Kyananaka 24

Pɔlɔ ʉmaa apɛɛ ʉ Felikisi ngama ʉ gɨpa

1Mbise ʉ makwaa ɓɔkɔ, Anania kumu‑kumu ngia ɔɔ 'ʉja, ambʉɓʉya anʉ Kaisalia ɨzɔ nʉ ɓʉkʉʉ ngana ngana nʉ avoka mʉngana ino ɓɔ Teletulo. Ɓambʉka apɛɛ ʉ ngama Felikisi kʉchʉngɨa Pɔlɔ. 2Ɓambusoko Pɔlɔ, kija Teletulo a꞉faniso nayɔ kʉchʉngɨa ɓɔ: « Ɔwɛ Felikisi ngama ɔɔ uɗo nadɨndɨ, kanʉ majɨɔ kingono ekoo asɔɔ. Moni maja kʉ ɨkáa yɨ anza ngia ka꞉nɨtana, jʉ ɔwɛ waayo kɨndakiso ɨkʉmbʉ iɗo. 3Kʉ ɓwanɨ, ngama Felikisi, isu kanʉ ɨgyagya nadɨndɨ ekoo moni ngikʉnanɨ kʉ muɓomu. 4Mʉkʉndakɔmʉ nɔwɛ kʉchɨkɨa wati 'ʉta, kʉ ɓwanɨ ɓio ɓaka‑zʉ tʉkʉ nʉ 'ʉtʉma wɔɔ uɗo nisu kʉkɔ ɗɛkɛkɛ.

5Ka꞉na bɛ ɓɔ mombi ngiakɛ a mombi ɔɔ ɓɨɓɨ nadɨndɨ. Ɛyɔ iya akʉchakanakiso Ɓayuda ɓʉ ɨtaka kʉ iɓomu, nʉ kʉ ɛyɔ a ngama ʉ ɨtanda yɨ ɓombi ɓʉ Nanajalɛtɛ. 6I꞉nye bɛ kʉ kʉhata kʉndapakiso ɨkáa yɨ Asʉɓɨɨ ɓɔ yeeɓio tii ɓata tu. Kija isu ka꞉mʉfa bɛ. [Ki꞉nye bɛ kʉkʉnda kʉtɨna 'ʉkɔmbɔ nguangɔ kʉkpatanakɨa nʉ mapanʉ ngikʉndɛsʉ. 7Ɨkyɛmɨngana, iya Lasia ngama ʉ ɓasʉda a꞉ɓwanɨa bɛ nayɔ, ambʉmʉɓwanakiso akʉ lɨkɔndɔ lʉndɛsʉ akʉ angu. 8Kija ɛyɔ Lasia a꞉nzo bɛ ɓombi ngiɓa ɓa꞉chʉngɨa Pɔlɔ ʉpanʉ ɓɔ ɓʉka apɛɛ asɔɔ.] Ɔwɛ mambinyɔngɔ wumuɓukueni, wa꞊kwanana kʉmbɨa ɓɔ moni kʉ muɓomu ngika kanayɔ kʉchʉngɨa ekoo ɔngɔ ka kingono. » 9Ɓayuda ɓambʉbayanɨa ekoo ʉ moni ngikʉnanɨ, kija ɓu꞉maiso ɓɔ moni ngikʉnanɨ ka tʉkʉ ndʉ ananɨ.

