Oroome'i Asso Aagga
Aagga
Oroo'm mannina Asse'amaanchi Phaawuloos assi kitaabamukkok Phaawuloos Oroomanne hee'oo amma'nnaa'n wixxixxi mine moo'eena qoodaa hee'u bikkina gudamaa egeramoo'isina hasu bikkinatte. Phaawuloos qoodo'i Oroomanne yoo amma'nnaaninne maqire gootto'i ammanina baxaa lasonne ixxuwwi hara'mmatinne Ispheena yakkam uulli kolli mareenatte hee'ukko. Kiristoosanne amma'nnimmi bikkina qoossukkoka amma'nnaan ixxuwwi heechchanne baxonne hosissam amma'nnaxxi losa'n bikkina fintimminne kitaabaakko. Phaawuloos assi wo'mmaakkoo'isanne siidamookkok ka assonnette.
Oroomanne hee'llo'i amma'nnaanina Phaawuloos xummaato asse'aatii Waa'a uunxoo'isam neeyyato uwwaatii lasonne assoo'm lambe'aanchi sawwit «Waa'i manna muccussookkok asheero'iinsim ki'isaa goollo'onne afeebe'e amma'nnatinnette ihukkisa mishiraachchi sagaranne caakkaakko» (1:17) yoo sagar ihukkisa moo'isookko.
Ee lasage Phaawuloos ka sawwite haraassaa kitaabookko. Ayihuxxi minaadabam ihukko mulli minaadab hundannem baaxiil halee'llaakkoo bikkina Waa'inne araaranchi hasisookko. Manni Waa'inne araarameena xanookkokim Yesuus Kiristoosanne amma'nnimminnette. Ee amma'nnatinne Waa'inne shooto'akkam haareechchi mateeyyoo'm mish haareechchi heechchi ihukkisina Phaawuloos haraarisanne caakkisookko. Amma'nnaanchi Waa'inne maqire xumminne hee'ookko. Waa'i Ayyaaninnem baaxiiliinsii leh malaayyiinsii wolabbano firookko (ushex 5—8) Phaawuloos Waa'i Seerii amma'nnaa'n heechchanne baxoo Waa'i Ayyaa'n malaayyi horoor woshshii mada'e ihukkisa caakkisookko. Kanniinsim awwonaa Phaawuloos «Manni shumo'ina hee'oo Waa'i qoodo'i woronne Ayihuxxi minaadabii mulli minaadabii hinkid mat ikkeena xantamo?» yoo xa'mmichchina dabachcha uwweena yakookko.
Odim Phaawuloos caakkisukkisanne Ayihuxxi minaadab Yesuusa aa'lloo'n gatto'is Waa'ina qooda. Kukim ihukkok Yesuus Kiristoosinne Waa'i caakkisu gatimmik uwwanchi hundem manni shumo'om edoohan issimminatte. Ihona bagaan Ayihuxxi minaadab Yesuusa aa'llam amman waaroo'isa Phaawuloos amma'nnookko. Lasaanchonne Phaawuloos amma'nnaxxi heechcha hinkid hee'immi labooda'e annannannem amma'nnaan ixxuwwina'i ixxuwwim edantam edanchanne iitti googo awwonimmi laboo'isa caakkisookko. Waa'a awwaadimmi bikkina, amma'nnaan ixxuwwi uullinaa ixxuwwinana'i ixxuwwinam yoo daannoomatinaa sawwixxi mashka'inne ki'oo xa'mmichchi bikkinaa fintimminne caakkisookko.
Kitaaboom Kanniinsi Woroon Yoo'isanne Baxxansamaakko
Kitaaboo'mmek aaggii horoor sawwitii (1:1-17)
Manni shumo'i hundinam Gatisaanchi hasisoo'isa (1:18—3:20)
Waa'ik gatisimmi goog (3:21—4:25)
Kiristoosiinsi uwwamoo haareechchi heechchi bikkina (5:1—8:39)
Isra'ee'l minaadabina yoo Waa'i qoodo'o (9:1—11:36)
Amma'nnaa'n haalaxxi bikkina (12:1—15:13)
Lasaanchi goollo'oo xummaatoo (15:14—16:27.)
Currently Selected:
Oroome'i Asso Aagga: KeesKita
Highlight
Copy
Compare
Share
Want to have your highlights saved across all your devices? Sign up or sign in