iMatiu 5
ATGNT

iMatiu 5

5
Osẹsẹ ni iJesu ọ la esọ ute sẹsẹ
1Abi iJesu ọ rọ mẹ oni olele ẹgbọ, ọ ti nga esọ ute dẹnẹ, ọ shitọ. Eniyẹ odukhokho eyọli e bhale ya shitọ gasẹ ọli. 2Ọọ sẹsẹ wẹ, ọọ liẹ,
3“Ikhivọsẹ o khi oyi ẹgbọ
ni e lẹsẹ khi
Ẹshinẹgba ọ mhuẹ emhikpa,
wẹwẹ e mhọli obọ shi
Eghiele oyi Ẹshinẹgba.
4Ikhivọsẹ o khi na ẹgbọ
ni ẹẹ viẹ,#5.4 Li zẹ Aza 61.2.
Ẹshinẹgba ọ ya yẹsẹ wẹ.
5Ikhivọsẹ o khi oyi ẹgbọ ni
e ti egbewẹ tiemhile,#5.5 Li zẹ Iwolo 37.11.
Ẹshinẹgba ọ ya ri
agbọ ona nya na wẹ.
6Ikhivọsẹ o khi oyi ẹgbọ ni
okiamhi ali okiamẹ
iguẹ-ngeli ọọ gbe,#5.6 Li zẹ Aza 55.1-2.
Ẹshinẹgba ọ ya ri
emini ẹ nono na wẹ.
7Ikhivọsẹ o khi oyi ẹgbọ
ni e mhọli ilẹlemhi na ẹgbọẹse,
Ẹshinẹgba ọ ya
mhọli ilẹlemhi na wẹ.
8Ikhivọsẹ o khi oyi ẹgbọ
ni e mhọli udu no pfuasẹ,#5.8 Li zẹ Iwolo 24.3-4.
e ya mẹ Ẹshinẹgba.
9Ikhivọsẹ o khi oyi ẹgbọ
ni ẹẹ dua ini opfọmhẹ o la ọ,
Ẹshinẹgba ọ ya lu wẹ imiọli.
10Ikhivọsẹ o khi oyi ẹgbọ
ni a mu okhọli vule shi ọ
irari khi e da riẹlẹ
emini Ẹshinẹgba ọ nono,#5.10 Li zẹ 1 iPit 3.14.
wẹwẹ e mhọli obọ shi
eghiele oyi Ẹshinẹgba.
11“Ikhivọsẹ o khi nẹ, ini ẹgbọ e mu okhọli vule shi ẹ ọ, ẹẹ kiẹ iwali ẹgbhọli ọdọda mẹ irari khi u mie mhẹ suọ.#5.11 Li zẹ 1 iPit 4.14. 12Zẹ ni u ke ghẹlẹ, egbe ẹẹ muẹ, irari khi eleli oyẹ ni o la iloghie oo gbẹdi gba. Ina e li mu okhọli vule shi emekẹguele ọ ni e kpẹ bhale khẹ.#5.12 Li zẹ 2 Okhẹ 36.16; Ika 7.52.
Ugbheli ali ákpá oyi agbọ a khi
(iMak 1.16-20; iLuk 5.1-11)
13“Eri a li abi ugbheli shi agbọ ọ. Ini ugbheli o wasẹ oviọlọ oyọli-a, aa ke tigbe mhọli abi a li ya rọli gbo mele ugbheli-a. Aa ke rọli ya li emhikhọghuo dọsẹ a ku ọli kua ni a ri awẹ lighi ọli ekẹ.
14“Eri a li abi ákpá shi agbọ ọ. Owa ni a tọ shi ukhomhi ute ọa ya sheli.#5.14 Li zẹ iJọn 8.12; 9.5. 15Aa mẹ ọgbọ ni ọ ya ri ákpá ru se, ọ khukhu ọli shi atalabi. Eri ọ ya ri ochoghọ rue ọli nga asha na keghe, ni o ke mẹ ekẹ ni ẹgbọ ni e la oni owa e ke mẹ ekẹ.#5.15 Li zẹ iMak 4.21; iLuk 8.16; 11.33. 16Lighọ zẹ ni ákpá oyẹ o ke gẹ khasẹ ẹgbọ, ni e rọ mẹ ikanya enete eyẹ ni e mẹ asha kuẹghiẹ Ẹshinẹgba ni ọ la iloghie.#5.16 Li zẹ 1 iPit 2.12.
Osẹsẹ abi ishi eyi iMosisi o ngme
