Matye 4

Mɛbhowal ɛ Yezu Klisto

1Bhii tak, Sisim Zɛɛb eezɛnɔɔ Yezu, tɔ́ nɛ nɛ pɛ kyee bɔs bɛsyɛ di ààbɛ nɛ mɛdii ɛ, etɛɛ náá, dim mot mɛkɔŋ neekɛwa nyɛ tɔ mɛbhowal. 2Bhii nyɛ nazɛtsi edee étɛp mendjaala tyee mɛlu mɛkam-mɛná nɛ epum mɛkam-mɛná ɛ, za naazɛsa nyɛ. 3Tin, dim mot mɛkɔŋ, mot mɛbhowal eezɛtiila pɛ daa lɛ. Nyɛy nɛ nɛ náá: «Yɛ bɛ náá, wɔ ɛ́ Mɔn ɛ Zɛɛb ɔɔ, kea nɛ mɛkok mak náá, ye liiza emapa.» 4Yezu eezɛbɔɔza nɛ nɛ náá: «Ekwyala e Zɛɛb lɛɛ ɛ́ náá:

“Ye tok mapa nɛ emapa di esa náá, mot di nɛ tsik.

Mot tsak ɛ́ nɛ mɛkpa djas di edus tɔ nuub Zɛɛb ɛ.#4.4 Dɛt 8.3”»

5Bhii tak, dim mot mɛkɔŋ eebaazɛtɔ́ nɛ nɛ pɛ Yeluzalɛm ghaada na dɛɛ. Nyɛ eezɛgel nyɛ kɔ ngɛs Ndjaa-ebuwa. 6Nyɛy nɛ Yezu náá: «Yɛ bɛ náá, wɔ ɛ́ Mɔn ɛ Zɛɛb ɔɔ, tsela, da wɔ ɛ́ kɛduma pɛ si, etɛɛ náá, Ekwyala e Zɛɛb lɛɛ ɛ́ náá:

“Kɔ ɛsu ɛ lɔ, Zɛɛb ɛ́ waake nɛ efofop bɛ náá:

Bɛ bɛp wɔ nɛ mɛmbɔ mɔɔ,

ekaab náá, wɔ ɛ́ zɛkɛbema ɛbɛk.#4.6 Mɛd 91.11-12”»

7Tin, Yezu eezɛbɔɔza nɛ nɛ náá: «Ekwyala baalɛɛ ɛ́ náá: “Sa wɔ ààwa Ghɛŋ Zɛɛb'ɔ tɔ mɛbhowal#4.7 Dɛt 6.16.”» 8Dim mot mɛkɔŋ eebaazɛnɔɔ nyɛ, tɔ́ nɛ nɛ pɛ kɔ dhiiti ɛtsok ɛ na vyɛɛg-vyɛɛg. Nyɛ eezɛtel nyɛ mɛyoŋ mɛ di kɔ ɛko ɛ bɔs ɛ djas nɛ mɛkas nɛ enɛm tak djas. 9Dim mot mɛkɔŋ eezɛke nɛ nɛ náá: «Mɛ waadjɛ wɔ esesɛɛ bak djas ɛ, wɔ kwyit mɛboŋ mɔ si eduwal mɛ ɔɔ.» 10É di'enek, Yezu ɛ́ boozɛke nɛ nɛ náá: «Dusa tin, Satan! Etɛɛ náá, Ekwyala lɛɛ ɛ́ náá:

“Yɛ ɛ́ Ghɛŋ Zɛɛb'ɔ ɛ wɔ di egoka nɛ ɛduwal.

Wɔ goka nɛ ɛsa ɛ́ mɛsa mɛ met.#4.10 Dɛt 6.13”»

11É sok'enek, dim mot mɛkɔŋ eezɛbet Yezu, é di'enek, wɔ gwaa efofop zokazyɛ, bɛ moo tin edjɛ nyɛ esa ee nyɛ nadi nɛ ɛkwosak ɛ tak ɛ.

