Maatiwoos Mishiraachcha 14

Xammaqaanchi Yohaannis Lehukkisa

(Mar 6:14-29; Luq 9:7-9)

1Ee doollenne Galii'l uullina gassaanchi hee'u Heeroodis Yesuus bikkina manni er sado wocukkuuyyi macceesaa 2ixxena awwaaddam keenina «Kuk Xammaqaanchi Yohaannisatte; lehiinsi ki'aakko. Ka aganna baxoollak ee bikkinatte» yukko.

3 # Luq 3:19,20; Qes 18:16; 20:21 Heeroodis ixxi abbaayyi Filiphphoosina arette hee'llo'i Heeroodiyaad mashka'inne Yohaannisa amadiisaa karaxxi minenne kassiisaa hee'ukko. 4Kassiisu mashka'im «Kiyyabbaayyi are at eebbona Seer uwwooyyo» yaa Heeroodisina Yohaannis wocam hee'u bikkinatte. 5Ee bikkina Yohaannisa sheena Heeroodis hasam hee'ukko. Ihukkaarem minaadab ixxo hiraagaanchi issaa moo'am hee'u bikkina minaadaba baddukko.

6Heeroodis qaramu ayyaamo lonsakkam balla weeshamu manni illagenne Heeroodiyaad landichcho kajja kadda'a Heeroodisa liiransito'o. 7Ee bikkina xa'mmito'i luwwi hundam uwweena hide'ukko.

8Landichchom is ama soggo'isinne «Xammaqaanchi Yohaannisika gaanjiinsi iim yooqaxa qunuunchonne issitaa kaba uwwe» yito'o. 9Ee woshshanne adil kichche'ukko. Ihukkaarem koyyi illagenne hide'aa hee'u bikkina isena uwwakkamisina ijaajukko. 10Ee bikkina manna asse'aa Yohaannisika gaanje karaxxi minenne mussiisukko. 11Muramu horoorem qunuunchonne issakka'a eebakka'a landichchona uwwakko'o. Isem amana massita'a uwwito'o. 12Yohaannis losaanim waatta'a leeshooma massita'a waammito'o. Ee woshsham matta'a Yesuusina kutto'o.

Onti Kum Mannina Yesuus Hurbaata Itisukkisa

(Mar 6:30-44; Luq 9:10-17; Yoh 6:1-14)

13Yesuusim Yohaannis lehukkisa macceesu ammanenne wongiranne aagaa ee beyyiinsi manni bee'i beyyo mullam marukko. Minaadabim eekka macceesso'i ammanenne beero'uwwiinsi lokkinne ixxo awwonto'o. 14Yesuusim wongiriinsi firu ammanenne lobakat minaadaba moo'aa qishixxukko. Jabbaano fayyiisukko.

15Uulli hiimu ammanenne Yesuusik losaan ixxi kollonne hincita'a «Ku beyyi manni gatti bee'i beyyo. Ammanim hiimaakko. Ee bikkina gattuwwa matta'a ixxuwwi gagina hurbaata bito a'llitamisina ka minaadaba geegeese» yito'o. 16Yesuusim «Ittam luwwa ki'nnuwwi uwwehe bagaan marimmi hasisooyyo» yukko.

17Ixxuwwim «Niina'i yookkok xale'i onti xeffo'i qorosho'oo lam qurxumme'ee» yita'a dabatto'o.

18Ixxim «Eeqaxam i beyyo eebbehe!» yukko. 19Minaadabim hixenne afuuroo'isina ijaajukko. Ee lasage ontem xeffo'i qorosho'oo lamem qurxumme'ee amadaa iimane moo'aa Waa'a galaxxaa qorosho'o iiqansaa ixxi losaanina uwwukko. Ixxi losaanim minaadabina uwwito'o. 20Minaadab hundim itta'a goddita'a gatu giggira tommonnee lam sanfonnee wonshita'a ki'isso'o. 21Itu minaadabim meentii oosii xigamoo'n xale'i goon onti kuma ihooqax hee'ukko.

Dambalaq Hanenne Yesuus Taakke'ukkisa

(Mar 6:45-52; Yoh 6:15-21)

22Ee lasage minaadaba geegeesukkuuyyi ixxi losaan wongiranne aagga'a dambalaq eeqidonne ixxeensi gaassita'a fittamisina Yesuus ijaajukko. 23Minaadaba geegeesaa lasage Waa'a uunxeena mullam duunanne firukko. Uulli hiimaa lasagem ixxi ee beyyonne mullam hee'ukko. 24Ee ammane wongir dambalaq tochchiinsi qee'llaa hee'ukko. Malaayyaam hafachchi ki'aa hee'u bikkina ixxi losaan hambu'llaminne hawwitam hee'llo'o.

25Luxxi antabaa'i muuneena ihaakkoohaannonne Yesuusim dambalaq hanenne taakke'ukkuuyyi ixxi losaa'n kollonne waarukko. 26Ixxi losaanim dambalaqanne taakke'ukkuuyyi maroo'isa moo'llo'i ammanenne «Kuk wiidda» yita'a lobakata baddita'a laatto'o. 27Ihukkaarem Yesuus ee ammanem «Anette; badditakkotte» yaa wocukko.

28Pheexiroosim ixxena dabaraa «Moollanna! Atette ikkilas wo'i hanenne taakke'aa ki beyyo waaroommisina ijaaje!» yukko.

29Yesuusim «Waare» yukko. Ee bikkina Pheexiroos wongiriinsi firaa Yesuus beyyo afeena dambalaq hanenne taakke'ukkuuyyi marukko. 30Ihukkaarem ee malaayyaam hafachcha moo'u ammanenne baddukko. Wo'onnem xuuxamukkuuyyi maru ammanenne «Moollanna! Eese gatise!» yaa laarukko.

31Yesuusim qaqqisaa Pheexiroosika anga amadaa «Kiikki amma'nnat gootto'o. Mahina maltitto?» yukko.

32Ixxuwwim wongiranne aaggo'i ammanenne hafachchi uullukko. 33Wongi'l woronne hee'llo'i losaanim «Hanqinam at Waa'i Beeto!» yita'a otossito'o.

Gensereexanne Jabbaano Yesuus Fayyiisukkisa

(Mar 6:53-56)

34Ixxuwwim dambalaqa fitta'a Gensereexa yakkam uulla waatto'o. 35Ee uullanne hee'llo'i mannim Yesuusatte ihukkisa inkiinnito'i ammanenne gadanonne yoo uulli hundam asse'lla'a jabbaano ixxi beyyo eebbo'o. 36Jabbaanim ixxi eddechchika kasoomam nakkimmina uunxitam hee'llo'o. Nakkito'i keen hundim fayye'llo'o.

Currently Selected:

Maatiwoos Mishiraachcha 14: KeesKita

Highlight

Compare

Copy