Ɓalɔma 14

Wɔɔnapɨakɔmʉ ayoo asɔɔ nʉ 'ʉkɔmbɔ

1Sɨeni mombi ngia anʉ baya yɛɛ bata bata kuɓio kʉ ati ʉndɛnʉ, chʉkɔmʉ nambuɓio kuɗuɗono nayɔ ekoo ʉ itungwio ngiangɔ. 2Kʉchɨkeni‑zʉ ɓɔ mombi mʉngana ngia, kʉkpatanakɨa nʉ baya ngiangɔ, akwanana yangɔ kʉdya mɨgbʉ yɨ idyo tʉkʉ kʉ iɓomu. Ɨkyɛmɨngana, mombi nga kɔmɔ, ekoo baya ngiangɔ yɛɛ bata bata ambuɓio kʉdya tʉkʉ lɨgbɛɛ. 3Mombi ngia aadya mɨgbʉ yɨ idyo kʉ iɓomu, ɔɔbʉlakɔmʉ gwa ngia aataa yangɔ mɨgbʉ yɨ idyo kʉ iɓomu. Nʉ mombi ngia aataa mɨgbʉ yɨ idyo kʉ iɓomu, ɔɔtɨnakɔmʉ 'ʉkɔmbɔ wʉ gwa ngia aadya yangɔ mɨgbʉ yɨ idyo kʉ iɓomu, jʉ Asʉɓɨɨ a꞉mʉjananɨa jananɨaa. 4Ɔwɛ wa‑zʉ anɨ iya waakyɨa tʉkʉ kʉtɨna 'ʉkɔmbɔ wʉ mombi ʉ kuu nga wʉ mangɛ? Ndʉ aɓio ɓɔ aamaa iɗo akʉ kuu gʉ ɓɔ aakwa, iinanɨ yɨkanga tʉkʉ Makʉangɔ. Akwanana tʉkʉ kʉmaa jʉ tʉkʉ Makʉʉɓɨɨ anʉ angu nayɔ kumaiso.

5Mombi ɔmɔ aana makwaa nga kɔmɔ ndʉ kanʉ dada kʉɓaa ika kɔmɔ. Ɨkyɛmɨngana, mombi nga kɔmɔ aana ɓɔ makwaa kʉ muɓomu ka tʉkʉ kʉ ngbanga. Mombi kʉ nangana nangana ʉbaya ɨngbaa yɨ moni tʉkʉ ndʉ akʉ ɛyɔ makʉɔngɔ a‑ɔɔ kʉna nʉ itungwio ngiangɔ. 6Mombi ngia aana ɓisi mʉngana ɓɔ ɓʉɓaa makwaa nga kɔmɔ, aatunguo ɓwanɨ tʉkʉ akʉ ɨbɨba yɨ Makʉʉɓɨɨ. Mombi ngia aadya mɨgbʉ yɨ idyo kʉ iɓomu aaɨdya tʉkʉ akʉ ɨbɨba yɨ Makʉʉɓɨɨ, jʉ aakyɨa ɓwanɨ kutuisio Asʉɓɨɨ ɨbɨba. Nʉ gwa ngia aataa yangɔ mɨgbʉ yɨ idyo kʉ iɓomu, aaɨtaa tʉkʉ akʉ ɨbɨba yɨ Makʉʉɓɨɨ, jʉ aakyɨa ɓwanɨ tʉkʉ kutuisio Asʉɓɨɨ ɨbɨba.

7Iiya ɓɔ yambʉkɔmʉ nʉ mombi ngia aakyɨa kʉkʉʉ akʉ ʉpanʉ wangɔ makʉɔngɔ. Nʉ yambʉkɔmʉ nʉ mombi ngia aawo akʉ ʉpanʉ wangɔ makʉɔngɔ kʉ ɓwanɨ. 8Jʉ ndʉ kaɓio kʉkʉʉ, ya tʉkʉ akʉ ʉpanʉ wʉ Makʉʉɓɨɨ, kʉndʉ kuwo ya kʉ akʉ ʉpanʉ wʉ Makʉʉɓɨɨ. Kʉ ɓwanɨ, ndʉ kaɓio kʉkʉʉ gʉ ɓɔ kuwoo, isu ka tʉkʉ lɨkyɛmɛ lʉ Makʉʉɓɨɨ. 9Jʉ Klisito a꞉wo ambʉtʉa akʉ ʉɓɨɨ kʉtɔ, ambʉ uɓio Makʉʉɓɨɨ ekoo ʉ ɓombi ngiɓa ɓa꞉wo nʉ iɓa ɓa kʉkʉʉ kʉtaa. 10Tiga ɔwɛ, jʉtanɨ wakʉtɨna 'ʉkɔmbɔ wʉ ayoo asɔɔ? Nʉ jʉtanɨ wakʉbʉla ayoo asɔɔ? Jʉ isu kʉ ɓuɓomu ka꞊maa sina tʉkʉ akʉ 'ʉkɔmbɔ apɛɛ ʉ Asʉɓɨɨ. 11Jʉ ɓa꞉tɨndakɨa amati ʉ Mubio kʉ Asʉɓɨɨ ɓɔ:

« Makʉʉɓɨɨ akusigo ɓɔ:

Jʉ ɛmɛ ma kʉkʉʉ,

ɓombi kʉ ɓuɓomu ɓa꞊gbʉkʉmɨa muwuu apɛɛ asɛmɛ.

