Maatiwoos Mishiraachcha 22
22
Bollochcho'i Maaddi Kobi'llishsha
(Luq 14:15-24)
1Odim Yesuus kobi'llishshinne ixxuwwina 2«Iima'n adillan ixxi beetina bollochcho'i maadda gudisu adila kobi'llookko. 3Oo adilim weeshanto'i keen bollochcho'ina waattona kuttam awwaadaano asse'ukko. Ihukkaarem ixxuwwi waatteena hasso'oyyo.
4«Oo adil odim mulli awwaadaanom ‹Weeshanto'i keenina «Oono'o, bollochcho'i maadda gudisaammo. Iikki xiikkamu mirgo'uwwii lijjuwwii duramaakko; hundem luwwim gudaakko. Ee bikkina bollochcho'o waallehe» yitakka'a kullehe› yaa asse'ukko.
5«Ihukkaarem weeshanto'i keen ee woshsha gadda'a mat abuulli beyyo, mullekim dadda'l beyyo marukko. 6Gatto'i keenim ee awwaadaano amadda'a lobakata barche'e issita'a lasage ganta'a shito'o. 7Ee bikkina adil lobakata quuqaa ixxi gaadaano asse'aa ee shito'i keeno bi'isukko. Ixxuwwi beero'om shokkiisukko.
8«Ee lasage ixxi awwaadaanina ‹Oono'o, bollochcho'i maaddi gudaakko. Ihukkaarem weeshanto'i keen labbambee'i keeno. 9Ee bikkina bur hundam mattakka'a siiddakko'oka ayyem bollochcho'i maaddina weeshshehe› yukko.
10«Oo awwaadaanim bur hundannem siiddo'oka ayyem jor keenom ihukko er keenom wixxaa'llo'o. Ee'isinne bollochcho'i minenne manni wo'mmukko.
11«Adilim weeshanto'i keeno moo'eena mine aagu ammanenne bollochcho'i eddechcha edde'ubee'i mat mancho moo'ukko. 12Ixxenam ‹Iyyabbaayyo, bollochcho'i eddechcha edde'lloo'n hinkid ka beyyo aaggitto?› yukko. Ihukkaarem oo manchi maham wocukkoyyo.
13 #
Mat 8:12; 25:30; Luq 13:28 «Adilim awwaadaanina ‹Angaa lokkoo kattakka'a biiranne tuunsonne uunjehe. Eekke'em wi'llimmaa inqe iicimmaa ihookko› yukko. 14Weeshanto'i keen duta; ihukkaarem doo'llanto'i keen hofqaxa» yukko.
Gibi'l Bikkina Xa'mmakko'isa
(Mar 12:13-17; Luq 20:20-26)
15Ee lasage Farisaawe'uwwi matta'a Yesuusa wocoo woshshinne digaadda'a amaddeena a'llanto'o. 16Ee bikkina ixxuwwika losaano Heeroodis manninne maqirem Yesuusa «Losisaancho! At hanqo'ane, Waa'i googom hanqo'isinne losissoohane; ayyenam golo'lloo'n gudaanchoominnem moo'lloo'isa lanqoommo. 17Hino'o kure, kiina malabookko? Oroo'm adilina gibiro miqimmi hasisoohonnii hasisooyyo?» yita'a xa'mmitona asse'llo'o.
18Ihukkaarem Yesuus ixxuwwika jor sawwite la'u bikkina «Ki'nnuwwi birammaano, mahina eese keentakkamuulla? 19Huno'o, gibiro miqakkam diinate iina moo'issehe» yukko. Ixxuwwim mat diinaara eebbo'o. 20Yesuusim ixxuwwina «Ka diinatenne yoo misilii kitaabii ayyane?» yaa xa'mmukko.
21Ixxuwwim «Adi'llane» yito'o. Yesuusim dabaraa «Eehaara'i adi'llan ihu luwwa adilinam uwwehe. Waa'an ihu luwwa Waa'inam uwwehe» yukko. 22Ixxuwwim ee wocu woshsha macceessa'a maalalto'o; ixxi beyyiinsim matto'o.
