Maatiwoos Mishiraachcha 17

Yesuusik Hagar Daba'llukkisa

(Mar 9:2-13; Luq 9:28-36)

1 # 1Phex 1:17,18 Loh balliinsi lasage Yesuus Pheexiroosa, Yaaqoobaa Yaaqoob abbaayyi Yohaannisaa mulli keeniinsi annanni issaa awwonsaa mat lob duunanne firukko. 2Eekke'em ixxuwwi moo'llu'uuyyim Yesuus mulli hagaranne daba'llukko. Ixxek illi kollim eelliinchisa caakkisukko. Eddechchim belecce'oo qadaalli ihukko. 3Ee lasage Muse'ennee Eeliyaasinnee Yesuus atoorarukkuuyyi sasem losaanim moo'llo'o. 4Pheexiroosim Yesuusina «Moollanna! Neese ka beyyonne hee'nnumta'n danaamo; at hassittaare sas daasa matoo kiina matoo Muse'ena matoo Eeliyaasina baxoommo» yukko.

5 # Qoc 22:2; Maz 2:7; Isa 42:1; Mat 3:17; 12:18; Mar 1:11; Luq 3:22; Se'l 18:15 Pheexiroos eekka wocukkuuyyim lobakata belecce'oo umbu'l waaraa ixxuwwa ifiisukko. Umbu'l woriinsim «An iittoommi i beet, ixxonnem an liiramoommok kane; ixxeensi macceessehe!» yoo sagar waarukko. 6Losaanim ee sagara macceesso'i ammanenne lobakata muggito'i bikkina illillaachcha ubbo'o. 7Ihukkaarem Yesuus ixxuwwi kollonne hincaa ixxuwwa nakkaa «Badditakkotte; ki'llehe» yukko. 8Ixxuwwim iimita'a moo'llo'i ammanenne Yesuusiinsi bagaan matom moo'llo'oyyo.

9Duuniinsi dillitu'uuyyi Yesuus ixxuwwina «Manchi Beet lehiinsi ki'eebe'i afeebe'e ki'nnuwwi moo'llakko'oka ayyenam kuttakkotte» yaa ijaajukko. 10#Mil 4:5 Losaanim «Eehaare Seera losisaan ‹Gaassaa Eeliyaas waarimmi hasisookko› yitamok mahinatte?» yita'a Yesuusa xa'mmito'o. 11Yesuusim dabaraa «Eeliyaas gaassaa waarookko. Ixxim hundem luwwam gudisookko. 12#Mat 11:14 Ihukkaarem an ki'nnuwwina kuroommo; Eeliyaas gaassim waaraakko. Waarukkaarem minaadab ixxo laqqo'oyyo. Ee bikkina ixxo hasso'is hundam issito'o. Ee'isam Manchi Beetim ixxuwwi angiinsi hawwo aa'ookko» yukko. 13Losaanim ixxi wocam hee'ukkok Xammaqaanchi Yohaannis bikkinatte ihukkisa laqqo'o.

Habus Amadaakkoo Beeto Yesuus Fayyiisukkisa

(Mar 9:14-29; Luq 9:37-43)

14Ixxuwwim minaadaphphi beyyo waatto'i ammanenne mat manchi Yesuus beyyo hincaa ixxi illagenne guruphphaa 15«Moollanna! I beetina qishixxe! Xafanni amadaa jorisa hawwoolla. Lobakat ammanem giirannee wo'onnee ubbuusoolla. 16An ixxo ki losaa'n beyyo eebaa hee'ummo. Ihukkaarem ixxuwwi fayyiisseena xanto'oyyo» yukko. 17Yesuusim «Ki'nnuwwi hinkido'i amma'nnat bee'i boqqi qarancha! An hinkaa'n amman afeebe'e ki'nnuwwinne hee'oommo? Hinkaa'n amman afeebedu ki'nnuwwika iyyaqqoommo? Hino'o, beetooma i beyyo eebbehe» yukko. 18Yesuusim habusa ijaaju ammanenne beetiinsi habus firukkaare ee ammanem fayye'ukko.

19Ee lasage ixxi losaan Yesuus beyyo hincita'a «Neese habusa fissineena xannumbee'ek mahinatte?» yita'a mulli manni macceesoobee'isa xa'mmito'o. 20#Mat 21:21; Mar 11:23; 1Qor 13:2 Yesuusim «Ki'nnuwwik amma'nnat hoffan ihu bikkinatte. Hanqinam an ki'nnuwwina kuroommo; winxo'i shaa'n sireqax amma'nnat ki'nnuwwina hee'uta'n ka duuna ‹Ka beyyiinsi ki'llaa eekke'e mare› yitakko'aare marookko. Ki'nnuwwa kaa'oo luwwim ma'lluchchim hee'ooyyo. 21Ihukkaarem kido'i habus soommanakka'a Waa'a uunxakkobeelas hore'em firooyyo» yaa dabarukko.#17:21 Mat mat gaassi tiraxxi kitaabbuwwanne ku xig bee'e.

Yesuus Lehaa Ki'oo'isa La'mmaagge Wocukkisa

(Mar 9:30-32; Luq 9:43-45)

22Losaan hundim Galiilanne mat ikka'a wixxito'i ammanenne Yesuus ixxuwwina «Manchi Beeto manni anganne higisakka'a uwwakkamo. 23Ixxuwwim ixxo shitamo. Ihukkaarem saxxi ballanne lehiinsi ki'ookko» yukko. Ee bikkina losaan lobakata kichche'llo'o.

Keesammi Mi'n Gibiro Yesuus Miqukkisa

24 # Doy 30:13 Yesuusii ixxi losaanii Qifirinnaahoom beero'o waatto'i ammanenne Keesammi Mi'n gibiro#17:24 «Giriik kitaab lam diraakma» yookko. Oohim lam diraakmi lam balli bax malaayyina miqakkam diinaxqaxaa yimma. miqisaan Pheexiroos beyyo waatta'a «Ki'nnuwwik losisaanchi Keesammi Mi'n gibiro miqooyyonnihe?» yita'a xa'mmito'o. 25Pheexiroosim «Eeyya, miqookko» yaa dabarukko. Pheexiroosim mine aagu ammanenne gaassaahim Yesuus «Simi'oona, kiina maha labookko? Ka uullik adilluwwi qaraxo te'im gibiro aa'llamok ayyeensette? Ixxuwwi oosiinsettennii te'im mulli manniinsette?» yaa xa'mmukko. 26Pheexiroosim «Mulli manniinsette» yaa dabarukko. Yesuusim «Eehidette ihulas ixxuwwik oos gibiro miqimmiinsi gatto'oo keenoo yimmayyonnihe? 27Ihukkaarem ixxuwwi qolantambee'isina dambalaqa mattaa shikka ubbuussaa luxxeka amaddoo qurxummekkichchika suume fooqaa'lloo ammane lam kin bira siiddootto; eeham massitaa iinaa kiinaa miqe» yukko.

Currently Selected:

Maatiwoos Mishiraachcha 17: KeesKita

Highlight

Compare

Copy