Pɔlɔ utisio moni apɛɛ ʉ Felikisi

10Mbise ngiinanɨ, ngama ambʉmʉpʉya nʉ ɨkɔndɔ ɓɔ ʉsamʉa, kija Pɔlɔ a꞉tisio ɓɔ: « Makʉngaka moni kʉ 'ʉkɔmbɔ nguʉsɛmɛ apɛɛ asɔɔ chʉkɔmʉ nʉ jatuoko, jʉ amati ʉ mugo maja tʉkʉ ɔwɛ kʉ waatɨna mɨkɔmbɔ ngia yɨ ɨkáa yɨ anza ngiindɛsʉ. 11Kʉndʉ ɔwɛ mambinyɔngɔ wa꞊kwanana kukpingbikiso engo, yambʉɓaakɔmʉ makwaa kumi nʉ kapɨnɨ aka ma꞉ka bɛ‑ɔɔ anʉ Yelusalɛma kubibiso Asʉɓɨɨ. 12Mombi mʉngana ambʉnagbʉkakɔmʉ kuɗuɗono nʉ ɓombi, gʉ ɓɔ kubunzo ungbutu wʉ ɓombi mɨtʉ. Moni ngikʉnanɨ ka꞉mbikinye amati ʉ ɨkáa yɨ Asʉɓɨɨ gʉ ɓɔ akʉ ɨkáa yɨ nɨta ngia yɨ Ɓayuda gʉ ɓɔ akʉ mʉa nga wɔmɔ amati ʉ gʉlʉ.

13Ɓombi ngiɓa ɓambʉkʉkwanana kʉpana ɓɔ moni ngika ɓa‑ɔɔ nɛmɛ kʉchʉngɨa ekoo ɔngɔ ka kingono. 14Ɨkyɛmɨngana, ɨkyɛmɛ ngia makʉmbɨa apɛɛ asɔɔ ya ɓɔ ɛmɛ maabibiso Asʉɓɨɨ ngia wʉ ɓakuku nɨngbaa yɨ ɨtakɨ‑takɨ, iya ɛɓɔ ɓakusigo gʉ ɓɔ ya ɓɨɓɨ. Nʉ ma kʉ kʉbaya moni kʉ muɓomu ngika ɓa꞉tɨndakɨa amati ʉ mubio ngika kʉ Mʉsa nʉ ika kʉ lɨgbɛ. 15Ma꞉napɨa itungwio ngiisɛmɛ akʉ Asʉɓɨɨ kʉndʉ ɛɓɔ kusigo ɓɔ, ɓombi ɓɔɔ iɗo kʉndʉ iɓa ɓɔɔ ɓɨɓɨ ɓa꞊jʉkana sina akʉ ingyo jʉkanaa. 16Kʉ ɓwanɨ, makwaa kʉ muɓomu maakyɨa angu kuɓio nʉ iyo yɨ 'ʉtʉma nguʉsɛmɛ tʉkʉ ɓʉ dɨɨ apɛɛ ʉ Asʉɓɨɨ, kʉndʉ apɛɛ ʉ ɓombi.

17Amati ʉ mugo maja mambikinye anʉ Yelusalɛma, ɨkyɛmɨngana ma꞉ɨkɨa bɛ ɨkáa yɨ anza ngiisɛmɛ nʉ mikpekpe yɨ falanga, nʉ tiga kʉ nʉ apɛpɛ akʉ Asʉɓɨɨ. 18Iinanɨ ya moni ngika mi꞉nye kʉkyɨa engo ati ngia ɓa꞉nagbʉka‑ɔɔ amati ʉ ɨkáa yɨ Asʉɓɨɨ. Mi꞉nye ɓɔ mupipeni jaɓanakɨa kʉ ɨtakɨ‑takɨ. Tiga ananɨ mambikinye ɨzɔ nʉ ungbutu wʉ ɓombi gʉkʉ ɗɛkɛkɛ, ɨpʉmbʉ ya꞉mbikinye kʉ ɓwanɨ. 19Ɨkyɛmɨngana, Ɓayuda ngana ngana ngiɓa ɓa꞉ʉngwa akʉ gɨpa ʉ Azia ɓi꞉nye kʉ ananɨ. Yinyeni piɛ ɓɔ ɓanʉ moni ekoo asɛmɛ, ambʉ ɛɓɔ kʉ ɓʉka nɛmɛ kʉchʉngɨa ya apɛɛ asɔɔ. 20Kʉ ɓwanɨ, ambʉ́ ɓombi ngiɓaɓɛ ɓʉchwa‑zʉ moni kɔɔ ɓɨɓɨ ngika ɓa꞉nana nakɔ ati ngia mi꞉nye‑ɔɔ kʉsamba apɛɛ ʉ Ubua wɔɔ ʉja wʉ ɓakumu‑kumu. 21Moni mʉngana ngika makʉmbɨa ya tʉkʉ iya ma꞉yaka‑ɔɔ nʉ iyo yɛɛ ɓʉmʉ apɛɛ ʉndaɓʉ ɓɔ: ‹ Ɓʉ꞉nʉnapɨa nʉ 'ʉkɔmbɔ tʉkʉ jʉ ma꞉baya ɓɔ ɓombi ngiɓa ɓa꞉dʉka ɓa꞊jʉkana sina akʉ ingyo jʉkanaa. › »

