोपरोत द्राक्ष तोडीत नाहा. हाजू माहुहू आपाआ मोनोमेहे हाजा भांडारामोरोत हाजा गोठी काडत्लू अने वाईट माहुहू आपाआ मोनोमेहे वाईट भांडारामोरोत वाईट गोठी काडत्लू काहाके जे मोनामे पाअये होय तोज सोबिम येत. जाहा तुमु माआ कोअलो मानीत नाहा ताहा माहु ओ प्रभू, ओ प्रभू काहा कोतले? जो कोडु मा आहने आवत्लू अने माआ गोठी होमलित्लू तियाहा मानीत होय आय तुमामे कोत्लू तो कोडाहोस होय. तो तिया माहुहुहोस होय जीआ को बोनाविलावेले जमीन उंडो खोदित खोडकापो पायू टाक्यू अने जांहा खाड आवयू ताहा पाअयोंआ धारा तियाहा लाग्या पण तियाहा आलाडहु शकल्या नाहा काहाके ते पक्को बोन्यो ओते. पोन जो होमलित मानीत नाहा तो तियाअ माहुहुहोस होय जीआ धरतीपो बिना पाया कोअ बोनाडल्ये जांहा तियाहा धारा लाग्या ताहा ते लागेज पोडीत गोये अने निसे पोडीत तिया नाश ओतगोयु.