Mɛsa Ɛniel
Ɛniel
Mɛkana mɛ mɛsa mɛ bot ɛ lwoma ye bhɔɔba ɛ́ Mbɛɛ Bhaadal ɛ Luk nakwyal ɛ. Nyɛ kaada ɛ́ dáa bot ɛ lwoma, bot ɛ Yezu nalwom ɔ, nagoola bhaadal'ɛ. Bɛ nakan ɛgoola yɛ ɛ́ pɛ Yeluzalɛm, bhii tak pɛ kɔ epes e mɛdhik mɛ nadi mbaka-mbaka nɛ tin ɛ, bhii tak pɛ kɔ mɛdhik mɛ di é ngwoob nɛ ngwoob boo dii mɛsɔn mɛ Mediteelane ɛ. Deenek, bɛ naasa lwomel Yezu nalwom náá, bɛ sa ɛ́ (Luk 24.47-48, bot ɛ lwoma 1.8).
É mɛkɛn mɛ mɛkana mɛ bot ɛ lwoma, Yezu eebyet tɔ gwoo pɛ daa Zɛɛb (1.9). Nenak nyɛ tokapɛ é di wat bɛ nɛ bɛnɔɔ dáa nyɛ nadidi sok ɛ, é di'enek, nyɛ eedhis bɛdjekel bɛ Sisim na Dɛɛ, nadus pɛ daa Zɛɛb ɛ (ɛlaŋel ɛ ebá 2). Sisim tak ɛ́ di edjɛ bɛ ghwyil ɛkɛgoola embɛɛ esa ee Zɛɛb sa ɛ. Mɛkɛn nɛ mɛsik mɛ mɛkana mɛ bot ɛ lwoma, Sisim na Dɛɛ ɛpedul bɛdhiiti bot ɛ di edum koŋ nɛ Zɛɛb ɔ pɛ daa Yezu.
Kɛkum pɛ ɛlaŋel ɛ kam nɛ ebá (12), mot-lwoma Pyɛɛd di mot ghoŋ tɔ etɛp ee di kaadaa tɔ mɛkana mɛ bot ɛ lwoma ɛ.
Bɛdjekel ɛ Yezu ɛ́ eYuda, bɛ ɛ́ kuku ɛtɔ́ pɛ kok Ndjaa-ebuwa Yeluzalɛm, tin, bɛ nadi elii kɔ ɛsu ɛ lyoel yɔɔ. Deenek, tyee wat nɛ Yezu, bɛ nabɛ ààdi egwakel nɛ bɛghaa-Zɛɛb (ɛlaŋel ɛ elɛl kɛkum yii etɛn nɛ elɛl 3–8).
Bot ɛ zedum koŋ nɛ Zɛɛb ɔ, bɛ eezɛtɔ́ kɔ mɛl mɛ kyee dik Yude djas, pɛ Samaali nɛ pɛ mɛdhik mɛ sis. Bɛ nadi egoola Mbɛɛ Bhaadal pɛ daa bot ɛ membyak mɛ sis (ɛlaŋel ɛ etɛn nɛ elɛl kɛkum ɛlaŋel ɛ kam nɛ ebá 8–12). Yenek ɛ́ dhiiti sa na bes. É ghɛŋ tak, eYuda bɔɔ bɛmet ɛ́ nazodi egu Zɛɛb ngɔt tak. Bɛ nadi egek náá, bot ɛ bɛdhiiti bɛzɛɛb ɛ sis tok nɛ ghwyil ɛgu nyɛ. Tinaak, Yezu Klisto ɛpesa náá, bot djas needi nɛ ɛgwakel nɛ Zɛɛb. Ezɛɛga ekeletyɛ, nɛghu ezɛɛga ndjaa mendjaala ɛpebyel. Ye ɛpebilel, ɛbilel nɛ ɛbilel. Bot ɛ di tɔ tak ɔ, yɛ ɛ́ bot ɛ mbyak eYuda nɛ bot ɛ membyak mɛ sis.
Kana pɛ pak ɛlaŋel ɛ kam nɛ elɛl (13), mot-lwoma Pɔl ɛ́ kazɛdu bhis ɛ Pyɛɛd tɔ Ekwyala yii mɛkana mɛ bot ɛ lwoma. Yezu Klisto ɛ́ nadjóo Pɔl (ɛlaŋel yii etɛn nɛ ená 9). Bot ɛ zɛɛga mendjaala Antiɔs pɛ kyee dik Siili zokazɛsɛ́ɛ nyɛ nɛ bɛdhiiti bot ɛ nakwaadi egyee nɛ nɛ ɔ, étɛp bɛ neekɛgoola Mbɛɛ Bhaadal ɛ Yezu Klisto ɛtsetaɛpe pɛ mɛdhik mɛ sis. É ɛkɛn é ɛlaŋel ɛ kam nɛ elɛl, kɛkum ɛlaŋel ɛ mɛkam-mɛmbá nɛ etɛn nɛ elɛl (13–28), ye liial ɛ́ mɛdjoŋ mɛ lwomel'ɛ. Ye kaada ɛ́ dáa Mbɛɛ Bhaadal eezedjala mbaka-mbaka nɛ Mediteelane kɛkum pɛ ghaada Lɔm nadi ɛ́ boo ghaada ekukuma kyee dik tak.
Mbɛɛ Bhaadal ɛ Yezu Klisto Luk nakwyal ɛ, ɛpelii ɛ́ etɛp dum nɛ é ghɛŋ Yezu nadi kɔ bɔs ɛ. Tɔ mɛkana mɛ mɛsa mɛ bot ɛ lwoma, yɛ ɛ́ ɛkɛn ɛɛwala ɛ zɛɛga ndjaa mendjaala. Yɛ ɛ́ ɛwala ɛ ekeletyɛ, bot ɛ di edum koŋ nɛ Zɛɛb ɔ, di egoola mɛlu djas nɛ é edi djas Mbɛɛ Bhaadal ɛ Yezu Klisto. Bɛ goola yɛ ɛ́ pɛ daa bot ɛ membyak djas, nɛ pɛ daa bot ɛ ezɛɛga mendjaala mɛ bɛzɛɛb ɛ sis djas, pɛ daa bɔɔ dhyeeb, nɛ pɛ daa eboo bot, pɛ daa bɛkum ɛ bot nɛ pɛ daa bɛdjel.
Currently Selected:
Mɛsa Ɛniel: bkwNT
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.