Génesis 36

Usai Esaúnën rëbúnkikama ꞌiá ñuikë bana

(1 Cr 1.34-54)

1Ënëx ka Esaú ꞌikëbi Edom kakinribi anëkë uni aín rëbúnkikama ꞌia ꞌikën. 2Esaú ax ka Canaán kakë uni aín bëchikë xanu rabë́ ꞌimainun achúshi ꞌiakëxa, ax ka Adá, Elón kakë hitita uni aín bëchikë xanu bixun ka ami bëchiakëxa. A mi bëchitankëxun ka amiribishi Oholibamá kakë xanu Aná aín bëchikë Sibón kakë uni heveos aín baba aribi biakëxa, 3a bitankëxunbi ka Basemat kakë xanu Ismaelnën bëchikë Nebaiot aín, chirabakë aribi biakëxa. 4Bixun ka Esaúnën Adámiribi bëchixun Elifaz kakin anëakëxa; ꞌatankëxun ka Ismaelnën bëchikë Basemat amiribi Reuel a bëchiakëxa; 5ꞌimainun ka Oholibamá anribi bëchiakëxa bëchitankëxun ka Jeús, Jaalam ꞌimainun Coré aribi bëchiakëxa. Ënë kamax ka Esaúnëan Canaán kakë me anu pain tsókë ꞌixun bakë bëchipa ꞌikën.

6Usakin bakë bëchipati anu pain ꞌitankëxun ka Esaúnën aín xanu ꞌimainun aín bëchikëkama bianan abëa ꞌikë unikamaribi bibiani bëtsi menu tsóti kuani, aín xukë́n Jacob abë ënanani kuankëxa. Usai kuankin ka kamabi aín ñukama ꞌimainun aín ñuinakama Canaán menuxuan bikë akamabi buánkëxa, 7usai a rabëtax anu ꞌikëbëbi ka aín ñuina ꞌitsaira ꞌain anu rabëtax ꞌisama ꞌianan, anuxun ñuinakaman piti pasto sënë́nma me ꞌiakëxa. 8Usa ꞌain ka Esaú ꞌikëbia aín kuai anë Edom kakë, ax anuax kuantankëx bashiñu me ami kikiani kuankë Seír kakë anu tsóti bërúakëxa.

9Ënëx ka Esaúnën rëbúnkinën anë kuënëokama ꞌikën, ꞌimainun edomitakaman chaitiokëkama axa bashi ami kikiani kuankë me Seír kakë anu tsókë a unikama ꞌiakëxa. 10Ënëx ka Esaúnën bëchikënën anëkama ꞌikën: Elifaz Adánën tuá Esaúnën ami ꞌakë; ꞌimainun Reuel Basematnën tuá Esaúnën ami bakë bëchipakë ꞌiakëxa. 11Ënë kamax ka Elifaznën bëchikëkama ꞌiakëxa, Temán, Omar, Sefó, Gatam ꞌimainun Quenaz. 12Elifaz ax ka achúshi xanu an ñu ꞌaxunkë Timná kakin anëkë ꞌiakëxa; an ka achúshi tuá ꞌaxuntankëxun Amalec kakin anëakëxa. Ënë kamax ka Esaúnën aín xanu Adá ami bakë bëchipa aín rëbúnkikama ꞌiakëxa. 13Ënë kamaxribi ka Reuelnën bakë bëchikëkama ꞌiakëxa Náhat, Zérah, Samá ꞌimainun Mizá; ꞌimainun ka ënë kamaxribi Basemat Esaúnën xanuitsi aín rëbúnkikama ꞌiakëxa. 14Oholibamá axribi ka Esaúnën xanu itsiribi ꞌiakëxa, usa ꞌain ka amiribi bakë bëchiakëxa, aín anë ka ënëkama ꞌiakëxa Jeús, Jaalam ꞌimainun Coré. Ax ka Aná aín bëchikë ꞌimainun Sibón aín baba ꞌiakëxa.

15Ënë kamax ka Esaúnën rëbúnki axa ꞌapu ꞌia a ꞌikën: Akamax ka Esaúnën bakë bëchikë apan Elifaz aín rëkuë́n bëchikë ꞌiakëxa, a ꞌapukamax ka ꞌikë Temá, Omar, Sefó, Quenaz, 16Coré, Gatam ꞌimainun Amalec. Ënë kamax ka Elefaznën aintsikaman ꞌapu Edom kakë me anu ꞌiakëxa, usa ꞌaish ka ënë unikamax Adá aín rëbúnki ꞌiakëxa. 17Ënëx ka Esaúnën bëchikë Reuel aín bakë bëchikëkama axa ꞌapu ꞌia a ꞌikën, Náhat, Zérah, Samá ꞌimainun Mizá. Ënë kamax ka Reuelnën aintsikama ꞌapu Edom kakë me anu ꞌiakëxa, usa ꞌaish ka a unikamax Esaúnën xanu Basemat aín rëbúnki ꞌiakëxa. 18Usaia ꞌimainun ka Oholibamá Anánën bëchikë xanua Esaúnën bia aín tuakamaxribi aín aintsikaman ꞌapu ꞌiakëxa, Jeús, Jaalam ꞌimainun Coré. 19Ënë unikamax ka Esaú ꞌikëbia Edom kakë aín rëbúnkikaman ꞌapu ꞌiakëxa.

