Mɛsa 5

Ananias bɛ nɛ Safiida

1Tin, dhiiti motom din ɛ lɛ nabɛ ɛ́ Ananias, din ɛ myɛl nabɛ ɛ́ Safiida, bɛ naazɛgwakel étɛp ɛbɔmsa bɛɛdok nadi yɔbɔ ɛ. 2Nyɛ eezɛnɔɔ kyee pata wat syel, yak kyee nyɛ bookɛdjɛ bot ɛ lwoma, myɛl nadi egu. 3Tin, Pyɛɛd eezɛkɛ nɛ nɛ náá: «Ananias étɛp yé Satan zeni wɔ tɔ lyem deenek? Wɔ kwyɛl ɛ́ ɛkɔɔ Sisim na Dɛɛ, wɔ eesyel kyee epata wat ee wɔ bɔmsa bɛɛdok'ɔ ɛ. 4Ɛsok nɛ wɔ nɛ bɔmsa yɛ, ye nadi ɛ́ yɔ. Bhii wɔ kazebɔmsa yɛ ɛ, epata bɛ ɛ́ yɔ, etsal é? Haaa étɛp yé wɔ sa mbi yenek esesɛɛ? Wɔ ààpakɔɔ mot, wɔ kɔɔ ɛ́ Zɛɛb.» 5Gwaka nyɛ nagwak mɛkpa menek ɛ, Ananias eezɛduma si é bɔs, nyɛ eezɛgwyɛ. Tin bwoo naazɛmɛt bot djas nagwak menduk mɛ tɛp tak ɔ ɛbuɛpe. 6Mengbaaz ɛ́ boozɛpil muu'ɛ tɔ bheeza, bhii tak bɛ eezɛtɔ́ nɛ muu'ɛ kɛdel.

7Ba mɛwala mɛlɛl nadhaa bhii tak, mwaa Ananias zɛkum, ààgu sa sael sok ɛ. 8Pyɛɛd eezɛdji nyɛ náá: «Lɛɛa mɛ, ye bɛ ɛ́ bi nabɔmsa bɛɛdok'en ɛ́ nɛ mɛtaŋ mak ɔ?» Nyɛ eezɛbɔɔza: «Hɛɛɛ, yɛ ɛ́ nɛ mɛtaŋ menek ɛ bis bɔmsa yɛ.» 9É di'enek, Pyɛɛd ɛ́ booke náá: «Bi sa dáa étɛp bi neegwakel étɛp ɛbowal Sisim ɛ Ghɛŋ? Gwyáka, bot ɛ kɛdel ngom'ɔ ɔ, moo ɛ́ é ɛbɛ ɛ ndjaa, bɛ waabaabɛp muu'ɔ tɔ́ nɛ yɛ.» 10É di tak wat, nyɛ zɛghaaga si, si mɛko mɛ bot ɛ lwoma, nyɛ eezɛgwyɛ. Mengbaaz mɛ nadus ndela ɔ, eezɛkum, bɛ kabela nyɛ ɛ́ muu. Tin, bɛ eezɛghɛɛ nyɛ, bɛ eezɛtɔ́ kɛdel nyɛ é ngwoob di bɛ nadel ngom ɔ. 11Bot ɛ zɛɛga mendjaala djas nɛ bot ɛ nagwak menduk mɛ tak ɔ, naabela boo bwoo.

Bɛtɛ nɛ endem e mɛbwala

12Bot ɛ lwoma nadi esa bɛtɛ nɛ endem e mɛbwala tɔ mɛdhuu mɛ bot. Bot djas nadi edum koŋ nɛ Ghɛŋ ɔ, zokasɛɛga pɛ tɔ bhaaz ɛ Salomɔŋ di tɔ ɛbɛsɛɛ Ndjaa-ebuwa ɛ. 13Bot ɛbuɛpe nabɛ ààkadjheebal ɛkɛ é lɔɔg'ɔɔ, ye nakoozodi náá, bot nadi eduwal bɛ ɛbuɛpe. 14Tin, botom nɛ boa aluu na aluu nadi edum koŋ nɛ Ghɛŋ ɔ naazɛni tɔ lɔɔg'ɔɔ ɛbuɛpe. 15Tin, bot zokakɛghɛɛ membel, zɛnɛɛg bɛ é ngwoob egba, kɔ emwaala nɛ kɔ bhum. Bɛ nasa deenek ɛ́ etɛɛ náá, é sok Pyɛɛd aadhaŋ ɛ, sisim yɛ neegheebutal bɛ. 16É dhiiti mɛdhuu mɛ bot naazɛdus pɛ mɛl mɛ nadi é mengwoob mɛ Yeluzalɛm ɛ. Bɔɔ zokazyɛ nɛ membel nɛ bot ɛ embee esisim nadi edhek-dhek ɔ. Bɔɔ djas zokatsak.

