Oroome'i Asso 11
11
Isra'ee'l Minaadabina Waa'i Qishixxukkisa
1 #
Filp 3:5
Eehannata'i an xa'mmoommok Waa'i ixxi minaadaba sabaatennihe? Hore'em ee'isayyo. An i gagim Abrihaam shumo'iinsi Biiniyaam moolliinsi qaramaammoo Isra'eelcho. 2Waa'i gaassaatim doo'llu ixxi minaadaba sabukkoyyo. Eeliyaas Isra'ee'l minaadaba Waa'anne kasasu ammane Waa'i mayyuda'e Keesammi Kitaab yookkoka laqqakkamoyyonnihe? 3#1Adl 19:10 «Moollanna! Hiraagaano shito'ookko. Kiina kitimakkam beyyuwwam gindito'ookko. Kaba mexxo'i an gataammo. Eesem shiteena hassamuulla» yukkaare 4#1Adl 19:18 Waa'i mayyaa dabarukko? «Ba'aalina guruphphita'a otossitobee'i kee'nneka lamar kum manna i gagina gatixxaammo» yukko. 5Ee bikkina kabadem Waa'i eroomminne doo'llanto'i kee'nnek baraar yookko. 6Gatimmi Waa'i eroomminnette ihulas eehannata'i bax maham awwaadooyyo. Eehid ihubeelas Waa'ik eroommi eroomma yamameena xanamooyyo.
7Eehannata'i mah erane? Isra'ee'l minaadab hassam luwwa siiddoo'n gatto'ookko. Ihukkaarem doo'llanto'i keen siiddo'ookko. Gattoqax ixxuwwika wodano duudisso'ookko. 8#Se'l 29:4 Oohim Keesammi Kitaabanne
«Waa'i ixxuwwika tiiro jallaa'ukko.
Kaballi afeebe'em ixxuwwina moo'oobee'i illee
macceesoobee'i maccee uwwukko» yamamukkane.
9 #
Maz 69:22-23 Daawiitim
«Ixxuwwik maaddi ixxuwwina qaasha, shikkaa, woshaadaa
ihaa ixxuwwa hawwisona.
10Moo'llambee'isa ixxuwwik illi qooqona.
Ixxuwwik afar heer heerinam quutona» yaakko.
11An xa'mmoommok Isra'eel qolanto'ok ki'llambee'isa ubbeenannihe? Hore'em ee'isayyo. Ixxuwwi ijaajancha sabimminne mulli minaadabina gatimmi waarukko. Oohim ihukkok Isra'eela to'achchisimminatte. 12Kaba ixxuwwik ijaajancha sabimmii ubimmii mulli minaadabina maasso eebukkaa'lleensi Ayihuxxi minaadab hundim daba'llitota'n maassi hinkaa'nna lophphookko.
Yihud Ikkobee'i Mulli Minaadabim Gattamisa
13-14Kaba an mulli minaadabina kuroommo; an ki'nnuwwina asse'amaammoohan ihummisinnem iina qarmanni ihu Ayihuda to'achchisaa ixxuwwiinsi mat mat keeno gatisoommisina an awwaadoommi awwaado lonsoommo. 15Ixxuwwik mogodo'oom mulli minaadaba Waa'inne iittansukkaa'lleensi ixxuwwik daba'llimmi hinkid ihookkoka labissakka'ate? Hore'em lehiinsi ki'immisa.
