Maatiwoos Mishiraachcha 19

Meento Hollimmi Bikkina

(Mar 10:1-12)

1Yesuusim ka woshsha wocaa guullaa lasage Galiiliinsi ki'aa Yoordaanoos daajji eeqidonne yoo Yihuxxi uulla marukko. 2Lobakat minaadabim ixxo awwonto'aare eekke'em ixxuwwa fayyiisukko.

3Mat mat Farisaawe'i ixxi beyyo waatta'a ixxo keenteena hassa'a «Mat manchi ayyi mashka'innem ixxi are hollona seer uwwoohonnihe?» yita'a xa'mmito'o.

4 # Qoc 1:27; 5:1 Yesuusim dabaraa «Qooccaanchi gaassaatim goonaa meentoo issaa qooccukko. 5#Qoc 2:24 ‹Ee bikkina manchi annaa amaa uraa ixxi arenne mat ihookko. Lamim mat xiigaa mat maaraa ikkamo› yookkoka Keesammi Kitaabanne qananaa'llakko'oyyonnihe? 6Lamim mat orachchi ikkamo bagaan lamoyyo. Waa'i mat issukkoka manni annanni issoone» yukko.

7 # Se'l 24:1 Farisaawe'uwwim «Eehannata'i Muse'e ‹Mat manchi are holloo ammane furma uwwaa hollona› yaa ijaajukkok mahinatte?» yito'o.

8Yesuusim dabaraa «Meento hollitakkona Muse'e kuru mashka'i ki'nnuwwik wodan qoxxaalli ihu bikkinatte bagaan luxxeka ee'isayyo. 9#Mat 5:32; 1Qor 7:10 Ihukkaarem an ki'nnuwwina kuroommo; mat manchi ixxi are saa'immi mashka'innette ihoo'n mulli mashka'inne hollaa mulleta eebulas saa'aakko. Is aro'i hollukkota eebookkokim saa'aakko#19:9 «Is aro'i hollukkota eebookkokim saa'ookko» yoo sagar mat mat gaassi tirattuwwanne bee'e.» yukko.

10Ixxi losaanim «Goonchikii meentichchokii duuha'i ka'isa ihulas meento eebakkoo'n hee'immi erane» yito'o. 11Ihukkaarem Yesuus ixxuwwina «Mine issakkoo'n hee'immi xanamookkok xale'i uwwamu keeninatte bagaan hundina ihoobee'ane. 12Mashka'oomim muleessa'i ikka'a qaranto'i keen yo'o; manni muleessa'i issu keenim yo'o. Waa'i adillanonne aagimmina yita'a ixxuwwi gaga muleessa'i issito'i keenim yo'o. Ee bikkina kaka aa'eena xanookkok aa'ona» yukko.

Ciilluwwa Yesuus Maasse'ukkisa

(Mar 10:13-16; Luq 18:15-17)

13Yesuus ixxi anga hanenne issaa maasse'oo'isina ciilluwwa ixxi beyyo eebakko'aare ciilluwwa eebu manna ixxi losaan wocanto'o. 14Ihukkaarem Yesuus «Waa'i adillanonne hee'llam keen kido'i keen ikko'i bikkina ciilluwwi i beyyo waatteena hoottakkotte» yukko. 15Ixxi angam ciilluwwi hanenne issaa maasse'aa lasage ee beyyiinsi marukko.

Ka Uulli Goddi Bikkinaa

(Mar 10:17-31; Luq 18:18-30)

16Mat ayyaamo mat woraadichchi Yesuus beyyo waaraa «Losisaancho! Heer hee'l heechcha siixxeena er luwwa maha isso?» yaa xa'mmukko. 17Yesuusim «Er luwwi bikkina mahina eese xa'mmitoolla? Erok mexxo'i Waa'a. Ihukkaarem heer heerina hee'oo heechcha siiddeena hassilas ijaajo egere» yukko.

18 # Doy 20:13; Se'l 5:17; Doy 20:14; Se'l 5:18; Doy 20:15; Se'l 5:19; Doy 20:16; Se'l 5:20 Oo woraadichchim «Hinki ijaajo?» yukko. Yesuusim «Shititte, saa'llitte, game'llitte, qophphano naqqassitte, 19#Doy 20:12; Se'l 5:16; Qes 19:18 annaa amaa lonsee ki beshichcho ki gaqqisa iittee» yukko.

20Woraadichchim «Ka ijaaja'i egeraammo. Mullek xa'oo luwwi maha?» yukko. 21Yesuusim «Muccur ihimma hassilas iimanenne godda siixxiteena mattaa kiina yoo luwwa biteessaa diinatooma buxina uwwitaa waattaa eese awwone» yukko. 22Ihukkaarem oo woraadichchi ixxena lobakat amaxxi hee'u bikkina eekka macceesu ammanenne kichche'ukkuuyyi marukko.

23Ee lasage Yesuus ixxi losaanina «Hanqinam an ki'nnuwwina kuroommo; goddaanchi manchina Waa'i adillanonne aagimmi kee'mmaalla. 24Odim an ki'nnuwwina kuroommo; goddaanchi manchi Waa'i adillanonne aagimmiinsi gaameelakkichchi marfi afo'inne firimmi sholle'ookko» yukko.

25Ixxi losaanim eekka macceesso'i ammanenne lobakata maalalta'a «Eehannata'i ayyi gateena xanookko?» yito'o. 26Yesuusim ixxuwwa moo'ukkuuyyi «Kaka manni xanooyyo. Ihukkaarem Waa'i hundi luwwam isseena xanookko» yukko.

27Ee ammanenne Pheexiroos «Oono'o! Neese hundi luwwam ullaa keese awwonnaammo. Eehannata'i maha siindoommo?» yukko. 28#Mat 25:31; Luq 22:30 Yesuusim ixxuwwina «Hanqinam an ki'nnuwwina kuroommo; haareechchi uullanne Manchi Beet lombinne adilla'n barcumanne afuuroo ammane i losaan ikkakko'i ki'nnuwwim tommonnee lam adilla'n barcumannee afuuttakkamo. Tommonnee lamem Isra'ee'l sullonnem oogattakkamo. 29Ayyi manchim i summi mashka'inne ixxeka mine, abbaayyuwwa, aayyuwwa, anna, ama, oosoo uullaa urookkok xibbi qinxite a'llookko; heer heerina hee'oo heechcham siixxookko. 30#Mat 20:16; Luq 13:30 Ihukkaarem illag hee'llo'i kee'nnek lobakat keen lasaanchi ikkamo. Lasaanchi hee'llo'i kee'nnekim lobakat keen illag ikkamo» yukko.

Currently Selected:

Maatiwoos Mishiraachcha 19: KeesKita

Highlight

Compare

Copy