Oroome'i Asso 9

Isra'ee'l Minaadaba Waa'i Doo'llukkisa

1An Kiristoosan ihummi bikkina hanqa wocoommo bagaan qophphanoommoyyo. An qophphanumbee'isa i wodanonne yoo Keesammi Ayyaanim kurookko. 2-3Iyyabbaayyuwwi bikkina oohim iina qarmanni ihu Isra'ee'l shumo'ina i wodanonne lobakat kichchechchii u'nnanchii yookko. Ixxuwwi bikkina an duumamaammoohan ihaa Yesuus Kiristoosiinsi annanni iheena mixam hee'ummo. 4#Doy 4:22 Ixxuwwi Isra'ee'l ooso. Waa'ina oos ihimmi, Waa'i uwwu lombi, hidi'l sagar, See'l uwwanchi, Waa'ina otossimmi, neeyyatii 5maalda'uwwii ixxuwwane. Kiristoos maa'llisinne qaramukkok ixxuwwi shumo'iinsette. Hundi luwwiinsim hanaan yoo Waa'i heer heerinam maasse'amaakkoohan ihona! Aameen.

6Ihukkaarem Waa'ik sagar gataakko yimmayyo. Isra'eeliinsi qaranto'i keen hundim Isra'eelayyo. 7#Qoc 21:12 Abrihaam shumo'iinsi qaranto'i keen hundim Abrihaam oosoyyo. Ihukkaarem «Ki shumo'i Yisaaqinne weeshamookko» yamamukko. 8Eehid yimmim Waa'ina ooso yamantamokim Waa'i neeyyaxxisinne ixxi oos ikka'a xiganto'i keeno bagaan maarinne oos ikko'i keenoyyo. 9#Qoc 18:10 Oo Waa'i neeyyatim «La'mmaarage kido'i ammanenne daba'llaa waaroommo. Saara'am beeto qattamo» yamamukkane. 10Xale'i eehaneyyo; Irbiqam niyyanni Yisaaqina lamfoorette ikko'i ammane 11-12#Qoc 25:23 ciilluwwi qarameena illageenim joram erokam issitoo'nnim «Lobok hoffaannina ijaajamookko» yamamaa Irbiqana kuramaakko. Eehid ihukkokim Waa'i doo'llookkok eroka baximminne ihoo'n ixxi weeshukkisinne ihoo'isinatte. 13#Mil 1:2 Oohim Keesammi Kitaabanne «Yaaqooba iittaammo; ihukkaarem Eesa'a sabaammo» yamamukkane.

14Eehannata'i mayyinoommo? Waa'i beyyonne golo'immi yoohonnihe? Hore'em ee'isayyo. 15#Doy 33:19 Waa'i Muse'enam «Haafeena hasummaannina haafoommo; qishixxeena hasummaanninam qishixxoommo» yaakko. 16Ee bikkina haafit manni hasukkisinnette te'im yakukkisinnette ihoo'n Waa'i haafukkisinnette. 17#Doy 9:16 Waa'i Faari'oonina «An keese ki'isummok uulli hundannem i summi weeshamoo'isina i malaayye keesenne moo'iseenatte» yaakko. 18Ee bikkina Waa'i hasukkaannina haafookko. Hasukkaannikam wodano duudisookko.

Waa'i Quunqi Bikkinaa Qishixxaxxi Bikkinaa

19Ayyi la'ukko ki'nnuwwi iina «Eehannata'i Waa'i manna mahina jottakko'ookko yoolla? Ixxi yukkoka ayyi sabeena xanookko?» yitakkamo. 20#Isa 29:16; 45:9 Ihukkaarem at Waa'ina eehid yitoottok ayyette? Buchchi mu'ut «Eese mahina ka'isa issitaa baxxitto?» yaa baxu mancho xa'mmoohonnihe? 21Buchchiinsi mu'uta baxoo manchi matoo wereeggina matoo kora'i awwaadinam baxeena xanooyyonnihe? 22Waa'a quuqisimminne bichchina guddo'i keenonne Waa'i ixxeka quunqa la'iseenaa malaayye moo'iseenaa lobakata iyyaqqukkaa'lleensi mayyitakkeenatte? 23Ee'isa issukkokim gaassaatim lombina baxu keenina haafaa ixxeka lophphaakkoo lomba la'iseenatte. 24Oo haafu keenim xale'i Ayihuxxi minaadabiinsette ihoo'n mulli minaadabiinsim weeshammummi neeseme edaatette. 25#Hos 2:23 Oohim Hoose'i Kitaabanne

«I minaadab ikkobee'i keeno

‹I minaadaba› yaa weeshoommo.

Iittantobee'i keenom

‹Iittanto'oo keeno› yaa weeshoommo» yamamukkane.

26 # Hos 1:10 Odim « ‹I minaadabayyo› yamanta'a weeshanto'i uullannem

‹Hee'oo Waa'ina ooso› yamanta'a weeshantamo» yamamukkane.

27 # Isa 10:21-23 Issaayyaasim Isra'ee'l bikkina «Isra'ee'l oosik xig maham dambalaq shashsha'llisa dut ihukkaarem hofqaxichchi gatookko. 28Mashka'oomim Moollanni ixxeka oogato'o malaayyaam quunqinne qaqqisaa uullanne eebookko» yaa alallaataakko. 29#Isa 1:9 Odim Issaayyaas

«Gogoxxi Moollanni Waa'i niina shumo'o gatisubeeta'n

Soddo'mmisaa Gomo'llisaa inkaa hee'nnummo»

yaa gaassaahim kuraakko.

30Eehannata'i neese mayyinoommo? Muccurooma siiddeena yakitambee'i mulli minaadab muccurooma siiddo'o. Oo muccuroomim amma'nnatinne siidamoo muccurooma. 31Ihukkaarem seera egerimminne muccurooma siiddeena yakitam Isra'eel siiddeena xanto'oyyo. 32Eehid ihukkok mahinatte? Muccurooma amma'nnatinne hasimma utta'a baxinne siiddeena hasso'i bikkinatte. Ee'isinne qoloo kinanne qolanto'o. 33#Isa 28:16 Oohim Keesammi Kitaabanne

«Manna qoloo kina#9:33 «Kina» yamamukkok Kiristoosinatte. Yerusaaleemanne dissoommo.

Oohim manna ubbuusoo kina.

Ixxonne amma'nnookkok tuurooyyo» yamamukkane.

Currently Selected:

Oroome'i Asso 9: KeesKita

Highlight

Copy

Compare