22Ndʉ Felikisi i꞉nye mbɨa moni ngika ki꞉nye kyananakɨa amati ʉ Ɨngbaa yɨ Makʉʉɓɨɨ kʉtaa, ambʉsɨnganiso mɨsɨ yɨ ngbanga ngiinanɨ ɓata‑zʉ kʉ nʉpɛɛ. Ambusigio ɓombi ngiɓa ɓa꞉chʉngɨa Pɔlɔ ɓɔ: « Ma꞊tɨna ɓisi 'ʉkɔmbɔ nguʉndɛnʉ tii tʉkʉ aka Lasia ngama ʉ ɓasʉda a꞊ka‑ɔɔ. » 23Ambunzo ngama ʉ ɓasʉda ʉpanʉ ɓɔ ɓʉpɨmakɨa‑zʉ Pɔlɔ akʉ boloko, ɨkyɛmɨngana ʉ́mʉsɨa wati kujunikio nʉ ɓadii ɓangɔ kʉsɨaa, ambʉ ɓuɓio kʉ kʉka nayɔ kʉkanga nʉ nayɔ kunzikinikio.

Pɔlɔ pɛɛ ʉ Felikisi

24Mbise ʉ makwaa ɗɛkɛkɛ, ɔɔ Felikisi ɓambʉka ɨzɔ nʉ moi angɔ Dulusila ngia i꞉nye 'ʉtʉ Ɓayuda. Ambunzo ʉpanʉ ɓɔ ɓʉka nʉ Pɔlɔ aka ekoo ngia ɓɔ ɓʉ꞊mʉkɔ ati ngia aɓio‑ɔɔ kʉpanɨa ekoo ʉ baya yɨ Yeso Klisito. 25Iya Pɔlɔ a꞉faniso tiga yaka moni ekoo ʉ ɓungbingbii, nʉ kʉpɨmanakɨa akʉ taa yɨ ndʉtʉ, nʉ ekoo ʉ 'ʉkɔmbɔ ngua wa ɓisi ongo kʉka, Felikisi ambʉkwa ʉɓa, ambusigio Pɔlɔ ɓɔ: « Ɨtakɨ‑takɨ ngiakɛ, sa‑zʉ sanɨ! Munyɨeni ɓisi nʉ wati, mambunasoko ɓata. » 26Ngama ngiinanɨ i꞉nye tʉma tiga ɓombi kʉ gagaa nayɔ kusoko ɓɔ ɓʉyakanaka nayɔ, jʉ i꞉nye napɨa itungwio ɓɔ Pɔlɔ amunzo falanga. 27Mbise ʉ mugo kapɨnɨ, Pɔlɔkɨɔ Fɛsɨtɔ ambʉdya ɓʉngama mbise ʉ Felikisi. Ɛyɔ Felikisi a꞉sɨa Pɔlɔ tʉkʉ akʉ boloko jʉ i꞉nye kʉhata ɓɔ Ɓayuda ɓʉmʉchɨka ndʉ ɓɔ ɛyɔ Felikisi a mombi ɔɔ 'uɗo.

Currently Selected:

Kyananaka 24: BudKoya

Highlight

Copy