17“A khi dabi khi eri mhi bhale ya shishi Ishi eyi iMosisi ekẹ-a, a khi a dabi khi eri mhi bhale ya shishi emini emekẹguele e sẹsẹ-a. Iiye! Eri mhi bhale ya rẹ wẹ tsẹ. 18Zẹ mhẹ gueyẹ khi ekẹ ali ukhuli e kha da kie la ọ ne, ukpamhi ingme okhọghuo ọa ya wa Ishi eyi iMosisi-a, ini emini e kẹkẹ wẹ shi ekẹ shi nya ẹa li bhale ya tsẹ.#5.18 Li zẹ iLuk 16.17. 19Itobọ ighọ, ọnini ọ da gbe ushi ni o ga shẹ nẹ a nya, ni ọ gbolo ẹ sẹsẹ ẹgbọ e li lighọ ne, lọli ọ ga ya shẹ nẹ nya Eghiele oyi Ẹshinẹgba, ọnini ọ da riẹlẹ wẹ ni ọ gbolo ẹ sẹsẹ ẹgbọ eni ishi eyi Ẹshinẹgba ne, ọ ya khi ọnọfunẹ Eghiele oyi Ẹshinẹgba. 20Mhi gueyẹ ẹ khi ini iguẹ-ngeli oyẹẹ ọa da dọsẹ iguẹ-ngeli oyi esẹsẹ Ishi eyi iMosisi ali ẹgbọ iFarisi ne, aa ya lo Eghiele oyi Ẹshinẹgba.
Osẹsẹ oyi ingme elemhi ibibi
(iLuk 12.57-59)
21“A suọ khi ẹghẹghẹ ni o dọsẹ khi a gueyẹ eni egbhali, ẹẹ, ‘Khi gbe ugbeli, ọnini ọ da lighọ ne, a ya ri ọli gue ẹzọ.’#5.21 Li zẹ Okiali 20.13; iDẹut 5.17. 22Ama memena mhi gueyẹ ẹ khi ọni ọ da mhuẹ ofu deba inyọghuo ọli ne, a ya rọli gue ẹzọ. Ọni ọ da liẹ inyọghuo ọli, ‘Yẹyẹ ọgbọ afuẹ ọna!’ A ya rue ọli bhale deba enighie. Ọni ọ da lu inyọghuo ọli, ‘Yẹyẹ ọyẹghẹ ọna!’ Ọ ya la okhẹna erali na ilimhi iriẹriẹ.
23“Ini u mhuẹ isomhopfa ni u wa nono ni u rọ ghi Ẹshinẹgba ukhomhi atẹtẹ, ni u rọ da sato khi inyọghuo ẹ ọ mhuẹ ofu nẹ shi emini u riẹlẹ ọli ne, 24zẹ oni isomhopfa oghọ obọ shi odalo atẹtẹ, u je apfẹ ni yẹyẹ ali ọni inyọghuo ẹ ni a rọ riẹlẹ, u tigbe bhale ya ri isomhopfa oyẹ na Ẹshinẹgba.
25“Ini ọbe ẹ ọ rue ẹ lẹ ikọtu, nyanya lema li abi a li la odẹ ẹ lẹ eghọ neni a ramhi aghọ. Ini ọa khi ighọ, ọ ya rue ẹ na ọsọ-ẹzọ, ọni ọsọ-ẹzọ ọ rue ẹ na ọgbanelemhi, ọ́ rue ẹ ya khukhu shi owa ighumha. 26Abi o li mhi li gue ọli ẹ yẹ ẹ khi, waa ya rọte aghọ lasele ini u waa li zẹ oko na fiẹ pfo nya.
Osẹsẹ ingme okia
27“A suọ ẹghẹghẹ ni o dọsẹ khi a liẹ, ‘Khi kia okia.’#5.27 Li zẹ Okiali 20.14; iDẹut 5.18. 28Ama memena mhi gueyẹ ẹ khi ọnini ọ da ri ọghuẹmhẹ itsẹbọ bino ọkpotso ne, ọ she kia okia deba ọni ọkpotso elemhi usamhi udu oyọli. 29Irarighọ, ini o khia khi ẹloe na obita oyẹ o ya zẹ ni u lo owa erẹ, vuọnyọ li pfia, irari khi o ti nẹ ini egbe ẹa gba nẹ ya lo iloghie, dọsẹ khi yẹyẹ nya u lo ilimhi iriẹriẹ.#5.29 Li zẹ iMat 18.9; iMak 9.47. 30Ini o khia khi obita oyẹ o ya zẹ ni u pfidọ ya lo owa erẹ, khi ọli pfia. O tinẹ ni u zẹ obọ oghuo ya lo iloghie dọsẹ khi yẹyẹ nya u lo ilimhi iriẹriẹ.#5.30 Li zẹ iMat 18.8; iMak 9.43.
Osẹsẹ ipfa ughuẹ-a
(iMat 19.9; iMak 10.11-12; iLuk 16.18)
31“A li ngme ọli shi Ishi eyi iMosisi khi, ‘Ọmọse ọ kha khu ughuẹ ọli, ọ nya ebe ipfa ughuẹ-a na li.’#5.31 Li zẹ iDẹut 24.1-4; iMat 19.7; iMak 10.4. 32Ama memena mhi gue ẹ yẹ ẹ khi, ọni ọ da khu ughuẹ ọli ni o khia khi ọa khi eri ọ kia okia ne, ọ she yẹsẹ ọni ọkpotso mele ọkiokia-a. Ọmọse ni ọ rue ọni ọkpotso ọghọ, eri ọ li kia okia.#5.32 Li zẹ iMat 19.9; iMak 10.11-12; iLuk 16.18; 1 iKọri 7.10-11.