20Ënë unikamaxribi ka Seír horeo uni aín bakë bëchikë atúxribia a menu tsókë ꞌiakëxa Lotán, Sobal, Sibón, Aná, 21Disón, Éser ꞌimainun Disán akamax ka ꞌakánanti ꞌunáira unikaman ꞌapu ꞌiakëxa, ax ka Seír aín rëbúnki Edom kakë me anu tsókë ꞌiakëxa. 22Ënë kamax ka Lotánnën bëchikëkama ꞌiakëxa, Horí ꞌimainun Hemam, Timná ax ka Lotánnën bakë bëchikë xanu ꞌanáka ꞌiakëxa. 23Ënë kamax ka Sobalnën bakë bëchikë ꞌiakëxa, Alván, Manáhat, Ebal, Sefó ꞌimainun Onán; 24ënë kamaxribi ka Sibónnën bakë bëchikëkama ꞌiakëxa. Aiá a ꞌimainun Aná, Aná ënën ka anu uni ꞌikëma menua achúshi ꞌumpax upíira shióbukë mërakëxa, aín papa Sibón aín ñuina ꞌarakakë bërúankin. 25Aná aín bëchikë bëbu achúshi ka Disón kakë ꞌiakëxa ꞌimainun ka aín bëchikë xanu achúshi Oholibamá kakë ꞌiakëxa. 26Ënë kamax ka Disónnën bëchikëkama ꞌiakëxa Hemdán, Esbán, Itrán ꞌimainun Querán kakë ꞌiakëxa. 27Ënë kamaxribi ka Ésernën bakë bëchikëkama ꞌiakëxa Bilhán, Zaaván ꞌimainun Acán. 28Ënëx ka Disán aín bakë bëchikë ꞌiakëxa, Us ꞌimainun Arán. 29Usa ꞌain ka ꞌakánanti ꞌunán unikaman ꞌapu ꞌiakëxa, Lotán, Sobal, Sibón, Aná, 30Disón, Éser ꞌimainun Disán. Ënë kamax ka ꞌakánanti ꞌunaira unikaman ꞌapu Seír menu tsókë unikama ain ꞌapu ꞌiakëxa. 31Ënë unikamax ka Edom kakë me anu ꞌapu ꞌiakëxa, israel unikamaxa atun ꞌapuñu ꞌisama pain ꞌain. 32Usa ꞌain ka Beornën bakë bëchikë Bela ax Edom menu ꞌapu ꞌiakëxa aín ëmax ka Dinhaba kakin anëkë ꞌiakëxa. 33Usa ꞌain ka Bela ñukëbë Jobab kakë uni Zérah aín bëchikëribi ꞌapu Bosrá kakë ëma anu ꞌiakëxa. 34Usa ꞌain ka Jobab ax ꞌapu ꞌaíshbi ñukë ꞌain Husam ax ꞌapu ꞌiakëxa, ax ka Temán kakë me anu ꞌikë ꞌiakëxa. 35Usa ꞌain ka Husam ax ꞌapu ꞌaíshbi ñukëbë Hadad ax ꞌapu Avit kakë ëma anu ꞌiakëxa, ax ka Bedad aín bëchikë ꞌiakëxa, usai ꞌapu ꞌixun ka Madián unikama abë ꞌakanankin Moab me anua ꞌakëxa. 36Usa ꞌain ka Hadad ax ꞌapu ꞌaíshbi ñukëbë Samlá axribi a ëmanubi ꞌapu ꞌiakëxa, ax ka Masrecá kakë ëma anu ꞌiakëxa. 37Usa ꞌain ka Samlá ax ꞌapu ꞌaíshbi ñukëbë Saúl axribi ꞌapu ꞌiakëxa, ax ka Rehobot kakë ëma baka kuëbí anu ꞌikë uni ꞌiakëxa. 38Usa ꞌain ka Saúl ax ꞌapu ꞌaíshbi ñukëbë Baal-hanán Acbornën bëchikë axribi ꞌapu ꞌiakëxa. 39ꞌImainun ka ꞌapu Baal-hanán ax ñukëbë Hadad axribi ꞌapu ꞌiakëxa, aín ëmax ka Pau kakin anëkë ꞌiakëxa, usa ꞌain ka Hadad aín xanun anë Mehetabel ax ka Matred kakë uni ꞌain bëchikë ꞌimainun Mesaabnën baba ꞌiakëxa. 40Ënë unikamax ka Esaúnën aintsin rëbúnki aín anëkama ꞌikën, ꞌimainun anua tsóa aín men anëkama ꞌiakëxa: Timná, Alvá, Jetet, 41Oholibamá, Elá, Pinón, 42Quenaz, Temán, Mibsar, 43Magdiel, ꞌimainun Iram. Esaú ax ka Edom kakin anëkë ꞌiakëxa, usa ꞌain ka akamax Edom kakë me anu ꞌapu ꞌiakëxa, anua aín aintsikama tsóa ꞌain, ka uinu kara ꞌia anu ꞌapu ꞌiakëxa.

Currently Selected:

Génesis 36: cbrPB

Highlight

Copy

Compare