2 थिस्लोनी 3

प्रार्थनाआ अनुरोध

1आखरी मेहे ऐ पाही आमाआ कोअता प्रार्थना कोअते रोजा का प्रभुउ वचन एहलो वेगो कोयले अने महिमा जोड़े जेहलो तुमाहा मेंहे उवो, 2अने आमू वाकड अने ठोग महापोरोत वासित रोअलो काहाके आखाज मेहे विश्वास ओतू एहलो नाहा. 3पोन प्रभू विश्वासयोग्य होय तो तुमामे ओ मजबुते अने स्थिर कोआ अने तिया वाईट हाजूहोय मेके. 4आमाहा प्रभूमे तुमापो भोरुसो होय का जी-जी आज्ञा आय तुमामे आपोहो तियाहा तुमु मानतेहे अने मानीत बी रोही. 5परमेश्वरोओ प्रेम अने ख्रिस्ताच्या धीरजावोगे प्रभू तुमाआ मोनोओ मार्गदर्शन कोआ.

आलसी विरुद्ध चेतावनी

6ऐ पाही, आमू तुमामे प्रभू येशु ख्रिस्त नावामेहे आज्ञा कोअत्लू का तुमु हर एक एहलो पाहयोप रोत अलग रो जो कायनिहाजू वागणुक कोअत्लू अने जी शिक्षा तिये आमापोरोत लेदि तीयी होसे कोईत नाहा. 7काहाके तुमामे मालुम होय का कोडला प्रकारे आमाहा वागणुक रोंहु जोवे काहाके आमू तुमामे कायनिहाजू वागणुक कोअयी नाहा, 8अने कोडाआ रुटू फुकट खादल्यी नाहा पोन परिश्रम अने काम कोईते रातदीही काम कोईत ओते का तुमा मेहेरोत कोडापो पो पोडहू कायना. 9एहलो नाहा का आमाहा अधिकार नाहा पोन यकोअता का स्वतःहा तुमा कोअता नमुना बोनावोओ ओतू का तुमु आमा कोअता वागणुक को. 10काहाके जोओ आमू तुमाआ इही ओते तेहलाम पोन तुमामे ए आज्ञा आपित ओतू का जर कोडाआ काम कोईलो ने ओयताहा खाहुं पोन नाय जोवे. 11आमू मानत्लू का कोडु-कोडु तुमाआ माय आलसी वागणुक सालताहा अने किबी काम कोईत नाहा पोन दिहरा कामोम आथे टोकीत रोत्ले. 12एहलाहा आमू प्रभू येशु ख्रिस्तामेहे आज्ञा आपोहो अने समजाडत्लो का ठावकू पणे काम कोईत आपाज रोहू खायलो रोअलो. 13ऐ पाही, तुमु हाजो कोअलाआ खचू नाहा. 14जर कोडु आमा आव पत्राहा आव गोठी कोअता मोनामे नाहा तियापो नजर मेका अने त्याआरी होबती कोयु नाहा याकोअता तो लाजआली उवूंहू जोवे. 15तेबी पोन तियाहा दुश्मन हमजुतल्यो नाहा पोन पाही होमजीत तियाआ कानउगाडे को.

आखरी शुभकामना

16ओमे जो प्रभू जो शांतीई कुवू होय स्वतः तुमामे सर्वकाल अने आखे प्रकाराआ शांती आपे अने प्रभू तुम्हाआ आखा आरी राहो. 17आय पौलुस आपाआ आथोवाही नमस्कार लेखातुलू हर एक पत्रामेह माआ ओच निशाण होय आय याज प्रकारे लेखातुलू. 18आमाआ प्रभू येशु ख्रिस्ताआ कृपा तुम्हाआ बोठासपो उवनारा रोअलो.

Currently Selected:

2 थिस्लोनी 3: NOINT

Highlight

Copy

Compare