Bot ɛ lwoma eetiigaa

17Dáa bɛ nabee edjema binek ɛ, boo ghaa-Zɛɛb nɛ bot ɛ lɔɔg'ɛ, bot ɛ tak nabɛ ɛ́ bot ɛ zɛɛga eSaduseɛ, wɔ gwaa, bɛ zokazɛkpaa elyem ɛbuɛpe dum nɛ bot ɛ lwoma binɔk. Bɛ ɛ́ boozɛke náá: «Ye goka ɛ́, mena lyakeka tɛp'ak.» 18Bɛ eezɛmɛt bot ɛ lwoma, bhii tak bɛ eezɛkɔɔl bɛ é membok mɛ bot djas di ekɔɔlaa tɔ tak ɛ. 19Tin, é pum, wɔ gwaa fofop ɛ Ghɛŋ zokazɛdii ɛbɛ ɛ ndjaa membok, bhii tak nyɛ eezɛwyisal bot ɛ lwoma, nyɛ eezɛke nɛ nɔɔ náá: 20«Tɔ́ka pɛ tɔ kok Ndjaa-ebuwa, lɛɛka bot etɛp djas di edum nɛ tsik na bes ɛ.»

21Bot ɛ lwoma eezɛgwak fofop tak. Tɔ ghooghom mɛlem bɛ eezɛtɔ́ pɛ kok Ndjaa-ebuwa, tin, bɛ eezɛni elyo bot mɛlyo mɔɔ. Boo ghaa-Zɛɛb, nɛ bot ɛ lɔɔg'ɛ ɛ́ boozɛsɛɛg bɛpaa ɛ mbyak eYuda, étɛp bɛ neeboma é boo kwan. É di'enek, bɛ eezɛlwom bɛmbaalel, bɛ kɛnɔɔ bot ɛ lwoma pɛ ndjaa membok. 22Tin dáa bɛmbaalel ɛ tak nakakum ɛ, bɛ ààpakabela bɛ tɔ dhɛŋ'ɔɔ é membok. É di'enek, bɛ eezɛsik pɛ boo kwan, bɛ eekɛlɛɛ bɛ náá: 23«Bis bela ɛ́ ndjaa membok ndiila ɛnyɔɛpe, bɛmbaalel tin é edi bɔɔ, é mɛbɛ mɛ ndjaa. Kabela ɛ́ náá, bis ààpabee mot tɔ tak.» 24Dáa bɛ nagwak deenek ɛ, ye naadhaa kukuma bɛmbaalel ɛ kok Ndjaa-ebuwa nɛ eboo bɛghaa-Zɛɛb ghwyil, bɛ moo tin esɔs dum nɛ sa sael nɛ bot ɛ lwoma ɛ. 25É di'enek, dhiiti mot eezɛtuula, nyɛ eezɛlɛɛ bɛ náá: «Gwakeka! Bot ɛ bi nakɔɔl é membok ɔ, bɛ ɛ́ pɛ tɔ kok Ndjaa-ebuwa elyo bot mɛlyo mɔɔ.»

26Bhii tak, kukuma bɛmbaalel eezɛtɔ́ bɛ nɛ bot bɛ, étɛp bɛ neekɛnɔɔ bot ɛ lwoma, bula nɛ nɔɔ. Tin bɛ naalii nɛ nɔɔ mɛdjɛ-mɛdjɛ, ààbɛ nɛ bhel, ekaab náá, bot ɛ dɛl ɛzɛkɛwus bɛ nɛ mɛkok. 27Bhii bɛ nakabula nɛ nɔɔ ɛ, bɛ eezɛpɛ́ɛ bɛ sok bhwoob boo kwan eYuda. Tin, boo ghaa-Zɛɛb moo tin edji bɛ mɛdjin. 28Nyɛ eezɛke nɛ nɔɔ náá: «Bis di ɛ́ bis eezelu bin ɛlyelɛpe náá, bi nàbaalyo bot dum nɛ din ɛ mot'enɔk. Ghuna bi eebatasa náá, mɛlyo men kɛdjala kɔ ghaada Yeluzalɛm djas. Bi kwyɛl ɛsaŋ ɛ́ náá, embee ebaka e ɛsyee ɛ mot tak kwyɛ kɔ elo bis é?» 29Pyɛɛd bɛ nɛ bɛdhiiti bot ɛ lwoma eezɛbɔɔza náá: «Ye goka nɛ ɛlooba nɛ zɛ, nɛ bot ohoo, nɛ Zɛɛb? 30Zɛɛb bɛbhaab binaka eegomal Yezu bi nagó nyɛ, mbema kɔ mɛlaaba ɔ. 31Zɛɛb eetel nyɛ tetel pɛ mbɔ eghɛŋ bɛ, nyɛ eedjɛ nyɛ dék ɛdi mɛkoozi nɛ Mɛtsik-bot. Nyɛ nasa deenek ɛ́, étɛp ɛdjɛ bot ɛ mbyak Yisalaɛl ze étɛp bɛ neeswoola mɛfulu mɔɔ, bɛ neebela ɛpelak ɛ mesyem mɔɔ. 32Bis ɛ́ bɛtyaasɛs e etɛp binek djas, bisɔ nɛ Sisim na Dɛɛ Zɛɛb nadjɛ bot ɛ di elooba nɛ nɛ ɔ.»