Lehiinsi Ki'immi Bikkina Yesuusa Xa'mmakko'isa
(Mar 12:18-27; Luq 20:27-40)
23 #
Ass 23:8
Ee ballam «Manni lehaa lasage ki'ooyyo» yitam Saduuqaawe'uwwi Yesuus beyyo waatta'a 24#Se'l 25:5 «Losisaancho! Muse'e ‹Mat manchi ooso qaroo'n lehuta'n ixxi abbaayyi ixxi meentichcho laggassaa lehukkaannina shumo'o fissona› yaakko. 25Niinninne lamar abbaayyuwwi hee'llo'o. Ixxuwwiinsim won meento eebaa ooso qaroo'n lehu bikkina wona awwonaanchi ee lehu manchi meentichcho laggassukko. 26Ee'isinne la'mmekim saxxekim lama'llaannonne afeebe'e kor korinne lago gassamaa lehamukko. 27Hundiinsi lasaanchonne meentichchom leto'o. 28Eehaare hundima'i ee meentichcho eebaakko kichchi ayyaamo hinkannina arette ikkamo?» yita'a xa'mmito'o.
29Ihukkaarem Yesuus ixxuwwina «Ki'nnuwwi Keesammi Kitaabaa Waa'i malaayyee laqqakkambee'i bikkina huushantakko'ookko. 30Mashka'oomim lehiinsi kichchi ayyaamo iimanenne Waa'i asse'amaa'nnisa ihookko bagaan eebooyyoo ladiisooyyoo. 31Ihukkaarem lehiinsi kichchi bikkina Waa'i ki'nnuwwina yukkoka qananaa'llakko'oyyonnihe? 32#Doy 3:6 Ixxi ‹An Abrihaam Waa'a, Yisaaq Waa'aa Yaaqoob Waa'aa› yaakko. Waa'i hee'oo kee'n Waa'a bagaan lehu kee'n Waa'ayyo» yaa dabarukko.
33Mannim eekka macceesaa ee losanonne maalalukko.
Hundiinsi Lophphoo Ijaacci Bikkina
(Mar 12:28-34; Luq 10:25-28)
34Saduuqaawe'uwwim Yesuusina dabattam luwwa hooggo'isa Farisaawe'uwwi macceessa'a wixxito'o. 35#Luq 10:25-28 Ee Farisaawe'uwwiinsim Seera erisa la'oo mat Yesuusa keeneena hasaa 36«Losisaancho! Ijaaj hundiinsim lophphookkok hinkane?» yaa xa'mmukko.
37-38 #
Se'l 6:5
Yesuusim ixxena «Hundiinsim lophphoo luxxi ijaaj ‹Ki Moollanni Waa'a wo'm wodaninne, wo'm foorinnee wo'm tiirinnee iitte› yoohane. 39#Qes 19:18 Eekka laboo la'm ijaajim ‹Ki beshichcho ki gaqqisa iitte› yoohane. 40Seerii hiraagaa'n losishshii hundim shooho'amukkok ee lamem ijaajonnette» yaa dabarukko.
Kiristoos Bikkina Hincu Xa'mmichcha
(Mar 12:35-37; Luq 20:41-44)
41Farisaawe'uwwi wixxita'a hee'llo'isam Yesuus 42«Waa'i doo'llaakkoo Kiristoos bikkina maha sawwitakkamo? Ixxi ayyi beeto?» yaa xa'mmukko. Ixxuwwim «Daawiit Beeto» yita'a dabatto'o.
43Yesuusim «Eehaare Daawiit Keesammi Ayyaa'n malaayyinne ‹I Moollanna› yukkok mahinatte? Ee'isam
44 #
Maz 110:1
‹Waa'i i Moollannina
Ki diina'a ki lokkiinsi woroon isseembe'e
i makkanne afuure› yaakko.
45Daawiit ‹I Moollanna!› yaa weeshulas eehaare Kiristoos hinkid Daawiitina beet iheena xanookko?» yaa xa'mmukko.
46Ee lasage ayyi manchim Yesuusina matem sagaram dabareena xanukkoyyo. Ee balliinsi ki'isaa ayyim ixxo od mulli xa'mmichcha xa'mmeena iggukkoyyo.
Currently Selected:
Maatiwoos Mishiraachcha 22: KeesKita
Highlight
Share
Compare
Copy
Want to have your highlights saved across all your devices? Sign up or sign in
