Issaayyaas Kitaaba 50
50
1Waa'i «An ki'nnuwwi ama hollummi furim hannonne yookko?
Te'im ki'nnuwwa biteesummok
hinka'i bada'n manchinatte?
Ki'nnuwwi baxxakko'i baaxii'l bikkina biteesantakko'ookko.
Ki'nnuwwi hawwoddakko'i hawwojji bikkinam
ki'nnuwwi ama hollanto'ookko.
2«An waarummi ammane ee beyyonne
mahina manni matim hee'ukkoyyo?
An weeshummi ammane yeehoo manchi
mahina ee beyyonne bee'ukko?
I angi ki'nnuwwina agaageena gundaahinnihe?
te'im ki'nnuwwa gatiseena iina malaayyi bee'aahinnihe?
An shaaqoommaare dambalaq gogookko;
daajjuwwam udma'i uulli issoommo;
ixxuwwi woronne hee'oo qurxumme'im
wo'o hoogaa lehaa shamookko.
3Iimane tuunsinne ifiisoommo;
xiddi eddechcham ifiishshaanchi issoommo.
Waa'ik Awwaadaanchi Ijaajamukkisa
4Hoogaan keeno hinkid qoxxisimmi hasisooda'e
la'oommisina Moollanni Waa'i iina losisaanchi allabo uwwaakko.
Losaa'nnisa macceesona i macce fooqaa'ookko;
dar daram eese baqaa'ookko.
5Moollanni Waa'i i macce fooqaa'aakko.
Anim boqqayyo;
lasom daba'llummoyyo.
6 #
Mat 26:67; Mar 14:65 Eese gantam keenina afare,
i haareedda coggam keeninam i xabano uwwummo.
Eesenne anja tuhitu'uuyyi eese sholliissam keeniinsim
i ille maaxummoyyo.
7Moollanni Waa'i iina hara'mmoo bikkina,
an tuuroommoyyo.
Ee bikkina i illi kollo bancisa issaammo;
tuuroombee'isam la'oommo.
8 #
Oro 8:33,34 An muccur ihummisa naqqasookkok i gadanonnette;
eehannah eese kasaseena xanookkok ayyette?
Hino'o, mat inkaa uullinona;
iinninne uullixxamookkok ayyette?
Hino'o, i kolli waarona.
9Moollanni Waa'i iina hara'mmookko;
eehannah eesenne oogatookkok ayyette?
Ixxuwwi hundim eddechchisa ebeettamo;
bilim ixxuwwa itookko.
10Ki'nnuwwiinsi Waa'a baddookkok,
ixxi awwaadaanchi sagaram macceesookkok ayyette?
Oo manchi taakke'ookkok tuunsonnetti ihukkaa'lleensii
ixxenam caakki bee'ulasii
Waa'anne amma'nnamona; Moollannannem bakke'ona.
11Ihukkaarem kaba giira giittakka'a
ki'nnuwwi gaqqi aphphoo giira amaddakko'i keen hundim,
ki'nnuwwi xanqissakko'i gii'l labaninnee xomboo'l gii'l caakkinnee mallehe.
I angiinsi aa'llakkamok kane.
Kichchechchinnem iinse'llakkamo.
Currently Selected:
Issaayyaas Kitaaba 50: KeesKita
Highlight
Copy
Compare
Share
Want to have your highlights saved across all your devices? Sign up or sign in