33Wɔ gwaa, ɛbuk baazɛsa bot ɛ boo kwan eYuda ɛbuɛpe, bhii bɛ nazegwak mɛkpa menek ɛ. Tin, gwyes ɛgó ɛ́ bot ɛ lwoma nasa bɛ. 34Bela náá, tɔ ɛdhuu ɛ lɔɔ, ye nabɛ ɛ́ nɛ dhiiti Falizyɛ din ɛ lɛ nabɛ ɛ́ Ghamalyɛl, nyɛ nadi ɛ́ ghaa-mɛkana mɛ etsi ɛ Moiiz, bot nadi eduwal nyɛ ɛbuɛpe. Wɔ gwaa nyɛ zɛwyɛl tyaa tetel kuku ɛbwak ɛ zɛɛga bot ɛ boo kwan, nyɛ eezɛke náá, bɛ wyisal bot ɛ lwoma pɛ kel ba mɔɔ pes ɛwala. 35Bhii tak nyɛ eezɛke nɛ bot ɛ kwan náá: «Bot ɛ Yisalaɛl, bi ɛ́ kobaka nɛ sa bi aasa nɛ bot bak ɛ. 36Ye dinaa ààpakobɔya, wak koko ɛ koko ye nabɛ ɛ́ Tedas natuula náá, nyɛy ɛ́ yɛ kuma mot. Ye nabɛ ɛ́ botom tyee mɛtaŋ bɛdhet-ɛná (400) naadu nyɛ. Bela náá, nyɛ naagóaa, bhii tak, bot ɛ nadu nyɛ ɔ naawyɛɛza bɔɔ djas, tin zɛɛga tak naazɛgwyɛ. 37Bhii nyɛy, é sok ɛlɛɛga ɛ mɛtaŋ mɛ bot, Yudas mot Ghalile naazɛsɛɛg zukamwaa nɛ mot nadu nyɛ ɔ. Tin, nyɛ naabaagóaa yɛ pe, é di'enek bot djas nadu nyɛ ɔ naazɛwyɛɛza gwyiiŋ. 38Nenak mɛ kalɛɛ bin ɛ́ náá, sa mot ààkabaabis bɛ. Betka bɛ, bɛ tɔ́, etɛɛ náá, yɛ bɛ náá, ɛsuk ɛ egwyes bɔɔ nɛghu mɛsa mɔɔ dus ɛ́ nɛ bɔɔ bɛmet ɔɔ, yɛ waasi. 39Yɛ kabɛ náá, ɛsuk ɛ egwyes bɔɔ nɛghu mɛsa mɔɔ dus ɛ́ tsɛɛtsɛ nɛ Zɛɛb ɔɔ, bi tok nɛ ghwyil ɛpul yɛ. Nàgheegka mɛnyel é ɛdi ɛ́ bot ɛ mɛbhuka ɛ Zɛɛb.» Tin, zɛɛga boo kwan eezɛmyaal etɛp ee Ghamalyɛl nalɛɛ ɛ. 40Tin, bɛ boobaazɛdjóo bot ɛ lwoma, bɛ eezɛnyuu bɛ nɛ eghwyɛs. Bhii tak, bɛ eezɛlyak bɛ náá, bɛ nàbaalyo bot dum nɛ din ɛ Yezu, é di'enek bɛ eezɛbet bɛ. 41Bot ɛ lwoma eezɛdus é di kwan nɛ mɛmyaala, etɛɛ náá, Zɛɛb eebee náá, bɛ ɛ́ bot ɛ di egoka nɛ ɛzukaa kɔ ɛsu ɛ din ɛ Yezu ɔ. 42Tin mɛlu djas tɔ kok Ndjaa-ebuwa, mendjaa nɛ mendjaa, bot ɛ lwoma nadi etɔ́ nɛ ɛlyo, nɛ ɛgoola Mbɛɛ bhaadal ɛ Yezu Mɛsia.

Currently Selected:

Mɛsa 5: bkwNT

Highlight

Copy