Osẹsẹ irọnga
33“A gbo li suọ khi a gueyẹ ẹgbọ ena ẹlẹlẹ, ‘A khi da irọnga ni a rọ nga, ama emini u romhi Ọnọmhuẹ rọ nga, khi da ọ, lighọ rọli tsẹ.’#5.33 Li zẹ iLẹv 19.12; iNọba 30.2; iDẹut 23.21. 34Emini mhi ke gue ẹ yẹ ẹ mena khi, khi ga romhi isheli kpa. Khi romhi idane irari khi oobọ ukpẹkhomhi oyi Ẹshinẹgba o la.#5.34 Li zẹ iJem 5.12; Aza 66.1; iMat 23.22. 35Khi gbo li romhi ekẹkhẹ, irari khi lọli khi akphawẹ-nga oyi Ẹshinẹgba. Wẹkhi iJerusalẹmu, irari khi lọli o khi ẹoli oyi Oghie nọ funẹ.#5.35 Li zẹ Aza 66.1; Iwolo 48.2. 36Khi ga ri ukhomhi oyẹ romhi ishe, irari khi waa ya dobẹ ri ẹtsui oghuo kpe bishi a wẹ khi eri u dobẹ rọli ya pfuasẹ-a. 37Ungmemhi oyẹ o lẹsẹ migha shi ii, okekhi iiye, emini o da dọsẹ ighọ ne, obọ oyi Ọkphaghiẹ o te bhale.
Khi ri onobe fali ota onobe
(iLuk 6.29-30)
38“A suọ khi a kpẹ ngme ọli, khi, ‘A ri ukpẹloe fata ukpẹloe, ali ẹkọli o fata ẹkọli.’#5.38 Li zẹ Okiali 21.24; iLẹv 24.20; iDẹut 19.21. 39Ama mena, mhi gueyẹ ẹ, a khi riẹlẹ ọgbọ to ọ ini ọ riẹlẹ ẹ onobe. Ini ọgbọ, ọ lase ẹ esọ obita nyenẹ ona ọgobọ na li gbo lase. 40Ini ọgbọ ọọ nono ni lọli luẹ ẹzọ, ni lọli rọ mie ẹ awulu oyẹ, bie gbo gueghie oni u sọ kpọkẹ ma ọ nali. 41Ini ọgbọ ọ ri itoto liẹ u tsua itsua na luẹ imali oghuo, tsua wẹ imali eva. 42Ini ọgbọ ọ mhila ẹ emhi, rọna li. Ngmomhi na ọni ọ ye ongmomhi deba ẹ.
Mhọli inono na ebe ẹ
(iLuk 6.27-28,32-36)
43“A she suọ khi a liẹ, ‘Nono ingme oyi ọnuzi-ava ọyẹ, u ke biselemhi ọbe ẹ.’#5.43 Li zẹ iLẹv 19.18. 44Ama mhi gueyẹ ẹ. Nono ingme oyi ọbe ẹ, u gbo sọ iromhi na eni mu okhọli vule shi ẹ ọ. 45U kha lina, eri u wa ngeli abi itẹ na iloghie. Irari khi lọli ọ ri ovọ oyọli ẹ to na ẹgbọ ọkhọlọ ali ẹgbọ enete. Ighọ ọ gbo liẹ ruẹsẹ amẹ na ẹgbọ ọkhọlọ abi ọ liẹ ruẹsẹ ọli na ẹgbọ enete. 46Sẹ u ke li ya mẹ asha mhuẹ eleli obọ oyi Ẹshinẹgba ini u lẹsẹ nono ẹgbọ ni e nono ingme oyẹ? Egbegbi emionoga e lili ẹ lighọ. 47Ini o khia khi inyọghuo ẹ tsẹ u lẹsẹ ẹ tsẹ, ighe ikhiọda ni o la yẹyẹ ali eni ẹa miesuọ ọ? Eni ẹa miesuọ e lili ẹ lighọ. 48Itobọ ona, zẹ ni u gba pfo abi Itẹ na iloghie ọ li gba pfo.”#5.48 Li zẹ iLẹv 19.2; iDẹut 18.13.

© 2012, The Nigeria Bible Translation Trust and Wycliffe Bible Translators, Inc. All rights reserved.


Learn More About Ebe-No-Pfuasẹ Ishobọ Onogbọ

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.