Yohaannis Kaalta 14

Gereechchii 144,000 Mannii

1 # Hiz 9:4; Kal 7:3 Ee lasage Xiyoo'n duunanne Gereechchi uullaakkoo moo'ummo. Ixxenne maqirem ee Gereechchi summii ixxi anni summii ixxuwwi miinenne kitaabamaakkoo 144,000 manni hee'llo'o. 2Anim lobakat wo'i sagaraa malaayyaam banqi sagaraa laboo sagara iimaniinsi macceesummo. Oo macceesummi sagarim diitta lellitam keen macceesissam diitta'i sagara laboohan hee'ukko. 3Oo 144,000 mannii adilla'n barcu'm illagenne, soorem qooccanchuwwi illagennee lommanni illagennee haareechchi mazmuura zammatto'o. Uulliinsi tisso miqakka'a bito aa'akko'i ee 144,000 manniinsii bagaan ee mazmuura ayyim loseena xanukkoyyo. 4Ixxuwwim woraadduwwi ikko'i bikkina meentinne edanta'a ixxuwwi gaga haashaassitoo'n yo'i keen hee'llo'o.#14:4 Woraadduwwi ikko'i bikkina meentinne edantoo'n yo'i keeno yimmi «Qophpha'n waa'ina otossitobee'i bikkina mucculluwwa» yimma. Ixxuwwim Gereechchi maroo beyyi hundam awwonta'a mattam keeno. Oo keen Waa'inaa Gereechchinaa won keen ikkamisina manni shumo'iinsi tisso miqakka'a bitaa'akko'oo keeno. 5#Saf 3:13 Ixxuwwanne miiqakkam luwwi bee'i keen ikko'i bikkina ixxuwwi suumenne qophphan siidamukkoyyo.

Waa'ika Oogato'o Kuttam Sasem Asse'amaa'n Bikkina

6Ee lasage mulli asse'amaanchim uullanne hee'oo keenina, minaadabina, manni shumo'ina, manni wocoo suuminaa uulli hundinaa heer heerina hee'oo mishiraachchi sagara kureena amadaa iima'nnaannonne lambe'enne bararukkuuyyi moo'ummo. 7Ixxim sagara iimaa'aa «Waa'i oogatoo amman afu bikkina Waa'a baddehe; ixxom lonsehe! Iimane, uulla, dambalaqaa wo'i bu'uwwaa qooccu Waa'ina otossi'llehe» yukko.

8 # Isa 21:9; Erm 51:8; Kal 18:2 Ee lasage la'm asse'amaanchim «Waa'i quunqa eeboo is saa'immika jor woyi'n diqaasa minaadab hundinam agisso'i lob Baabiloone ubbo'oo! Ubbo'oo!» yukkuuyyi luxxi asse'amaancho awwonukko.

9Odim saxxi asse'amaanchim lobakat sagara iimaa'aa «Moochchichchinaa moochchichchi misilinaa otossukkokii ee moochchichchi summi mare'em ixxi miinenne te'im ixxi makki anganne issookkokii ayyim hee'ulas 10#Isa 51:17; Qoc 19:24; Hiz 38:22 qo'anamoo'n Waa'i quunqi humbullonne issamaakkoo woyi'n diqaasa agookko. Odim keesammi asse'amaa'n illagennee Gereechchi illagennee giirinnee diina yakkam luwwinnee #14:10 «Diina yakkam luwwi» uulliinsi firoo giiriinsi firoo bukkamu kina. Ixxi aphphoo ammane manna urussoo wiriir firoohane. barche'e afookko. 11#Isa 34:10 Ixxuwwa barche'e issoo gii'l wiriirim heer heerinam cawwaa iim firookko. Moochchichchinaa moochchichchi misilinaa otossitam keenina te'im ixxi summi mare'e issito'i keenina hundinam ballaa hiimoo hore'em usheexxat hee'ooyyo» yukkuuyyi ixxuwwa awwonukko.

12Waa'i ijaajo egetta'a Yesuusanne qoxxita'a amma'nnito'i Waa'i minaadaphphek xa'nnimmi la'amookkok kannonnette.

13Ee lasage odim iimaniinsi mat sagar «Kaka kitaabe; ka lasage Waa'ina awwaaddu'uuyyi letam keen maassaammuwwa» yukkuuyyi macceesummo. Keesammi Ayyaanim «Eeyya, hanqinam ixxuwwi maassaammuwwa. Ixxuwwim badallatiinsi usheexxitamisina ixxuwwi baxim ixxuwwa awwonookko» yukko.

Moollannik Quunqi Uullanne Ihoo'isa

14 # Dan 7:13 Oono'o! Ee lasage qadaalli umbu'lla moo'ummo. Ee umbu'llannem Manchi Beeto labookkok horoorenne worqiinsi baxamaakkoo kaachchi mare'e issaqqaa odim ixxi angannem qare'aalli jajjara amadaa afuuraa hee'ukko. 15#Iyo 3:13 Odim mulli asse'amaanchim Keesammi Miniinsi firaa umbu'llanne afuuraa hee'ukkaannina lobakat geejji sagarinne «Hurbaata murakkam amman afu bikkina ki jajjara asse'llaa mure. Mashka'oomim uulli hurbaat gogaakko» yaa kurukko. 16Ee bikkina oo umbu'llanne afuuraa hee'ukkok ixxi jajjara uulla asse'aa uulli hurbaata murukko.

17Mulli asse'amaanchim iimanenne yoo Keesammi Miniinsi firukko. Ixxenam qare'aalli jajjar hee'ukko. 18Ee lasage odim giiranne malaayyi yoo mulli asse'amaanchim aduruusa wiriissimmina worqiinsi baxamu mu'utiinsi#14:18 Ku mu'ut Waa'ina kitima kitimakkam mu'utda'e te'im aduruusa wiriissakkam mu'utda'e caakkayyo. firukko. Ixxim qare'aalli jajjara amadu asse'amaanchina lobakata geejji sagarinne «Uullanne yoo woyi'n haqqichchi shogguwwik mish loqu bikkina woyi'n shogguwwa hundam mure» yaa shuurukko. 19Ee bikkina oo asse'amaanchim ixxi jajjara uulla asse'aa uullanne yoo woyi'n haqqichchika shogguwwa murukko. Ee murukkokam Waa'i quunqaannonne woyi'n diqaasa ciinsakkam haraar beyyonne darabukko. 20#Isa 63:3; Kich 1:15; Kal 19:15 Oo woyinim beero'iinsi biireen woyina ciinsakkam beyyonne ciinsamukko. Ee ciinsamu woyiniinsim xillaalloom faraxxi hakkamma afooqax xiig firaa 296 kiilomeetira ihooqax beyyo daadukko.#14:20Giriik kitaab «Mat kumaa loh xibbi istaadiyooma» yookko.

Currently Selected:

Yohaannis Kaalta 14: KeesKita

Highlight

Copy

Compare