Yezu eekan ɛsa mɛsa mɛ pɛ kyee dik Ghalile

12Bhii Yezu nagwak náá, Zaŋ naamɛtaa é mbok ɛ, nyɛ naazɛtɔ́ pɛ Ghalile. 13Nyɛ nabɛ ɛ́ ààkosulal kɔ ghaada Nazalɛt. Tin, nyɛ nakwos ɛ́ kɛdi ɛ́ pɛ ghaada Kapɛlnaum, ghaada tak nadi ɛ́ mbaka-mbaka nɛ boo soob na djato-djato Ghalile, pɛ pak kyee dik ɛ Zabulɔŋ nɛ Neftali. 14Nyɛ nasa deenek ɛ́, etɛɛ náá, etɛp e ngoolel-Mɛkpa ɛ Zɛɛb Ezayi nalɛɛ ɛ́ neebela ɛsuk:

15«Pɛ kyee mɛdhik mɛ Zabulɔŋ nɛ Neftali,

pɛ kyee ze boo soob na djato-djato,

pɛ yii kyiid dii Yuldɛn,

Ghalile, pɛ bot ɛ di ààbɛ bot ɛ mbyak eYuda di ɔ!

16Mbyak di tɔ ghooghom ɛ,

yɛ waabee boo ngel gwyɛ ekas tɔ lɔɔ!

Dɔɔ nɛ bot ɛ di ekɔɔla tɔ ghooghom pɛ kyee dik ɛsyee ɔ,

gwyes ɛ́ waakas kɔ lɔɔ#4.16 Eza 8.23–9.1 .»

17Kana ɛwala ɛlenek, Yezu naazɛkan ɛlyo bot náá: «Liigka elyem, etɛɛ náá, Ɛyoŋ ɛ di tɔ gwoo ɔ, yɛ eezekunaa!»

Yezu eezɛdjóo bɛdjekel bɛ yii mɛkɛn

18Dhiiti dwoo Yezu nadi ekɛ mbaka-mbaka nɛ boo soob na djato-djato e Ghalile. Dáa nyɛ nabee bɛlael ɛ mɛwyet bɛbá, dhyeeb nɛ tel, bɔɔ ela mɛwyet ɛ. Bot ɛ tak nabɛ ɛ́ Simɔŋ, mot nagetaa Pyɛɛd ɔ, zɛnɔɔ dhyeeb Andele ela ɛwyet tɔ dii. 19Tin, Yezu eezɛke nɛ nɔɔ náá: «Duka mɛ, mɛ waasa náá, bi di bɛlael ɛ mɛwyet yii bot.» 20É di'enek wat, bɛ eezɛdhuugal mɛwyet mɔɔ, étɛp ɛdu Yezu. 21Bhii Yezu nakɛ ba ziii ɛ, nyɛ eezɛboma nɛ bɛdhiiti bot ɛ sis, dhyeeb nɛ tel, Zak bɛ nɛ mɔn-nyɛɛg Zaŋ, bɔn ɛ Zɛbɛdɛ. Bɛ nadi ɛ́ tɔ elɛɛd, ekoobal mɛwyet mɔɔ, bɛ nɛ sɛɛg'ɔɔ. Tin, Yezu eezɛdjóo bɛ. 22É di'enek wat, bɛ eezɛdhuugal elɛɛd nɛ sɛɛg'ɔɔ, wɔ gwaa bɛ eezɛdu Yezu.

Yezu moo elyo nɛ ɛtsik ɛ bot

23Tin, Yezu naazɛtɔ́ pɛ kyee dik Ghalile djas, nyɛ nadi edjɛ mɛlyo tɔ mendjaa mɛ mendjaala mɛ eYuda nadi pɛ kyee dik tak ɛ. Nyɛ nadi egoola Mbɛɛ Bhaadal dum nɛ Ɛyoŋ ɛ Zɛɛb, nɛ ɛbaatsik bot ɛ nazyɛ nɛ mɛbɛ́ membi nɛ membi ɔ nɛ bot ɛ nadi nɛ edjam ɔ.

24Ye nabɛ ɛ́, menduk mɛ naakɛ kɔ kyee dik Siili djas. Bɛ ɛ́ boodi ezezyɛ nyɛ nɛ bot ɛ nadi nɛ mɛbɛ́ membi nɛ membi ɔ, nɛ bot ɛ embee esisim nadi edhe-dhek ɔ, dɔɔ nɛ bot ɛ nadi ebil djem ɔ nɛ eboka e bot. Yezu zokatsik bɔɔ djas. 25Mɛdhuu mɛ bot ɛ nadi edu nyɛ ɔ, nadudus ɛ́ pɛ Ghalile, pɛ pak eghaada kam, pɛ ghaada Yeluzalɛm, pɛ kyee dik Yude nɛ bot ɛ kyee dik nadi pɛ yii kyiid dii Yuldɛn ɔ.

Currently Selected:

Matye 4: bkwNT

Highlight

Copy