Zaŋ Ɛniel
Ɛniel
Mbɛɛ Bhaadal ɛ Zaŋ nakwyalaa ɛ étɛp ezɛɛga ekeletyɛ nadidi pɛ kyee bɔs Siili nɛghu pɛ kyee dik Azi Minɛl, dɔɔ nɛ kyee bɔs di djóoaa mos Tuulki ɛ.
Mɛkana mak ɛ́ koobela mɛtsek-mɛtsek. Etɛp nɛ mɛkpa mɛ di kwyala tɔ tak ɛ, tok tyee wat nɛ bɛdhiiti bɛmɛkana mɛ embɛɛ ɛ mɛbhaadal. Nyɛ ɛpedjɛ bɛtɛ nɛ duu tɔ ɛtiibal etɛp di syela tɔ mɛkpa nɛ mɛsa mɛ Yezu nadi sa ɛ.
Ɛtsek ɛ mɛkɛn mɛ mɛkana mɛ tak ɛ, ɛlaŋel ɛ wat kɛyaka nɛ ɛlaŋel ɛ kam nɛ ebá (1–12) ye kaada ɛ́ eboo endem etɛn nɛ ebá yii Yezu nasa ɛ. Bɛ djóo yɛ endem ɛ́, etɛɛ náá, ye ɛpelyaal náá, Yezu ɛ Mɔn ɛ Zɛɛb. Ekwyala e ɛtsek ɛ tak kaada ɛ́ bhoma ɛ Yezu bɛ nɛ bɛdhiiti bot, tyee: dhiiti kukuma ghaa-Zɛɛb eYuda, tɔ ɛlaŋel ɛ elɛl (3); nɛ yii moma dɛl ɛ Samaali, tɔ ɛlaŋel ɛ ená (4); dɔɔ nɛ bot ɛ mɛbɛ́, tɔ ɛlaŋel ɛ etɛn zɛnɔɔ ɛlaŋel ɛ etɛn nɛ ená (5–9). Tɔ mɛlyo mɛ, Yezu lyaal nyel ɛ́ dáa mapa di edjɛ tsik ɛ (6.35). Yezu lyaal nyel ɛ́ dáa mbaalel ɛsaa ebhata di etɔ́ nɛ bot bɛ pɛ kyee di di ekunaa nɛ Zɛɛb Sɛɛg ɛ (10.11). Yezu baalyaal nyel ɛ́ dáa gwyɛ ngel di ekas kɔ bot ɛ bɔs djas ɛ (8.12). Yezu ɛpetel nɛ bot djas náá, nyɛ ɛ́ tak.
Ɛtsek ɛ ebá e mɛkana, ɛlaŋel kam nɛ elɛl kɛyaka nɛ ɛlaŋel mɛkam-mɛmbá nɛ wat (13–21). Ye kwyalaa ɛ étɛp ɛwala ɛ Yezu aadus kɔ bɔs, byet pɛ ɛko pɛ daa Sɛɛg ɛ. Yezu eelii nɛ bɛdjekel bɛ. Nyɛ nadi edjɛ bɛ mɛlyo étɛp ɛwala ɛ nyɛ aadi ààbɛ edi wat bɛ nɛ bɛnɔɔ ɛ; ɛlaŋel kam nɛ elɛl kɛyaka nɛ ɛlaŋel kam nɛ etɛn nɛ wat (13–16). Bhii tak Yezu eezɛdjaala nɛ Sɛɛg kɔ ɛsu ɛ bɛdjekel bɛ; ɛlaŋel kam nɛ etɛn nɛ ebá (17).
É mɛsik mɛ mɛkana, Ekwyala lyaal ɛ́ etɛp ee nasael é ghɛŋ ɛsyee ɛ Yezu ɛ. Nɛ bɛtɛ nɛ etɛp ee di nɔŋel nɛ yii bɔɔ Matye ɛ, Malak nɛ Luk nakwyal ɛ. Ɛlaŋel kam nɛ etɛn nɛ elɛl nɛ ɛlaŋel kam nɛ etɛn nɛ ená (18–19).
Yezu naatel bɛdjekel bɛ nyel nyɛy nɛ tsik, dwoo ɛbyoŋ ɛ eYuda di edjóoaa Pak ɛ; ɛlaŋel mɛkam-mɛmbá nɛ mɛkam-mɛmbá nɛ wat (20–21). Mot nakwyal Mbɛɛ Bhaadal yak ɔ, ke ɛ́ náá, nyɛ nakwyal mɛkana mɛ ɛ́, étɛp bot ɛ nadi ààbee Yezu ɔ needum koŋ nɛ nɛ pe; ɛlaŋel mɛkam-mɛmbá, kana ze mɛkam-mɛmbá nɛ etɛn nɛ ená kɛkum ze mɛkam-mɛlɛl nɛ wat (20.29-31).
Mbɛɛ bhaadal ɛ Zaŋ dyeebalii ɛ́ nɛ dhiiti mbi zɛɛga eYuda, bot ɛ mɛbhuka ɛ Yezu. Deenek, daŋ-daŋ ɛ, ekukuma e eYuda nabɛ ààdi ekwyɛl nyɛ. Bela náá, Yezu nyɛ ɛmet nadi ɛ́ mot dhaad mbyak eYuda, dɔɔ nɛ bɛdjekel bɛ yii mɛkɛn pe. É sok Zaŋ di elii nɛ eYuda ɛ, nyɛ ààzolii-liiak nɛ bɔɔ bɛmet, tin, nyɛ lii ɛ́ nɛ bot ɛ mɛbhuka ɛ Yezu Klisto djas kɔ ɛko ɛ bɔs.
Mbɛɛ bhaadal ɛ Zaŋ ààkaada ɛbyel ɛ Yezu nɛ ɛkɛn ɛ mɛsa mɛ tɔ bot. Tin, é mɛkɛn mɛ mɛkana, nyɛ lɛɛ bot ɛ náá, Yezu Klisto ɛ́ «Mɛkpa mɛ Zɛɛb» nalookan ɛdi é di wat bɛ nɛ Zɛɛb ɛ; ɛlaŋel ɛ wat, ze mɛken kɛsik nɛ yii kam nɛ etɛn nɛ elɛl (1.1-18). Yezu, «Mɛkpa mɛ Zɛɛb» nazyɛ ɛ́ zɛdi é di wat bɛ nɛ bot. Deenek bɛ ɛ́ nɛ ghwyil ɛdi bɔn ɛ Zɛɛb. Tɔ mɛlu mɛ nyɛ nadi bɛ nɛ bɛdjekel bɛ ɛ, nyɛ nadi ɛ́ nɛ boo ɛgwakel bɛ nɛ Sɛɛg. Nyɛ ɛ́ «mot Sɛɛg nadhis kɔ ɛko ɛ bɔs» ɔ. Bot djas aadi esaa Zɛɛb nɛ lyem kwyɛl ɔ, bɛ nɛ ghwyil ɛgu nyɛ kɔ lo ɛ Yezu.
Currently Selected:
Zaŋ Ɛniel: bkwNT
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.