Issaayyaas Kitaaba 2
2
Heer Hee'l Xummi bikkina
(Mik 4:1-3)
1Yihuxxi uulli bikkinaa Yerusaalee'm beero'i bikkinaa Amoox beet Issaayyaasinne ihaa Waa'i wocu sagar kane.
2Lasaanchi doollenne
Waa'ik Keesammi Min yoo duun
mulli duunnuwwiinsi hundiinsim lophphaa moo'amookko.
Hoffi duunnuwwiinsi hundiinsim lophphookko;
uulli minaadab hundim ixxi kollonne waattamo.
3Ee bikkina mulli minaadab
«Seer Xiyooniinsi, Waa'i sagarim Yerusaaleemiinsi firookko;
ee bikkina waallehe, Waa'i duunanne fillona;
Yaaqoob Waa'i Keesammi Minem mallona.
Ixxi doo'lla issinonam neese losisookko;
neesem ixxi googonne malloommo» yitamo.
4 #
Iyo 3:10; Mik 4:3 Waa'i uulli minaadabanne oogatookko;
dut kee'n lambe'iinsi woca bi'isookko.
Ee bikkina ixxuwwi bisa'a maarashanne,
bagadom jajjaranne dabattamo;
Mat minaadab mulli minaadabanne ora ki'isooyyo;
ee lasage o'l losano losookkokim hee'ooyyo.
5Yaaqoob ooso, waallehe!
Waa'i caakkanne daba'llammona!
Xiiqqanchi Hasisoobee'an Ihukkisa
6Waa'a! Yaaqoob shumo'i ihu ki minaadaba hore'oomam uttaatto; oohim ixxuwwi eelliinchi firanne yoo manni kiiratinnee Filisxee'm manni genno'innee wo'mmito'i bikkinatte. Ki minaadabim mulli minaadabinne hamaaramaakko. 7Ixxuwwik uulli birinnee worqinnee wo'mmu bikkina amaxxi qaxiinsi hanaan ihaakko. Ixxuwwi uullannem farad wo'mmaakko; faraxxi gaare'ikim xig dutaakko. 8Ee'isam ixxuwwi uullanne qophpha'n waa'uwwi wo'mmaakkoohane; anginne baxxo'i misilluwwinam otossitamuulla.
9Ee bikkina manni hundannem tuullii sholle'nnii afookko. Moollanna, ixxuwwika baaxiilo haafititte.
10 #
Kal 6:15; 2Tas 1:9 Waa'i quunqiinsii baddisoo ixxi hibbiinsii gattakkeena daawwa'uwwannee barennee maaxammehe. 11Bolxitam keen sholle'llamo; birantam keen bi'llamo. Ee balla xale'i Waa'i lombinne iimiimookko. 12Gogoxxi Moollanni Waa'i bolxitam keenoo birantam keenoo sholliisoo balla qoodaakko. 13Ixxi Liibaanoos uulli qeeraa'l digibbuwwaa Baasaa'n uulli oda'uwwaa hundam bi'isookko. 14Lob duunnuwwaa hoffi duunnuwwaa, 15beero'i egerakkam qeeraa'l godo'uuwwaa o'l girbuwwaa hundam shiraashirookko. 16Lobakat mishisoo mu'utaa Tarsees wongiraa xuuxamoo'isa issookko. 17-18Mannik bolxoom bi'ookko; iimiim ihimmim gatookko; Waa'i bikkenne otossakkam luwwim hore'em bi'ookko; ee ammane lombinne xale'i Waa'i iimiim iimiimokko.
19Waa'i uulla huxiiseena waaroo ammane quunqiinsii baddisoo hibbiinsii xorimmina ki'nnaannonne daawwa'i woronnee uulli ba'l woronnee maaxanteena yakitamo. 20Manni ee keenina otossiteena ixxuwwi anginne baxxo'i bi'llekaa worqi misilaa fuuxe'inaa garashshamminaa ubbussu'uuyyi mattamo. 21Uulla huxiiseena Waa'i ixxi quunqinnee ixxaanninne baddisoo hibbinne waaroo ammane eehanniinsi maaxanta'a xotteena ki'nnaannonne daawwa'annee ki'n beqeeqannee maaxantamo. 22Fooshshi sanenne yoo lehoo manchonne bakke'immi gatona; ixxi mahinam awwaadooyyo.
Currently Selected:
Issaayyaas Kitaaba 2: KeesKita
Highlight
Copy
Compare
Share
Want to have your highlights saved across all your devices? Sign up or sign in
