Birimmi Kitaaba 2
2
1An Saaroo'n uulli xiggeeraxxisaa
cebbanne mutoo suuf fiixxisaa.
Idaayyichchi
2I iitti mancho baajaammuwwi lambe'enne
utti lambe'enne yoo suuf fiixxisatte.
Idaayyichcho
3I iitti manchi mulli woraadduwwi lambe'enne
doo'm haqqoronne lophphaa
mishisoo appi'l mishisa.
Anim lobakata liiramaa ixxi hafanne usheexxummo;
xee'oo misham itaa liiramummo.
4Ixxi hurbaata itakkam mine eese aagisukko,
ixxi iittom baandi'llisa eesenne iimiimaa'ukko.
5Ixxi iitti amadaa xissummi bikkina
Zabiiba itissakku'uuyyi eese qoxxissehe;
appi'l mishinnem eese liiransehe.
6Qeddi anginne bakkiisaakko;
makki anginnem eese qaaphphaakko.
7Yerusaalee'm baajaammuwwa,
iitti ixxi gagim ki'eebe'e
mikmikaa'llakka'a ki'isansitakkambee'isa
geeroo kukkussichchi summinnee udma'i uulli
gaallichchi summinnee uunxoommo.
Iitti Hundi Luwwam Axisoohan Ihukkisa
Idaayyichcho
8I iitti manchi duunnuwwi haninnee
beqelluwwi haninnee xophukkuuyyii
geerukkuuyyii waaroo ammane sagar macceesamookko.
9I iitti manchi gaallichchika te'im kukkussichchika wotara labookko;
oono'o, ixxi kaba ni mi'n
ooxxi gadanonne uullaakko;
maskootinne daaphphaa moo'oolla;
hoffi afo'innem game'aa moo'oolla.
10I iitti manchi iina kid yaa wocukko.
Idaayyichchi
I iitti mancho, ki'e;
i danaame, waare; maqirem mallona.
11Oono'o, hagayyi higaakko;
xeenim ga'nnimma uullisaakko.
12Fiit uullanne fiitimma asheeraakko;
zammarakkam amman afaakko;
handare'i sagarim uullanne macceesamoolla.
13Oda'i mishimma asheeraakko;
woirinim fiitaakko;
fiit enjim uullanne wo'mmaakko.
Ee bikkina, iyyaayya, ki'e;
i danaame, waare; maqirem mallona.
14At kolo'i baalli woronne
maaxamu handarekkichchisatte.
Hino'o, mataa'lle ki ille moo'ise;
ki sagaram macceesise;
ki sagar mishisoohane;
illi kollom lobakata danaamotte.
Idaayyichchi Abbaayyuwwi
15Ni woyin fiitaakko;
ee bikkina niikka woyina bi'isoobee'isa
wengereella, ee hoffi wengereellichcha'a
qaashshakka'a amaddehe.
Idaayyichcho
16I iitti manchi iihane; anim ixxane.
Ixxi suuf fiixxi lambe'enne diinate allaarookko.
17Hii'm tuunsi beeddeebe'ee
baqixxi hafachchim hafachcheebe'ee,
i iitti mancho, gaallichchisa te'im kukkussichchi wota'llisa
baalli yoo duunnuwwi haninne geettittuuyyi daba'lle.
Currently Selected:
Birimmi Kitaaba 2: KeesKita
Highlight
Share
Copy
Want to have your highlights saved across all your devices? Sign up or sign in