16Buko'iinsi sarakka'a uwwakko'i lud keesamaakkoohan ihulas buko'i hundoomim keesamaakkoohane. Xaph keesamaakkoohan ihulas caaffuwwim keesamaakkoohane. 17Ihukkaarem caafik mat qax iiqamukkaare at udma'i uulli weer Waa'i maassika baxxantoo'isina caaffuwwi iiqamu beyyonne sikitantaatto. 18Ee bikkina ee iiqamu caaffuwwa gadditte. Gaddilas keese iyyukkok xapha bagaan at xapha iyyitbee'isa sawwihe. 19Ayyi la'ukko at «Ixxuwwi beyyonne an sikitamoommisina caaffuwwi iiqamukko» yitootto. 20Ookki hanqame. Ixxuwwi iiqanto'ok amma'nnato hoogimminnette. Ihukkaarem at amma'nnatonne qoxximminne uullitaatto. Ee bikkina badde bagaan bolxititte. 21Mashka'oomim siram aminne hee'u caaffuwwinam qishixxubee'i Waa'i kiinam qishixxooyyo. 22Waa'ika qishixxatoo muraasoomaa qoosse. Muraasoom ubbo'i keeninatte; ihukkaarem at ee qishixxatonne hee'llilas Waa'ik qishixxat kiinatte. Eehid ihubeelas atim murantootto. 23Ayihuxxi minaadabim amma'nnimma sabimmiinsi daba'llitolas eraa'l beyyonnem daba'llitamo. Mashka'oomim Waa'i eraa'l beyyonne dabareena xanookko. 24At siranne hee'llitti udma'i uulli weeriinsi murantaa sira kiihan ihubee'i kaasamaakkoo weeranne sikitantittaa'lleensi kaasamu weerina siram caaf hee'llo'i keen eraa'l ixxuwwi weerannem daba'llimmi hinkaa'nna sholle'aalla.
Waa'i Hundinam Qishixxoohane
25Iyyabbaayyuwwa, ki'nnuwwi wodanonne qoor manni ikkakko'isa sawwitakkambee'isina mat maaxamaakkoo woshsha ki'nnuwwina kuroommo. Mulli minaadaphphek doo'llantoqax hundim Waa'i beyyo waatteebe'e kolli Isra'ee'llek wodan duudaakko. 26#Isa 59:20 Ee bikkina Isra'eel hundim gatookko. Keesammi Kitaabannem
«Gatisaanchi Xiyooniinsi waarookko.
Waaraa Yaaqoob shumo'iinsi baaxiilo shiinshaa hoorookko.
27 #
Isa 27:9 Ixxuwwika baaxiilo shiinshaa hooreena
aagoommi hidiro ee'isinne wonshoommo» yamamaakko.
28Isra'ee'l minaadab mishiraachchi sagara sabbo'i bikkina Waa'ina maso'o. Ookki ki'nnuwwina danaamo. Ihukkaarem doo'llanchisanne ixxuwwi anno'i bikkina Waa'i iittoo keeno. 29Mashka'oomim Waa'i uwwu uwwanchinaa weeshu weeshanchinaa saxxooyyo. 30Ki'nnuwwi eraare Waa'ina ijaajantakkambee'i keen hee'llakko'o. Ihukkaarem kaba Isra'eel ijaajancha sabimminne haafite siixxitakko'ookko. 31Waa'i ki'nnuwwina moo'isu haafite Isra'eelim siixxitamisina kaba ijaajanto'oyyo. 32Waa'i manni hundinam haafoo'isina manni hundam ijaajancha sabimmanne ixxi quraannaakko.
33 #
Isa 55:8
Waa'aannina lophphaakkoo eroommina, qooroominaa lachchinaa hoola!
Ixxeka oogato'o ayyim saarayyeena xanooyyo.
Ixxeka googo ayyim la'ooyyo.
34 #
Isa 40:13 Keesammi Kitaabannem
«Waa'ika sawwite ayyi la'ookko?
Te'im ixxo sogookkodu ayyette?
35 #
Iyb 41:11
Te'im Waa'i dabaraa miqoo'isina
ixxena liqaayyisookkodu ayyette?» yamamaa kitaabamaakko.
36 #
1Qor 8:6
Hundi luwwim siidamukkok ixxeensette; ixxi kollinnettee ixxennettee.
Ixxena heer heerinam lombi ihona! Aameen.
Currently Selected:
Oroome'i Asso 11: KeesKita
Highlight
Copy
Compare
Share
Want to have your highlights saved across all your devices? Sign up or sign in
