Issaayyaas Kitaaba 56
56
Ijaajamoo Ayyim Gatimma Siidoo'isa
1Waa'i ixxi minaadabina «Hanqa egellehe; er baxo baxxehe; iikki gatisimmi waareena, i muccuroomim la'ameena hincaakko. 2Usheexxaxxi balla haashaassoo'n lonsookkok, jora baximmiinsi qee'llaa gaga ege'llookkok maasse'amaakkoohane» yoolla.
3Waa'i kollonne hincu waaraanchi «Hanqinam Waa'i ixxi minaadabiinsi eese annanni issookko» yoone.
Muleessa'im «An gogaalli haqqichcho» yoone. 4Waa'i «I Usheexxaxxi balla lonsaa, eese liiransoo luwwam doo'llaa i hidi'l sagaram egeroo muleessa'uuwwina 5i Keesammi Minennee i ooxxi woronnee goon oosina landi oosinaa yoohaanniinsi lophphoo tiissiishshi luwwaa summaa ixxuwwina uwwoommo. Heer heerinam bi'oobee'i summam uwwoommo» yoolla.
6Waa'ina awwaaddeenaa ixxi summam iittita'a otossiteenaa ixxi kolli hincitam waaraanina, Usheexxaxxi balla haashaassitoo'n lonsitam keeninaa ixxi hidi'l sagaram egettam keenina hundinamii Waa'i 7#Mat 21:13; Mar 11:17; Luq 19:46«I Keesammi duunanne woroommo; eese uunxakkam minennem liiransoommo; iina kitima hincaa'akkam beyyonne shokkiisakka'a hincaa'akkam kitimaa mulli kitimmuwwaa hincaa'llam ammanem aa'oommo. Oohim i min minaadab hundinam ‹Uunxaxxi mine› yamamoo bikkinatte» yoolla.
8Isra'eeliinsi binnito'i keeno wixxaa'oo Moollanni Waa'i «Wixxito'i kee'n beyyonne mulli keenom wixxaa'oommo» yoolla.
Isra'ee'l Awwonsaan Sabanto'isa
9Ki'nnuwwi udma'i uullanne yoontakke'i moochchi hundim ki'nnuwwim doo'm wo'l moochchi hundim ittakkeena hinci'llehe. 10Isra'ee'l awwonsaan qooqquwwa; hundim lachchi beekeeno; hundim duud wisha; muunta'ahim xantamoyyo; ixxuwwi diriiraammuwwa; iinse'lla'ahim haqaawwe'llamo. 11Itimma iittaalluwwa; itaa goddoobee'i wishisa. Qoossitambee'i allaaraano; hundim ixxuwwi gaqqi googonne matto'o; annannichchim ixxi gagina awwaadoo luwwa siixxeena geeramookko. 12Ixxuwwim «Waallehe; woyi'n diqaasa angona; dimbisoo agginnem xeebo mu'llinona; kaballa ihukkisam soodom ihookko; kaballaanniinsi sooxxek lophpookko» yitamo.
Currently Selected:
Issaayyaas Kitaaba 56: KeesKita
Highlight
Copy
Compare
Share
Want to have your highlights saved across all your devices? Sign up or sign in
