Yohaannis Kaalta 19

1Ee lasage lobakat manni sagara laboo geejji sagar iimanenne

«Handa Waa'ina!

gatisimmi, lombii malaayyii ni Waa'ane!

2 # Se'l 32:43; 2Adl 9:7 Ixxek oogato'i hanqo'anee xabbeenaa ihu bikkina

is saa'imminne uulla bi'isso'i lob saa'aanchonne oogataakko.

Ixxena awwaaddam kee'n xiigam

iseensi miqisaakko» yukkuuyyi macceesummo.

3 # Isa 34:10 Odim

«Handa Waa'ina!

Ise shokkitu'uuyyi wiriir

heer heerinam cawwaa firookko!» yukkuuyyi shuurukko.

4Odim lamiyyii soorem lommannii soorem qooccanchuwwii «Ihona; handa Waa'ina!» yitu'uuyyi adilla'n barcumanne afuuru Waa'i illagenne ubba'a otossito'o.

Gereechchi Bollochcho'i Maaddi Bikkina

5 # Maz 115:13 Ee lasage odim adilla'n barcumiinsi

«Waa'a badditakkam

ixxi awwaadaan hundim hoffokii lobokii

ni Waa'a galaxxehe» yoo sagar firukko.

6 # Hiz 1:24; Maz 93:1; 97:1; 99:1 Odim lobakat manni sagara, lobakat wo'i sagaraa malaayyaam banqi sagaraa laboo sagar

«Handa Waa'ina!

Hundam xanoo ni Waa'i adil ihaakko.

7Gereechchi bollochcho'i afu bikkinaa

ixxi idaayyichchom is gaga gudixxito'i bikkinaa

liirammona, ixxo lonsinonaa ixxenam galata uwwinonaa.

8Isem edde'llamisina

talbiinsi dadamaakkoo danaam muccur belecce'oo eddechchi uwwamukko» yukkuuyyi macceesummo.

Oo talbiinsi dadamu muccur belecce'oo eddechchi Waa'i minaadaphphi muccurooma.#19:8 «Waa'i minaadaphphi muccurooma» yamamaa kitaabamukkok mat mat kitaabbuwwanne «Waa'i minaadaphphi er baxo» yamamaa kitaabamaakko.

9 # Mat 22:2 Ee lasage woddaa'i asse'amaanchi iina « ‹Gereechchi bollochcho'i hii'm hurbaatina weeshanto'i keen maassaammuwwa› yitaa kitaabe» yukko. Odim «Kuk hanqo'i Waa'i sagara» yukko. 10Ee lasage an ixxena otosseena ixxi lokkonne ubummo. Ihukkaarem ixxi iina «An kiinninnee Yesuus bikkina naqqassam kiyyabbaayyuwwinnee maqirem awwaadaanchi ihummi bikkina iina otossititte! Waa'ina otossihe» yukko.

Yesuus naqqasu hanqo'i woshshi hiraagaan naqqasso'i woshsha.

Qadaalli Farashshonne Saa'llaakkoo Farashshaancho

11 # Hiz 1:1 Ee lasage iiman fooqaakkoo moo'ummo. Oono'o! Qadaalli farashsho moo'ummo. Ee farashshonnem saa'llukkok «Amma'nnamaakkoohanee hanqo'anee» yamamoohane. Ixxi hanqo'isa oogatoohanee qasamoohanee. 12#Dan 10:6 Ixxek illim gii'l labana laboohane. Ixxi horoorennem dut adilla'n mare'uwwi yoohane. Odim ixxi gagiinsi bagaan ayyim la'oobee'i summi ixxi hanenne kitaabamaa hee'ukko. 13Ixxim xiiganne cefamaakkoo eddechcha edde'aa hee'ukko. Ixxi weeshamoo summim «Waa'i sagara» yamamaatette. 14Talbiinsi dadamaakkoo qadaalli danaam muccur eddechcha edde'llo'oo iima'n bagadaa'n gogotim qadaalli faradonne saa'llita'a ixxo awwonto'o. 15#Maz 2:9; Isa 63:3; Iyo 3:13; Kal 14:20 Ixxi suumiinsim minaadaba aphphisoo'isina qare'aalli bisa'i firukko. Ixxim minaadaba xaa'l biccinne ijaajaa gassookko. Odim hundam xanoo Waa'ik malaayyaam quunqi woyi'n diqaasa ciinsakkam beyyonne woyina ciinsookko. 16Ixxi eddechchannee ixxi gubeedonnee «Adilluwwina Adila! moollanno'inam Moollanna!» yoo summi kitaabamaakko.

17 # Hiz 39:17-20 Ee lasage odim eelliinchonne uullaakkoo mat asse'amaancho moo'ummo. Ixxim iima'n lambe'enne bararoo ammarina sagara iimaa'aa «Waa'i gudisaakkoo lob maadda 18oohim adilluwwika, gaadaano awwonsitam kee'nneka, qoxxaalluwwika, faraxxekaa faradaa'nnekaa manni hundikam oohim wolaphphekaa agixxekaa odim hoffi kee'nnekaa lob kee'nnekaa maara ittakkeena waattakka'a wixxi'llehe» yaa shuurukko.

19Ee farashshaanchoo ixxi gogotaa qasseena woddaa'i moochchichchii uulli adilluwwii ixxuwwi gogotinnem wixxito'oo moo'ummo. 20#Kal 13:1 Oo moochchichchi qeefadamukko. Ee moochchichchi illagenne aganna issoo «An hiraagaancho» yoo qophphanaanchim ixxenne maqirem qeefadamukko. Ixxim ee moochchichchi mare'e aa'llo'i keenoo ee moochchichchi misilina otossitam hee'llo'i keenoo agannuwwa issukkuuyyi huushisukkane. Oo lamim foorinnem diina yakkam luwwi aphphoo gii'l dambalaqanne darabanto'o. 21Gatto'i keenim ee qadaalli farashshonne saa'llukkaanni suumiinsi firoo bisa'inne leto'o. Ixxuwwi maara ammar hundim goddaa itukko.

Currently Selected:

Yohaannis Kaalta 19: KeesKita

Highlight

Copy

Compare