Issaayyaas Kitaaba 14

Qeefadanchiinsi Daba'llimmi Bikkina

1Waa'i ixxi minaadabina Isra'eelina odim qishixxookko; ixxi gaqqanem issaa doo'llookko; ixxuwwi gaqqi uullannem hee'isookko; waaraanim waattamo; ixxuwwinnem shiinnaatanta'a maqire hee'llamo. 2Dut mulli minaadaphphi adilluwwi Isra'ee'l minaadab Waa'i ixxuwwina uwwu uulla daba'llitona hara'mmitamo. Mulli minaadab ixxuwwina agiddaninne awwaaddamo; illageen Isra'eela qeefaddo'i keen kaba ixxuwwi anganne ubbamo; wor amaddo'i keenom ijaajjamo.

Baabiloo'n Adil Lehoo'isa

3Waa'i ki'nnuwwa u'nniinsi, hawwiinsii kee'mmaalli agiddaniinsii usheexxisoo ammane 4Baabiloo'n adilanne.

«Oono'o, wor amadoo adil ubaakko! Ixxi ka lasage ayyem wor amadooyyo! 5Waa'i jor gassaa'nneka malaayyee daannoomaa bi'isaakko. 6Oo gassaan quunqinne minaadaba wor amaddu'uuyyi hee'llo'ookko; kaa'lla'a amaddo'i keenom lobakata u'nnissam hee'llo'o. 7Ihukkaarem kaba lasaanchonne uulli hundim xummaa usheexxatoo siidookko; hundim liiranchinne zammarookko. 8Liibaanoos hoomii digibii oo adil ubu bikkina liirantamo; mashka'oomim ka lasage ixxuwwa mureena meesaana ki'isookkok hee'ooyyo.

9«Baabiloo'n adila Si'ool aa'eena gudaakko; wiiddim ixxo weeshoolla; uullanne hee'llo'i malaayyaammuwwi ixxena anga ki'issamo; adilluwwi hee'llo'i keenim adilla'n barcumiinsi iimitamo. 10Ixxenam ‹Atim ni'isam hoongaanchi ikkittonnihe? Niinniinsim matisa ikkittonnihe? 11Ki lombi diitta'i sagarinnem Si'oola dillaakko'o; kiinniinsi woroon oor dahamaakko; ki eddechchim daquur ihaakko› yitakku'uuyyi» naacantakkamo.

12 # Kal 8:10; 9:1 At caakkissoo soodaraa'l boollaankichcho, hinkid iimaniinsi ubbitto! Uulli minaadaba sholliissam hee'llittok hinkid iimaniinsi ubbitto! 13#Mat 11:23; Luq 10:15At ki tiironne «Iimane firaa i adillano Waa'i boollaankiinsi hanaan issoommo; keesammi duunanne yoo wixxixxi beyyonne adillanonne afuuroommo. 14Duubiinsem hanaan firoommo; Hundam xanoo Waa'innem kobi'llamoommo» yitaa hee'llitto. 15Ihukkaarem Si'oolanne xillaalli barenne dillitootto.

16Keese moo'llam keen hundim maalaltu'uuyyi «Hanqinam uulla heekkeesukkok, uulli adilluwwam huxiisukkok, 17heer uulla diihisukkok, beero'uwwa gindansukkokii qeefadanto'i keen ixxuwwi uulla daba'llitambee'isa issookkokii ka manchonnihe?» yitamo.

18Adilluwwi lehoo ammane lombinne waammamookko. 19Ihukkaarem at waamma hooggaa lokkinne kade'amakkam haqqi buyyisa uunjantaatto. Ki leeshim oranne beeddu manni leeshinne ifiisamaakko; ee kee'n leeshinnem kinaam barenne uunjamaa hance'amaakko. 20Mashka'oomim at ki uulla bi'issaa ki minaadaba guullitaatto; ee bikkina at mulli adilluwwisa waamma siiddoo gada'i hee'ooyyo; jor kee'nnek shumo'i hee'ooyyo. 21Ki'lla'a uulla lagaa'llambee'isaa heer uullam beero'uwwinne wonshitambee'isaa ixxuwwi anno'i baaxii'l bikkina goo'n ooso hundam durakkam beyyo gudissehe.

Waa'i Baabiloona Bi'isoo'isa

22Gogoxxi Moollanni Waa'i «Baabiloona orinne bi'isoommo; ma'lluwwam gatisoommoyyo; shumo'ik mahim gatooyyo. An Waa'i kaka wocaammo. 23Baabiloona leepho'i issoommi bikkina urulli fikkaannoo beyyi ihookko; maham gatisoo'n fii'oo fii'aanchinnem fii'oommo. An gogoxxi Moollanni Waa'i kaka wocaammo» yoolla.

Waa'i Aasoora Bi'isoo'isa

24 # Isa 10:5-34; Noh 1:1—3:19; Saf 2:13-15 Gogoxxi Moollanni Waa'i «Hanqinam i qoodo'i hundim wo'mmookko; an sawwummisannem ihookko. 25Aasoo'l manna i uullanne iiqansoommo; i duunannem hancaacoommo; ixxuwwi gaanjaqqim i minaadabiinsi ki'ookko; iyyim ixxuwwi gudumiinsi dillookko. 26Heer uullina an qoodummi qoodo'i kane. Adilluwwam guzumo'eena i wod ki'aakko» yaa hide'aakko. 27Gogoxxi Moollanni Waa'i ka'isa qoodaakko; egedeena xanookok ayyette? Ixxi wodim guzumo'ina ki'aakko; dabareena xanookkokdu ayyette?

Waa'i Filisxeema Bi'isoo'isa

28 # 2Adl 16:20; 2Aga 28:27 Adil Akaaz lehu hiincho wocamu Waa'ik sagar kane.

29 # Erm 47:1-7; Hiz 25:15-17; Iyo 3:4-8; Amo 1:6-8; Saf 2:4-7; Zak 9:5-7 Filisxee'm minaadaba, oono'o, ki'nnuwwa aphphisu bicci iiqamaakko; ihukkaarem liirantakkotte. Mat hamashshichchi lehoo ammane ixxeensi baasoo mullek beyyonne qooccamookko; hamashshi quunqiinsim giiri'nnoo'i bararoo xarakkichchi qoccamookko. 30Bux allaachchi beyyo siixxitamo; hawwaanim xumminne hee'llamo. Ihukkaarem ki'nnuwwika shumo'o sibaarinne guullookko; gatto'i keenim beedditamo.

31Ki'nnuwwi Filisxee'm beero'uwwi hundim hara'mmatina laallehe; hundim baa'llehe; hanaa'n qarinne di'llek duub waaroolla; oohim ayyim gibaa xoreena xanoobee'i gogota.

32Filisxeemiinsi waattam asse'amaanina daballoommi dabachchi maha? Neesem «Waa'i Xiyoona dabaraa uullisaakko; hawwonne hee'u minaadabim eehe'enne daphphixxi beyyo siixxaakko» yinoommo.

Currently Selected:

Issaayyaas Kitaaba 14: KeesKita

Highlight

Copy