Nʉ ɓombi kʉ ɓuɓomu ɓa꞊nabaya ɓɔ ma Asʉɓɨɨ. »

12Kʉ ɓwanɨ, mombi kʉ nangana nangana ati ʉndɛsʉ a꞊ngaka moni ngika kangɔ makʉɔngɔ apɛɛ ʉ Asʉɓɨɨ.

Wɔɔkwisisokɔmʉ ayoo asɔɔ akʉ ɓʉɓɨɓɨ

13Kusieni tɔ kʉtɨnana mɨkɔmbɔ ati ʉndɛsʉ. Moni ngika nʉkwanana kukwaisio ka ɓɔ, mombi ɔɔnapiikiokɔmʉ mangɛ lɨgbaa lʉ moni ikanzi ngila lakwanana nayɔ kʉgbʉsaniso, gʉ ɓɔ nayɔ kukwisiso amati ʉ ɓʉɓɨɓɨ. 14Jʉ ɛmɛ ma꞉baya Makʉʉɓɨɨ Yeso, nʉ makʉmbɨa nʉ pimiso iɗo ɓɔ ɨkyɛmɛ yɨ ɔpɛ gʉkʉ mɨngana yambʉkɔmʉ kʉkpatanakɨa ndʉ akʉ ɓa꞉ɨkyɨa‑ɔɔ. Ɨkyɛmɨngana, ndʉ mombi ana ɓɔ ɨkyɛmɛ yanʉ ɔpɛ akʉ ɛyɔ makʉɔngɔ, ɨkyɛmɛ ngiinanɨ yaɓio tiga kʉ ɨkyɛmɛ yɨ ɔpɛ. 15Nʉ ndʉ wadyiso ayoo asɔɔ ikoko akʉ 'ʉtʉma ekoo ʉ ɨkyɛmɛ ngia wakʉdya engo, ambʉ wambʉkɔmʉ tii ɓata kʉkɨndaka amati ʉ ɓʉkʉnda. Wɔɔsingokɔmʉ mombi nga kɔmɔ amati ʉ yangaa aka ekoo wʉ idyo ngia wakʉdya engo, jʉ mombi ngiinanɨ Klisito a꞉wo ekoo angɔ kʉ woo. 16Kʉ ɓwanɨ, ɨkyɛmɛ ngia inu nakʉna ɓɔ ya iɗo, nɔɔbayakɔmʉ ɓɔ ɓombi nga ɓɔmɔ ɓuɓio tiga nayɔ kʉmɨnyaka.

17Jʉ Ɓʉngama ɓʉ Asʉɓɨɨ ɓambʉkɔmʉ tʉkʉ ekoo ʉ moni kʉ idyo nʉ mwakanaka, ɨkyɛmɨngana ɓa kʉ kuɓio nʉ ɓungbingbii, nʉ majɨɔ, nʉ ɨgyagya ngia 'Ʉtʉma wɔɔ Tu waanzo. 18Mombi ngia akʉkyananakɨa Klisito amati ʉ lɨngbaa lʉ moni ngilʉnanɨ, iiya akʉkataa Asʉɓɨɨ, nʉ ɓombi ɓaamʉbaya bayaa. 19Kʉ ɓwanɨ, kʉhateni moni ngika kaanziso majɨɔ, nʉ lɨngbaa lʉ moni ngila lakwanana nisu kʉsalɨa kunzono angu amati ʉ baya.

20Wɔɔtambisokɔmʉ kuu yɨ Asʉɓɨɨ akʉ moni kʉ idyo. Ya kingono ɓɔ idyo kʉ iɓomu ya tʉkʉ iɗo kʉdya, ɨkyɛmɨngana, ndʉ mombi aɓio kʉdya ɨkyɛmɛ ngia yakwanana kukwisiso ayoo angɔ akʉ ɓʉɓɨɓɨ, iinanɨ yambʉkɔmʉ iɗo. 21Yambʉkɔmʉ iɗo kʉdya anzɨɓɔ, nʉ kʉmwa vinyo, nʉ kʉkyɨa ɨkyɛmɛ kʉ iɓomu ngia yakwanana kʉgbʉsaniso ayoo asɔɔ. 22Baya ngia wanayɔ ɨpɨmakɨa iɗo apɛɛ ʉ Asʉɓɨɨ. Ya ɨgyagya nʉ mombi ngia ambʉkɔmʉ kʉnapɨana 'ʉkɔmbɔ ekoo ʉ moni ngika akʉkwaisio kʉkyɨa engo. 23Ɨkyɛmɨngana, mombi ngia ambʉkɔmʉ nʉ baya ekoo ʉ ɨkyɛmɛ ngia akʉdya engo, ndʉ aɨdya ambʉ anʉ 'ʉkɔmbɔ. Jʉ ambʉkɔmʉ kʉdya engo nʉ baya. Nʉ moni kʉ muɓomu ngika kambʉkɔmʉ kʉʉngwanakɨa nʉ baya ka ɓɨɓɨ.

Currently Selected:

Ɓalɔma 14: BudKoya

Highlight

Copy